شال ءَ بیگواھیں مردمانی ھاتر ءَ زھرشانی برجاہ

بیگواھیں مردماں بلوچ بوگ ءِ سزا دیگ بوگ ءَ انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی پریس کلب ءِ دیم ءَ برجاہ، زھرشانی ءَ مروچی چار ھزار چار سد ءُ چِل ءُ ھپت روچ سرجم بوتگ –

پریس کلب ءِ دیم ءَ برجاھیں زھرشانی بنجل ءَ بیگواہ ءُ آوار جنی ءَ پد نمیرانیں ورنائیں اکس ایر انت –

ھمے وھد ءَ بیگواھیں بلوچانی پانکجیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ ات کہ بیگواھیں مردم یل کنگ بہ بنت ھرکسی سر ءَ اگاں الزامے ھست آمیدگس ءَ آرگ بہ بنت ھر ھما کس کہ اے دنیا ءَ نہ انت آئی ءِ کھول ھال دیگ بہ بیت ءُ زورانسری آوار جنی ءِ جیڑہ ملکی کانودانی رِد ءَ گیش ءُ گیوار کنگ بہ بیت –

آئی ءِ گوشگ ات کہ بیگواھیں مردمانی گناہ ھمیش انت کہ بلوچ انت، دوازدہ سالاں زنداناں درد سگوکیں ورناہ وتی درساں بے ھیال کنگ ءُ یل بوگ ءَ انت –

آئی ءِ گوشگ ات کہ بلوچستان ءَ انسانی ھکانی سنگینیں بگیری دارگ ءَ انسانی ھکانی ادارھانی ھچ نہ گوشگ ریاستی زوراکی ءَ گیشی اتکگ –

آئی ءَ گوشتگ کہ بلوچستان ءَ راجی توار ءَ ایرموش کنگ ءِ ھاتر ءَ تاکت کارمرز کنگ ریاست ءِ ھاتر ءَ شری نیار ایت –

آئی ءِ گوشگ ات کہ بیگواھیں مردمانی ھاتر ءَ کمیشن جوڑ کنگ بس یک دھوکہ ءُ دگہ ھچ –