ھوشاپ وئیل: شال ءَ زھرشانی کنوکاں زھرشانی کنان ءَ دگ بند کرتگ اَنت

بلوچستان ءِ بنجاھی شھر شال ءَ یک شمبے ءِ سھب ءَ بلوچستان یونیورسٹی ءِ دیم ءَ نودربراں بازیں کچے ءَ نندانک جتگ ءُ دگ بند کرتگ ءُ روانی مھتل کتگ اَنت –

سریاب دگ ءِ سر ءَ نندانک ءِ سبب ءَ روانی بند بیگ ءِ سبب ءَ دگ ءِ سر ءَ گاڑیانی لین کتار اَنت ءُ سندھ ءُ بلوچستان ءِ دگہ جاھاں آؤکیں مساپراں زھرشانی ءِ سبب ءَ جیڑھانی دیمپانی اِنت –

زھرشانی جار گوستگیں شپ ءَ بلوچ یکجھتی کمیٹی ءَ داتگ ءُ گُشتگ کہ ھوشاپ وئیل ءَ کُشگ بیتگیں زھگانی کھولانی لوٹ سرجم کنگ نہ بیتگ اَنت ءُ سرجمیں بلوچستان ءَ زھرشانی ءُ لاشانی ھمراھی ءَ اسلام آباد ءَ رھادگ بہ ایں –

جتا جتائیں بلوچ نودربر گلانی باسکانی بازیں کچے اے وھد ءَ سریاب دگ ءَ زھرشانی ءَ جاڑیگ اَنت-

سریاب دگ ءَ جاڑیگیں زھرشانی کنوکاں ھوشاپ وئیل ءَ دزمانجنیں ایف سی کارمندانی دزگیری ءُ بلوچستان ءَ ایف سی ءِ درکنگ ءِ لوٹ کتگ ئِے-

دومی نیمگ ءَ شھر ءَ ریڈزون ءَ گورنر ھاؤس ءِ دیم ءَ کھول گوں لاشانی ھمراھی ءَ پنچمی روچ ءَ زھرشانی نندانک ءَ نشتگ اَنت-

زھرشانی نندانک ءِ جاہ ءَ بلوچ ءُ پشتون راجدوستیں پاٹیانی رھشونانی بازیں کچے جاڑیگ اِنت ءُ کھولانی لوٹانی نہ منگ ءِ سر ءَ سرکار ءِ سر ءَ ایراد گرگ ءَ اَنت –

زانگ بہ بیت ھمے سال ءِ دہ اکتوبر ءَ کیچ ءِ ھند ھوشاپ ءَ ایف سی ءِ نزیکیں پوسٹ ءَ مارٹر آس دیگ بیتگ ءُ چریشی ءَ ھپت سالی ئیں اللہ بکش ء عبدالواحد ءُ پنچ سالی ئیں شراتون ء عبدالواحد ھما جاہ ءَ بیران بیتگ اَنت ءُ زد ءَ اتکگیں یک زھگے مسکان ء وزیر سک زدگ بیتگ اَت کہ انگت ءَ زدگ اِنت ءُ نادراہ جاہ ءَ آئی ءِ درمان بیگ ءَ اِنت –