آئی ایس آئی ءَ دو بلوچ زالبول منی چمانی دیم ءَ لَٹ ءُ کُٹ ءُ کُشتگ اَنت – یل بیتگیں احسان ارجمندی ءِ پدراھی

ناروے ءَ جھمنندیں بلوچ شھری احسان ارجمندی ءَ گوستگیں روچ ءَ چاگردی ویب سائٹ ءَ بلوچستان ءَ وتی بیگواھی ءِ درگت ءَ گپ کنان ءَ گُشتگ کہ من ءَ پاکستانی چیریں ادارھاں آوار جتگ ءُ بیگواہ کرتگ –

آئی ءَ گُشتگ کہ من ءَ سیزدہ سالاں داں بلوچستان ءِ جتا جتائیں ٹارچر سیلاں بندیگی کرتگ اش – کہ اود ءَ بندیگی ءِ وھد ءَ بیست ءُ چار ادارھانی تہ ءَ بس ادارآں آرمی رس اِتگ-

آئی ءَ گُشتگ کہ منی ھمراھی ءَ بازیں مردم آئی ایس آئی ءِ بندیگی ءَ بیتگ اَنت بازیں مردم لَٹ ءُ کُٹانی وھداں بیران بیتگ اَنت –

احسان ارجمندی ءَ پدر کرتگ ءُ گوشتگ کہ دو بلوچ زالبول منی دیم ءَ لَٹ ءُ کُٹانی وھداں بیران بیتگ اَنت-

احسان ارجمندی ءِ رد ءَ آئی ایس آئی ءِ کارمنداں لَٹ ءُ کُٹانی وھداں بازیں بندیگینانی دپ ءُ پونزاں پٹرول اش مان کرتگ ءُ الیکٹرک شاک ءُ دگہ دردناکیں لَٹ ءُ کُٹی بیتگ اَنت –

آئی ءَ گُشتگ کہ اود ءَ مردماں یک پَنامے دے اَنت دانکہ یکے دومی ءَ مہ زانت ءُ برے برے آئی ایس آئی ءِ کارمند وت بندیگانی دروشم ءَ کاینت ءُ ترا تئی نام ءِ جست ءَ کن اَنت –

بلوچستان ءَ بندوکیں اھوالکار ءَ آئی ءَ جست ئِے کتگ کہ تئی گند ءُ نند ھنچیں بندیگی ءَ بیتگ کہ آ بیگواہ اِنت یا آئی ءِ نام یات اِنت آئی ءَ پسھی ءَ گشتگ کہ منی مازگی یاداشت نیزور اِنت کسے ءَ گوں دچاری نہ بیتگ یکے دومی ءَ دیست نہ کنت بلے توار اشکُنگ بنت –

آئی ءَ یک جُستے ءِ پسھی ءَ گُشتگ کہ منی ارادہ اِنت من وتی بیگواھی ءِ بارو ءَ میان اُستمانی تکاں پاکستان ءِ ھلاپ ءَ کیس کن آں بلے اے وھد ءَ کرونا ءِ سبب ءَ بازیں ادارہ بند اَنت –

نیاد ءَ آئی ءِ مستریں برات ءَ وتی ھیال درشان کنان ءَ گُشتگ کہ احسان ءِ بیگواھی ءِ وھد ءَ زندگی ءِ جاور کجام پیم بیتگ اَنت ءُ اے وھد ءَ آئی ءِ گوھار ءُ مات برات ءِ جتائی ءَ اوپار اش کرت نہ کتگ بیران بیتگ اَنت –

زانگ بہ بیت ارجمندی اگست دوھزار ءُ نُھ ءَ پاکستانی چیریں ادارھاں ھما وھد ءَ دزگیر کرتگ کہ آ بلوچستان ءَ وتی سیادانی گندگ ءَ اتکگ آئی ءِ جاہ ناشناس بیتگ ءُ اے وھداں ھچ آمیدگساں پیش کنگ نہ بیتگ –

آئی ءَ سیزدہ سال ءِ بیگواھی ءَ پد ھمے سال ءِ اگست ءِ ماہ ءَ آجوئی رس اِتگ-

احسان ارجمندی ناروے ءَ نوزدہ سد ءُ نود ءُ یک ءَ جھمنند اِنت ءُ آئی ءِ یک زال ءُ سَے زھگ اَنت ءَ آ نارویجین ڈائریکٹوریٹ آف امیگریشن ءُ اوسلو میونسپلٹی ءَ پریچکاری ءِ کار ءَ کنت ءُ آئی ءِ بنکی ھنکین روکپتی بلوچستان ءَ اِنت-