پنجگور ءَ لبزانکی مراگش، لبزانکاراں بھر زرتگ

عزت اکیڈمی ءِ چیردستی ءَ پنجگور کونسل ھال ءَ یک روچی لبزانکی مراگشے برجم دارگ بوتگ ،مراگش ءَ پنجگور ءَ ھوار بلوچستان ءِ دگہ ھند ءُ دمگانی نامی ئیں کواساں بھر زرتگ، مراگش ءَ نبشتانک، گپ ءُ باوست ءُ شَیر ءُ شائری کنگ بوتگ –

لبزانکی مراگش ءَ پنجگور ءِ چاگردی مردم، افیسر، سول سوسائٹی ءِ باسک، شائر، زانتکار ءَ نودربراں ھوار ھر تک ءُ پھناتاں سادی داروکیں مردماں بھر زرتگ –

مراگش ءَ بلوچی زبان ءِ مزن نامیں کواس پروفیسر اے آر داد، بلوچستان یونیورسٹی بلوچی چیرمین رحیم مھر، ڈاکٹر نعمت اللہ گچکی، فقیرمحمد عنبر ءَ ھوار دگراں ھم بھر زرتگ –

عطا مھر ءَ گوں وش الھانیں توارے ءَ مراگش ءِ بندات کتگ –

اولی بھر ءَ پروفیسر ڈاکٹر جاوید بلوچ ءَ اشرف فضل ءِ یات ءَ وتی ھیال درشان اتگ انت ءُ پروفیسر اشرف بلوچ ءِ بلوچی لبزانک ءِ ھاتر ءَ داتگیں کربانی دروت ندر کرتگ اَنت –

مراگش ءِ دومی بھر ءَ پنجگور ءِ راج دپتر ءِ سر ءَ باوست کنگ بوتگ کہ پنجگور ءِ عبید اللہ بلوچ موڈیٹر بوتگ ءُ بلوچی زبان ءِ اھد سازیں آزمانکار ڈاکٹر نعمت اللہ گچکی، پروفیسر سجاد کوثر ءَ ھمے باوست ءِ سر ءَ جستانی پسو داتگ انت –

مراگش ءِ سیمی بھر ءَ زال کمال ءِ نام ءَ گرلز کالج ءِ پرنسپل پروفیسر ڈاکٹر فرزانہ ھاشم ءَ وتی زانت ءِ ھیال درشان کتگ انت-

مراگش ءِ چارمی بھر بلوچی زبان ءِ نامداریں استال نامیں چراگ پروفیسر اے آر داد ءُ پروفیسر رحیم مر بلوچ ءَ ملا عزت ءِ زند ءُ ازم ءِ سر ءَ وتی ھیال درشان کتگ اَنت-

مراگش عزت اکیڈمی ءِ نیمگ ءَ بندات کنگ بوتگ ءُ داد عزت داد بھر کنگ بوتگ انت –

شائری ءِ داد ملک ابرار ءَ رس اتگ، رجانک ءِ داد بیرانیں اشرف فضل ءِ نام ءَ کنگ بوتگ، آزمانکاری ءِ داد ڈاکٹر نعمت اللہ گچکی ءَ رس اتگ، زندمان ءِ وش تبو کنوکی ءِ داد پکیر محمد عنبر ءَ دست گپتگ –

مراگش ءِ پنچمی بھر ءَ شائری بوتگ ءُ شائراں وتی شَیر ونتگ ءُ داد گپتگ اَنت –

مراگش ءِ گڈی بھر ءَ میر چیرمین عزت اکیڈمی ءِ خدا رحم شوھاز ءَ درسیں مردمانی منت گپتگ ءُ مراگش ءِ ھلاسی ءِ جار جتگ – مراگش ءَ بازیں کتاب ءِ اسٹال جنگ بوتگ کہ مراگش ءَ بھر زورکیں مردماں کتاب زرتگ اَنت –