گوادر: محمد علی جناح ءِ “بت ” ءِ پروشگ ءِ ارزی نبشتگ

کاؤنٹز ٹیرازم ڈپارٹمنٹ (سی ٹی ڈی) ءِ واکداراں وتی شنگ کرتگیں درشان ءِ تہ ءَ گُشتگ کہ قائد اعظم ءِ بت ءِ تراکناکیں شورواں گوں تباہ کنگ ءِ ارزی گوادر ءَ پولیس تھانہ ءَ نبشتگ کرتگ –

سی ٹی ڈی ءِ رد ءَ ارزی ءَ سیون اے ٹی ات ءُ ایکسپلوسیوایکٹ ءَ ھوار دگہ پھنات ھوار اَنت کہ اشی ءِ ارزی نبشتگ کرتگ –

زانگ بہ بیت گوستگیں گوادر ءَ پدی زر ءَ ناشناسیں مردماں پاکستان ءِ محمد علی جناح ءِ مِکیں بُت تراکناکیں شورواں گوں ڈروینتگ اَت –

ڈروینگ ءِ زمہ واری بلوچستان ءِ آجوئی ءِ واستا جنگ کنوکیں گل بلوچ ریپبلکن آرمی ءِ جارکش بیبگر بلوچ ءَ منّ اِتگ اَت-

بیبگر بلوچ ءَ وتی شنگ کرتگیں درشان ءَ گُشتگ اَت کہ محمد علی جناح ءَ پندل ءُ ھنراں بلوچ سرڈگار ءِ سر ءَ زورگری کرتگ ءُ ھما روچ ءَ داں روچ ءِ مروچی ءَ محمد علی جناح ءَ بلوچ سرڈگار ءِ سر ءَ ھمک بلوچ گوں بدیں نگاھاں چار ایت ءُ آئی ءِ لیکھاں بلوچستان ءَ ھچ جاہ ءَ جاگہ نیست اِنت-

بیبگر بلوچ ءَ گشتگ اَت کہ محمد علی جناح خان آف قلات احمد یار خان ءَ زوردستیں انگریزانی دیم ءَ وتی وکیل جوڑ کرتگ ءُ بستار ءِ ڈیھ ءِ گواچنانی واستا گپ کت بہ کنت بلے اے پندل ساز ءُ ھنرکاریں انسان ءَ انگریزانی زوردستی ءَ جوڑ بیتگیں نیم بندگیں ڈیھ پاکستانی پوج ءِ زور ءَ بلوچ سرڈگار ءِ سر ءَ زورگری کرتگ –

آئی ءَ گُشتگ اَت کہ آ وھد ءَ بہ گر داں انیگ ءَ بلوچستان ءَ محمد علی جناح ءَ یک دروگ بند ءُ ھنرسازیں مکاریں ھاکمے ءِ نما ءَ یاد کنگ ءَ اَنت ءُ ریاست وتی دروگیں وانگ ءِ نام ءَ مئے آؤکیں پدریچ ءِ دیم ءَ محمد علی جناح ءَ یک بامردے ءِ نام ءَ پیش کنگ ءَ اَنت- بلوچ پُسگ اے وڑیں مکارانی مکاری محمد علی جناح ءِ راستی ءَ سرپد اَنت پرچاکہ اے نسل یک آشوبی وھدے ءَ رُدگ ءُ مزن بیگ ءَ اَنت –