نبشتانک: هانی ئیں بلوچستان
نبشتہ کار: سدرا نسیم
دی بلوچستان پوسٹ
گْوستانک ءِ تاک اِے گپ ءِ شاھدی ءَ دے اَنت بلوچستان یک وتواکیں ریاستے بیتگ، انگریزاں جتائیں وهد ءُ زمانگاں هاس 1758 بگر تاں 1896 ءِ باریگ ءَ اِد ءَ قبضہ ھم کُتگ ءُ اِے زمین ءِ ونڈ جَتگ –
بلوچستان ءِ اِے بَھر ءُ ونڈ کہ مرچی پاکستان ءَ گوں، انگریزاں 1839 ءَ خان میر محراب خان ءِ شھید کنگ ءَ پَد قبضہ کُت ءُ 1948 ءَ برطانوی مفاد ءِ هاترا زور گوں پاکستان ءَ هَوار گپتگ دانکہ وهد ءِ لوٹانی پَد ءَ آئی ءَ روس ءُ ھمساهگیں مُلکانی هلاپ ءَ فوجی سنگرے ءَ پہ کارمرز کُت بہ کنت-
پاکستان ءِ زوریں هَواری ءِ بگیری ءُ بلوچستان ءِ آجوئی ءِ هاترا ھما بنداتی مردُماں کہ جنگ دات چرایاں خان عبدلکریم آغا ءُ پد ءَ نواب نوروز خان اَت کہ وت ءَ کُربان اِش کُت چہ قابض ءُ زورگیری ءَ بلوچستان ءِ رَکّینگ ءُ آجوئی ءَ بِنا بیتگیں اِے جنگ تاں مرچی ھم مُھکمیں رنگے ءَ برجاه اِنت-
مروچی ایندگہ هزاراں جیڑهانی هَواری ءَ کُشت ءُ کوش، زانگولیں جونانی تالانی ، گار ءُ بیگواھیں مئے اِیردست ءُ قیامتیں زندمان ءِ مُجّتی بَھر اَنت-
هَمُک یک بنا بؤکیں روچے ءَ نوکتریں جیڑه ءُ گمے بوج ایت چوناھا گُلامی جیڑگانی بُنزه اِنت ، بےلئین ءُ آپی ، در پہ دری ، محرومی ، بزّگ ءُ واری اِے کُل ھمے اِیردستی ءِ داد اَنت ایردستی اِنت کہ پُرمڈّی ئیں هاک ءِ اوبادگ هرچی ءَ زبھر اَنت-
ازاب ءُ کھریگیں زمین ءِ نوکتریں المناکیں کارست تاج بی بی ءُ هانی اَنت تاج بی بی وتی تنگدستی ءُ لاچاری ءِ جاه ءَ دار ءَ رؤت کہ بے میار ءَ راه ءِ نیم ءَ لجوزیں لشکر ءِ تیرگواری ءَ چہ کُشگ بیت – هانی بلوچ کہ گوستگیں روچاں نارهبندیں انٹری ٹیسٹ ءُ ناکامیں سسٹم ءِ بگیری ءَ پہ وتی هَکّ ءَ نودربرانی همراھی ءَ یک چِست بیوکیں آوازے اَت کہ کالونائیزر ءِ پولیس ءِ زوراکی ءُ لَٹ شاپیاں چہ آ چمّاں زِنَگ ءُ شگید کنگ بیت ، چرے دلپدردیں کوش ءَ زمین وتی دگہ جھد ءِ براه ءُ چیدگے ءَ بے بھر کنگ بیت – پہ اِے نیکیں گام ءَ کامریڈ هانی بلوچ ءِ کُربانی ءَ سُھریں دُروت-
اِے راستے داں ایردستی هَست چُشیں کارست هرروچ نوکتر بُوان بَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔