گوادر ءَ ناشناسیں مردماں دو مردم آوار جتگ ءُ گوں وت برتگ اَنت

سربوتگیں ھالانی بلوچستان ءِ تیاب دپی دمگ گوادر ءَ ناشناسیں گاڑی سواریں مردماں دو مردم آوار جتگ گوں وت برتگ اَنت –

آوار جنگ بوتگیں مردمانی پجار نور محمد ء کریم بخش بلوچ ءُ ناصر بلوچ ءِ ناماں بوتگ انت –

آوار جنگ بوتگیں مردمانی تہ ءَ یکے نیشنل پاٹی ءِ اُستانی کمیٹی ءِ باسک آدم قادر بخش ءِ سیاد انت ءُ دومی آئی ءِ دُکان ءِ کاردار بوتگ –

اھوالکار ءِ رِد ءَ ھردو مردم مروچی بزاں یکشمبے ءِ ادار سَے ءَ آدم قادر بخش ءِ دُکان ءَ چہ آوار جنگ بوتگ انت – آوار جنوکاں اسپیتی رنگے کرولا گاڑی ءِ گون بوتگ کہ آئی ءِ دیم ءِ نمبر پلیٹ لگوک بوتگ پُشتی نیمگ ءَ نمبر پِر نہ بوتگ – تنی وھدی آوار جنوکانی درگت ءَ ھچ وڑیں ھال نیست کہ چونیں مردم بوتگ انت ءُ کجام سوب ءَ اے مردم آوار جنگ بوتگ انت – بلے اے دمگانی تہ ءَ گیشتر ھمے گمان کنگ بیت کہ آوار جنیاں پاکستانی پوج ءُ چیریں ادارھانی دست مان انت –

آدم قادربخش ءُ ناصر ءِ کھول ءِ مردماں چہ دمگی سیکورٹی ءَ لوٹ کتگ کہ درسیں سی پیز ءَ مردماں پٹ ءُ پول بہ کن انت ءُ آوار جنوکانی گِرگ ءَ آھانی کمک ءَ بہ کن انت –