پت ءَ پد برات ءِ زورانسری آوار جنی مئے زند ازاب ءِ تہ ءَ گوزگ انت – اسما بلوچ

چہ ھشت سالاں بیگواھیں جمیل بلوچ ءُ گوستگیں ماہ ءَ پنجگور ءَ آوار جنگ بوتگیں نجیب بلوچ ءِ یل کنائینگ ءِ ھاتر ءَ مروچی کراچی پریس کلب ءِ دیم ءَ یک روچی شدکشیں زھرشانی بنجلے ءَ پد جمیل بلوچ ءِ زھگ ءُ نجیب بلوچ ءِ گوھار اسما بلوچ ءَ کراچی پریس کلب ءِ دیم ءَ تران کنان ءَ گوشتگ کہ منی پت جمیل رحمت ھشت سال ءَ پیسر بیست ءُ نھ اپریل دوھزار سیزدہ ءِ سھب ءَ مئے میتگ ءَ آواران ءَ مئے چمانی دیم ءَ پاکستانی پوج ءَ زورانسری آوار جتگ ءُ بیگواہ کتگ -پت ءِ آوار جنی ءَ چہ مئے زند ازاب ءِ تہ ءَ گوزگ ءَ بوتگ کہ مروچی ءَ چہ یک ماھے پیسر بزاں یازدہ اگست ءَ ایپ سی ءَ منی برات نجیب بلوچ کہ چہ پنجگور ءَ کراچی ءِ رؤگ ءِ وھد ءَ رخشان کور سرادک ءَ پوجی پانگس ءَ کوچ ءَ چہ ایرگیجگ بوتگ پجار کارڈ چارگ ءَ پد زورانسری آوار جتگ ءُ بیگواہ کتگ اش –

آئی ءِ گوشگ ات کہ منی برات نجیب بلوچ گوستگیں بازیں سالاں متحدہ عرب امارات ءَ کار ءَ بوتگ، ھمے وھد ءَ چٹیاں وتی گِس ءَ اتکگ بوتگ آئی ءِ چٹیانی ھلاس بوگ ءَ آ پنجگور ءَ چہ دیم پہ کراچی ءَ رؤگ ءَ بوتگ کہ اود ءَ پد ءَ امارات ءَ رؤگی بیتگ کہ زورانسری آوار جنگ ءُ بیگواہ کنگ بوتگ، اشی ءَ پیش من وتی پت ءِ ھاتر ءَ زھرشانی کنان ءُ پیداکاں، من وتی پت ءِ ھاتر ءَ ھشت سال انت کہ زھرشانی کنگ ءَ انت درسیں جمھوری ءُ کانودی راہ گچین کتگ، آمیدگس ءِ نزام ھم چکاستگ اَنت بلے بید چہ پت ءِ یل کنگ ءَ نوں منی برات آوار جنگ ءُ بیگواہ کنگ بوتگ، وتی برات ءِ یل کنائینگ ءِ ھاتر ءَ من وتی مات ءِ ھمراھی ءَ شال ءَ شتگ آں دو ھپتگ ءَ ما ھمود ءَ بلوچ مسنگ پرسنز ءِ بنجل ءَ نشتگ اِنت، زھرشانیاں بھر زرتگ چاگردی ترامجاہ ءُ دگہ تک ءُ پھناتاں توار چست کتگ، بلے روچ ء مروچی منی برات ءُ پت ءِ ھچ وڑیں ھال مار ءَ سر نبوتگ ءُ یک ماھے ءِ گوزگ ءَ پد سرکاری برزی تبک ءِ مردماں ھچ کس ءَ مئے گوم ءَ ھال ءُ اھوال نہ کتگ –

آئی ءِ گوشگ ات ما وتی پریاد زرتگ ءُ اول ءَ شال ءَ شتگیں پد ءَ مروچی اد ءَ کراچی ءَ اتکگیں – شمارا ھال دیگ لوٹیں کہ اشی ءَ پیش ھم مئے کھول ءِ سر ءَ زوراکی کنگ بوتگ، مئے کھول ءِ سر ءَ زلم کنگ بوگ ءَ انت منی پت ءُ برات بس ھمے ھاتر ءَ آوار جنگ ءُ بیگواہ کنگ بوتگ انت کہ ما آزاتیں گوات ءِ تہ ءَ زندگ بوگ ءِ گپ ءَ جنیں – زاناں مار ءَ وتی سرڈگار ءِ سر ءَ سکون سر ءَ زند گوازینگ ءِ ھک نیست؟ زاناں ما اے ملک ءِ جھمنند نہ انت ؟ زاناں وتی پت ءِ ھاتر ءَ توار چست کنگ جُرمے کہ اشی سزا ھمے داب ءَ دیگ بیتگ کہ منی برات آوار جنگ بوتگ؟ ما ءُ مئے کھول ازابیں زندئے گوازینگ انت، منی کماش ءُ نادراھیں مات وتی چک ءِ بیگواھی ءَ چہ سُرگی نہ انت، ناں ورگ وارت ناکہ وپسیت ءُ بس ھمے گوش ایت کہ زندانانی تہ ءَ باریں منی چک ءِ چی ھال بیت، پہ ھدائیگی مار ءَ چہ اے ماژگی نادراھی ءَ رکینگ بہ بنت مار ءَ کجام جرم ءِ سزا دیگ بوگ انت؟ اگاں منی پت ءُ برات ءَ جرمے کتگ گڑا کانودی راہ ءَ وتیگی کنگ بہ بیت ءُ سزا دیگ بہ بنت بلے اے وڑ زورانسری آوار جنگ سالاں سال بیگواہ کنگ وت یک گیرکانودی ءُ گیر انسانی املے-

اسما بلوچ ءَ گوں اھوالکاراں گُشت کہ ما شمے منت واریں کہ شما مئے پریات گوشداشت ءُ ما امیت داریں کہ شما مئے اے پریات ءَ وتی رسانکدرانی تہ ءَ جاہ دے اِت ءُ اے زوراکی ءِ بگیری ءَ مئے توار جوڈ بہ اِت ءُ مئے توار ءَ برزی تبک ءِ ھاکماں سر کن اِت- آئی ءَ گشت کہ من ادے ساڑی ئیان انسانی ھکانی گلانی رھشونانی ھم منت ءَ گراں کہ آھاں اے جاورھالاں مئے ھمراہ داری کت مئے توار جوڑ بوت اَنت –