وی بی ایم پی ءِ نیمگ ءَ بیگواھیں مردمانی نامانی سر کنگ ءِ جار

بلوچستان ءَ گار ءُ بیگواھیں مردمانی واستا توار چِست کنوکیں گل وائس فار بلوچ مسنگ پرسنز ءِ نیمگ ءَ بیگواھیں مردمانی کھولاں گوں دزبندی کنگ بیتگ کہ آ وتی گاریں مردمانی نام ءُ دگہ ڈساں گل ءِ گور ءَ سر بہ کن اَنت –

اے درگت ءَ وائس فار بلوچ مسنگ پرسنز ءَ یک “فارم ” تاکے شنگ کرتگ ءُ گوشتگ کہ بلوچستان ءَ گار ءُ بیگواھیں بیتگیں مردمانی کھول زوت ءَ چہ زوت وتی مردمانی ڈس نشاناں ھمے تاک ءِ سر ءَ نبشتگ بہ کن اَنت ءُ وائس فار بلوچ مسنگ پرسنز ءَ سر بہ کن اَنت –

گل ءِ گوشگ اِنت کہ اے چیزانی یکجاہ بیگ ءَ آیانی گاریں مردم بوت کنت کہ زوت پہ سلامتی واتر بہ بنت، اے چیزانی مُچ کنگ ءِ مول ءُ مراد گاریں مردمانی جان ءِ رکینگ ءِ یک تُشے نیمون اِنت –

گل ءِ نیمگ ءِ جار تاک آئی ءِ رسانکجاہ جاھاں شنگ بیتگ ءُ بلوچستان ءِ دراھیں بیگواھیں مردمانی کھولاں گوں دزبندی کنگ بیتگ کہ اے جار تاک ءَ سرجم بہ کن اَنت –

زانگ بہ بیت گوستگیں روچاں بلوچستان ءَ سی ٹی ڈی ءَ لس مردم تیر آماچ کتگ ءُ کُشتگ اِت اَنت اشانی پژدر ءَ اے مردمانی پجار سالانی سال گار ءُ بیگواھیں مردمانی ناماں بیتگ اِت اَنت کہ بازیں سالاں پیسر پاکستانی لشکر ءَ بلوچستان ءِ جتا جتائیں جاھاں چِست کرتگ ءُ بیگواہ کتگ اَنت –

اے ھالانی سر بیگ ءَ بلوچستان ءَ گار ءُ بیگواھیں مردمانی واستا جاور گیشتر ناگیگی ءِ دیمپان بیت اَنت ھمک گار ءُ بیگواھیں مردمانی کھولانی جان ءِ رگاں زلور یک نا یکے رگے جنگ ءَ اِنت کہ بیت کنت مئے مردماں اے ساھت ناں آ ساھت یک تاوانے ءِ دیمپانی کنگ کپ ایت اِنت-

چرے ترسناکیں جاورانی دیمپانی ءَ بلوچستان ءِ لوگانی مات ءُ گوھار، پیر ءُ کسانیں زھگ اے دلتوسوکیں زندگی ءِ ارجان ءَ جُشگ ءَ اَنت ءُ وتی جگرانی ٹکرانی سلامتی ءِ دروت ءَ کنگ ءَ اَنت –

بلوچستان ءِ جھمنندیں وکیل خالدہ بلوچ ءَ ھم وتی تامر بندے ءَ بیگواھیں مردمانی کیسانی یکجاہ نہ بیگ ءَ وتی ھیال درشان کتگ اِت اَنت ءُ آئی ءَ گُشتگ اَت کہ بلوچستان ءِ گار ءُ بیگواھیں مردمانی کھول باید زوت ءَ چہ زوت وتی مردمانی ڈس نشاناں وائس فار بلوچ مسنگ پرسبز ءِ گور ءَ سر بہ کن اَنت –

ھمے وڑ گوستگیں روچاں سی ٹی ڈی ءِ دست ءَ جنگ بیتگیں مردمانی بارو ءَ کراچی ءُ شال ءَ ھم زھرشانی بیتگ اَت، زھرشانی ءَ بازیں مردماں وتی وتی زھر ءِ ھیال درشان کتگ اِت اَنت –

ھمے زھرشانیاں گار ءُ بیگواھیں ڈاکٹر دین مھمد ءِ جنک ءُ وائس فار بلوچ مسنگ پرسنز ءِ جوائنٹ سیکرٹری سمی بلوچ ءَ گُشتگ اَت کہ گار ءُ بیگواھیں مردمانی کھول باید بے تواری ءَ مہ نند اَنت-

آئی ءَ گُشتگ اَت کہ اگاں کھول بے توار بیت اَنت گڑا گمان ھمے بیت اِنت کہ آیانی مردم سلامت نہ بنت آئی ءَ گوستگیں روچاں شال ءَ سی ٹی ڈی ءِ دست ءَ کُشگ بیتگیں یک بیگواھیں مردمے ءِ اکس دست ءَ کرتگ ءُ گشتگ کہ اگاں کھول بے تواری ءَ نشت اَنت گڑا اشی ءَ ھچ گمان مہ کن اَنت آیانی مردم اے رنگ ءَ الم آیانی دست ءَ کپ اَنت بلے اے بے تواری ءَ بھتر ھمیش اِنت بہ پروش اَنت وتی مردماں بہ رکین اَنت –

بلوچستان ءَ گار ءُ بیگواھیں مردمانی جیڑہ یک دھکے ءَ برز اِنت کہ روگ ءَ اِنت کہ اے وھد ءَ ھمک روچ مردم گرگ ءُ گار کنگ بیگ ءَ اَنت ءُ گار ءُ بیگواھیں مردمانی گار کنگ ءِ بھتاماں سرکاری گلانی سر ءَ لڈگ ءَ اَنت بلے روچ ء مروچی ءَ تاں چیریں واکاں اے گپ پہ وت ءَ نہ زرتگ –