شال ءَ بیگواھیں مردمانی ھاتر ءَ زھرشانی برجاہ، پانزدہ جولائی ءَ زھرشانی بیت

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ چار ءُ ھزار سَے سد ءُ ھپتاد ءُ پنچ سرجم بوتگ – بلوچ اتھاد ورنا ءِ سرکماش بلال بادینی بلوچ ءَ وتی ھمراھانی ھمراھی ءَ بنجل ءِ تر ءُ تاب کرتگ ءُ بیگواھیں مردمانی کھولانی گوم ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ تران کنان ءَ گوشتگ کہ دنیا ءُ اے دمگانی جاور ھال ھمک روچ تیزی ءَ گوم ءَ بدل بوان انت ءُ اے بدل بؤکیں جاورھالاں یک گپ ءِ پدّر کتگ کہ دنیا ءِ سیاست ءِ تہ ءَ ھچ کس مدامی کسے ءِ بیل یا دژمن نہ انت ھر یکے وتی مفاداتاں پھازیت اگاں اے مفادات ءِ سیاست ءَ کسے سرپد نہ انت گڑا آ نیست ءُ نابود بیت –

ماما قدیر ءِ گوشگ ات کہ وتی یکجاھیں پائدگانی گرگ ءِ ھاتر ءَ ما بھیسیت راج زمہ واری دارگ انت؟ مئے رھشون ءُ راجداریں گل اے بدل بؤکیں جاور ھالاں گندگ انت؟ او اے بدل بؤکیں جاور ھالاں چہ وتی مفادات آں گپت کنیں؟ مار ءَ اے چیزانی سر ءَ چم ایرکنگی انت –

ماما قدیر ءِ گوشگ ات کہ ھما بدلی کہ مروچی دیم ءَ آیگ انت اشانی لھتے سال پیش کسی گمان ءَ نہ بوتگ اشی ءَ ابید ھما جاور ھال تیزی ءَ گوں بدل بوگ انت اے مئے واستا تاوان بار بنت یا پائدگ اے مئے سیاسی سنچ ءِ سر ءَ پائدگ کن انت مئے پالیسی ساز ادارھاں دنیا ءَ پیام دیگی انت کہ مئے لوٹ چی انت –

ماما قدیر بلوچ ءَ پانزدہ جولائی شال ءِ پریس کلب ءِ دیم ءَ تاج محمد سرپراہ ءِ زورانسری آوارجنی ءِ بگیری ءَ آئی ءِ کھول ءِ نیمگ ءَ بوکیں زھرشانی مردماں ھوار بوگ ءِ لوٹ کتگ ءُ گوشتگ کہ تاج محمد سرپراہ گوستگیں سال ءِ نوزدہ جولائی ءَ چہ کراچی بالی پٹ ءَ پاکستانی چیریں ادارھاں آوار جتگ ءُ بیگواہ کتگ – آئی ءَ گوشتگ کہ اے جیڑہ مروچیگین ءِ نہ انت بلکیں بیست سال ءِ کہ برجاہ انت اے گیر انسانی امل ءِ بگیری ءَ جوانیں وڑے ءَ توار چست کنگی انت –

آئی ءِ گوشگ ات کہ مرچی باندا بیگواھیں مردم دروگیں میڑ ءِ نام ءَ جنگ بوگ انت کہ سک باز بژنی انت –

آئی ءِ گوشگ ات کہ مار ءَ ترس انت کہ ایندگہ بیگواھیں مردم دروگیں میڑ ءِ نام ءَ جنگ مہ بنت ھمے ھاتر ءَ درسیں انسانی ھکانی ادارہ سیاسی گل ءُ نودربر گلاں چہ لوٹ کنیں کہ آ مئے ھمراہ داری بہ کن انت ءُ توار چست بہ کن انت –