نبشتانک: لھتیں ٹیکی پَش کپتگ اَت
نبشتہ کار: مھم جان گُل
دی بلوچستان پوسٹ
چہ باتن ءَ ھرچ دردے ءَ نال اِت ءُ ھیسکار جت ، من مان نیارت ءُ ترا گِیراں بست چماں چو نِھنگ ءَ ھار کُت ءُ من بُکّ وارت ءُ دَراتک آں ، چی ءَ کہ تئی مُدّتے ءِ ودار ءَ اِشتاپ اِت آں تئی کلوہ ءِ باپُشت ءَ من ٹپّاناں واد چنڈّ اِت ءُ گوں ھوناں ءَ شُشت اَنت ، دل گوں ھزار جیڑگاں دُچار اَت، بلے پاداں انگت وتی سپر نہ داشت ءُ تراولاں سکینے رُودینتگ اَت۔ تئی گیرّاں انچو پیڑاتگ اَت ، منی زِرد ءُ جبین تئی ودار ءَ انچو بے کرار کہ دل ءَ نہ مَنّ اِت کہ چہ سپر ءَ پُشت بِہ دے آں۔
من جُنزاں جنزان ءَ وتی سپر ءِ نْیام ءَ اَتک ءُ سر بیت آں ، گُڑا تئی ھبرے من ءَ گیر اَتک کہ زند چکّاسے ءُ اِد ءَ ھرکس وت ءَ ءُ دومی ءَ چکّاس اِیت۔ دُرست چکاس ءَ پہ باج برگ ءَ دیم ءَ جُنزان کن اَنت ، من ھم یکروچے ترا چکّاساں گوں دُچار کناں باریں تو باج برے یا وھد ءِ لُوٹ! گُڑا پد ءَ من جیڑاں کہ وھد ءِ ھمراھداری ءَ بِہ کن آںیا تئی۔
گُڑا من وتی باتن ءِ مردُم شُھاز اِت ءُ پاد داشتاں جُست کُت کہ اے پسّواں بِہ دے آں ، آئی ءَ سارتیں گینّسارتے کَشاِت ءُ گْوشت، تو اتک نہ کن ئے اے تھار ماھیں شپاں کہ رُژن نیست رُوکیں کندیلاں داں چینچُک ءَ من تئی دست ءَ بِہ گراں ءُ دیمتِر ءَ کَشان بِہ کناں ءُ بِہ براں، من گوں ترا سھت ءُ دمان گون نہ بَہ آں ، اگاں ترا اے سپر ءَ جُنزگی اِنت گُڑا تھنائی ءَ وتی کُوپگاں لَڈّ ءُ دَر بِہ کپ، پرچا کہ باندا ترا منی ھاجت مہ بیت ، اے سپر ءَ ترا بازیں آدمی رسترانی دیمپان بُوَگی اِنت ، گُڑا ترا تُرسگی نہ اِنت، ترا آدمی رسترانی دیم ءَ چو کوہ ءَ مِکّ بُوَگی اِنت۔
آئی ءِ ھمے ھبر منی باتن ءَ سھت ءُ دمان چو شِل سریں تیرے ءَ ھیر بُکّان اَت ءُ پسّو ءِ وداریگ اَت، بلے منی باتن ءَ اِنچو ھاٹیگ ءُ توکل مان نیست اَت کہ پسّواں بِہ دے آں، پرچا کہ آئی ءِ وش آتک ءَ من ءَ پسّوانی زِر ءَ بُکّ دَیگ ءَ نیشت ءُ منی اُوشتیں پاد چو جنگولے ءَ بال گیپتاں ءُ پہ ھمائی ءِ ڈس ءُ نشان ءَ رھادگ بیت آں ، گُڑا منی پادانی ھوناں کِشک بُران کُت ، نُکّ ءَ تُکّاں گُلاٹان ءُ من وت ءَ ساکِم کُت، بلے دل ءَ کَے داشت کنت کہ وھدے ودارانی کرار دمتُوس بِہ بیت، چَم وتی رُژن ءَ تالان بِہ کنت ءُ کس مہ گِند اِیت بس لھتیں ٹیکّیاں پمّن پش کپتگ اَنت ، یک منگلیکے ءِ پُرشتگیں دو ٹُکر ءُ یک چُلمبے کہ ھاکانی تہ ءَ کپتگ ءُ گُشانے کہ ڈنگراں مان پُوش اتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔