نبشتانک: دوازده سال ءِ بیگواهی
نبشتہ کار: زهیر بلوچ
دی بلوچستان پوسٹ
بلوچستان ءَ زورآنسری آوارجنی نوکیں گپے نہ اِنت بلے گوستگیں دو دیک ءَ چہ زورگِریں اِستان ءِ نیمگ ءَ اے دِرچ روچ پہ روچ تُرندی ءَ گوں برجاه اِنت همُک روچ بلوچ ورناه ، پیر کماش ءُ زهگ ءُ زالبول هم آوارجنئگ ءُ لشکری بُنجُلانی تہ ءَ بندیگ ءُ لَٹ ءُ کُٹ کنگ بوگ ءَ اَنت-
بلوچستان ءَ چُشیں گِس ءِ مروچی پَشت نہ کپتگ کہ آ گِس ءَ یک مَردُمے آوارجنگ ءُ بیگواه کنگ نہ بوتگ اَنت نوں وَ همک روچی ربیت ءِ زورگِر ءَ رواج داتگ کہ بلوچ چُکچینی ءَ کجامی رنگ ءَ برجاه بداریت اے دِرچ ءَ گیشتر نودربر زانتکار ، ڈاکٹر ، اُستاد ءُ نبشتہ کار نشانگ جوڈ کنئگ ءُ آوارجنئگ بوهگ ءَ انت اِشانی تہ ءَ بازینے ٹپ ءُ ٹوریگیں لاش هم دست کپتگ انت ءُ بازین ءِ سالانی سال تهاریں زندانانی تہ ءَ بندیگ انت ءُ لٹ ءُ کُٹانی دیمپان انت اے بیگواهیں مردمانی مات گُهار پہ وتی مهروانانی واستا در پہ در اَنت کِشک ءُ دگانی سر ءَ نشتگ انت پریس کلبانی دیم ءَ زهرشانی ءَ انت بلے زورگریں اِستانی واکدار ءُ آمیدگِس بلوچ مات ءُ گوھارانی پریات ءُ زاراں هچ دلگوش نہ کن انت. بلوچ ماتانی چمانی ارساں نہ گند انت انچو سَما بیت کہ اے کَر ءُ کور انت ءُ زبان اِش گُنگ اِنت-
همے وڑ ءَ بلوچ نودربر زاکِر مجید هشت جُلکان دو هزار نُو ءَ زورگریں استانی لشکر ءَ بلوچستان ءِ دمَگ مستونگ ءَ چہ دو دگہ سنگت ءِ همبراهی ءَ آوار جتگ بیگواه کُتگ لهتے روچ ءَ پد آ دوئیں همبراه یل کنگ بوتگ انت بلے زاکر مجید روچے مروچی بیگواه انت زورگریں لشکر ءِ بندیگ جاھاں لَٹ ءُ کُٹانی دیمپان انت زاکر جان ءِ آوارجنی ءَ پد آئی ءِ کھول یکشل ءَ پہ آئی ءِ آجوئی ءِ هاتر ءَ جهُد کنئگ ءَ اِنت زاکر جان ءِ گوھار پرزانہ مجید ءَ گوں ایندگہ بیگواهیں مردمانی کھول ءَ هزاراں کلومیٹر دراجیں پند بُراتگ شال ءَ بگِر داں اسلام آباد ءَ گوں وتی تراولیں پاداں شُتگ کہ بلکیں منی توار گوشدارگ بہ بیت ءُ زاکر جان چہ زورگرے زندان ءَ آجو کنگ بہ بیت بلے بژن انت کہ انگہ اے زوراکانی گوش ءَ مورے هم نہ وارت زاکر جان ءِ مات پیرانسری گوں نادُراهیں جان ءَ برے شال پریس کلب ءِ دیم ءَ نشتگ ءُ برے اسلام آباد ءِ پریس کلب ءِ دیم ءَ نشتگ زهرشانی کنگ ءَ انت-
سرد ءُ گرم هچ نچاریت بس وتئی چمانی روک زاکر جان ءِ اکس ءِ امبازاں گون انت ءُ لُنٹانی سرا بس زاکر جان ءِ نام ء وِرد انت کہ زاکر جان ءَ واتر بیار اِت چنچو گران انت اے ساهگریں ودار تاسپیں بچانی بیگواهی ماتاں سک باز تورِشت دنت دمان پہ ساهت هیالی تہ ءَ بس وتی مهروان ءِ گمان بیت کہ باریں بدواه ءِ زندان ءَ چون انت باریں ورگ ءِ دیگ بیت اگاں نا — باریں چنچو لَٹ کُٹ کنئگ بوهگ ءَ انت زاکر جان ءِ مات گُشیت منی زندے کُل وشی زاکر جان انت منی زندے همک کتره بس زاکر جان ءِ نام ءَ انت ابیدے زاکر جان ءَ منی زند ءَ هچ وشی نیست پہ من اے امروز چو تهاریں کبر ءَ انت منی زندے رُژنائی زاکر جان ءِ گوناپ ءِ دیدار انت-
بلے گوستگیں دوازده سال انت اے مات ءِ واهگ سرجم نہ بوتگ زوراکانی سِنگیں دل انگہ آپ نہ بوتگ بلے زاکر جان ءِ مات ءِ توکل هم انگتہ مهکم انت پہ وتی چُک ءِ هاترا اے مات انگہ وتئی ارسیگیں چماں گوں زوراکانی دیم ءَ اوشتاتگ ءُ آهاں جُست کنگ ءَ انت کہ منی چُک زاکر مجید کُجا انت منی چُک ءَ واتر بیاریت-
زاکر جان ءِ گناه ءُ میار بس همیش انت کہ وتئی راجی بزگی ، دِرتہ پُچی ءُ گُژنگی ءِ مار اِتگ وتئی راجی اُگبالانی پد جنئگ ءَ درکپتگ زاکر جان ءَ گُشتگ کہ منی راج ءِ تاسپیں بچاں بیگواه مکن اِت منی راج ءِ ورنایاں شهید مکن اِت منی بلوچ مات ءُ گهُارانی اِزت ءَ لگتمال مکن اِت پمیشکا زاکر جان هم بیگواه کنگ ءُ تهاریں زندان ءَ بندیگ کنگ بوتگ-
زاکر جان مرچی پہ وتی بلوچ راج ءِ هاترا گوستگیں دوازده سال انت تهاریں زندان ءَ بندیگ انت. بلوچ راج زاکر جان ءِ واستا توار چِست بکنت زاکر جان ءِ مات ءَ گوں همکوپگ بہ بیت ءُ زورگریں لشکر ءَ اے باور بہ کناهینیت کہ مرچی همک ورناه زاکر مجید اِنت آئی ءِ لیکہ ءُ سَسا مرچی همک بلوچ ورناه ءِ تہ ءَ ھست انت زاکر جان ءِ مات ءَ اے گرانیں ساهتاں بلوچ راج ایوک مہ کنت-
زاکر جان ءِ مکهیں مات ءِ رتکگیں ارسانی مُز ءُ دوازده سال ءِ جُهدے برورد زوت آئی ءَ بِہ رسات انت اے دوازده سال ءِ گرانیں ودارے سپر آسر بات زاکر جان زوت پہ سلامتی واتر بات گوں کُل بیگواهیں بلوچاں-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔