روکپتی بلوچستان ءَ سلاہ بندیں مردمانی تیرگواری ءَ یک مردمے بیران

سر بیتگیں ھالانی رد ءَ روکپتی بلوچستان ءِ دمگ پشین ءَ سلاہ بندیں مردمانی تیرگواری ءَ یک شھری ءِ بیران بیتگ –

بیران بیتگیں شھری ءِ پجار ھمود رند بلوچ ءِ نام ءَ زانگ بیتگ ءُ ھمود ءِ سر ءَ سلاہ بندیں مردماں تیرگواری کرتگ ءُ کُشتگ –

ھالانی تہ ءَ گوشگ بیگ اِنت کہ ھمود گوست ءَ روکپتی بلوچستان ءِ دمگ راسک ءِ نندوک بیتگ کہ اود ءَ وت ما وتی جیڑھانی سر ءَ لڈ اِتگ ءُ پشین ءَ اتکگ بیتگ –

روکپتی بلوچستان ءَ لس مھلوک ءِ گوشگ اِنت کہ ایران ءِ چیریں ادارھانی نیمگ ءَ لس مھلوک ءِ سلاہ بند کنگ ءَ دمگانی سر ءَ کُشت ءُ کوش گیش بیتگ اَنت –

گوستگیں دو ماھانی تہ ءَ تنی وھدی چِل ءُ نُھ کس روکپتی بلوچستان ءَ تیرانی آماچ کنگ ءُ کُشگ بیتگ اَنت –