نبشتانک: کلمانٹ
نبشتہ کار : شاری بلوچ
دی بلوچستان پوسٹ
من وتی لوگ ءِ کارانی کنگ ءَ رند دریگ ءِ دپ ءَ نشتگ اِت آں ءُ آ ھم ھمُک روچیگیں پیم ءَ چہ وتی لوگ ءِ دریگ ءَ گِندگ بوگ ءَ اَت، آئی ءِ دریگ ءَ را ھورت چمّیں دامے جتگ ءُ دام ءِ پُشت ءَ شرّی ءِ سر ءَ زانگ نہ بیت کہ دام ءِ پُشتی مردم چے کنگ ءَ اِنت بلے من ءَ گیشتر گُمان اِنت آ من ءَ چارگ ءَ اِنت من دریگ ءِ دپ ءَ داریں کرسی یے ءِ سر ءَ نشتگ آں ءُ آدینک منی دیم ءَ ایر اِنت کہ من وتی ڈکّیں میداں چارگ ءَ آں، من گِندگ ءَ آں مروچی چہ منی سر ءِ میداں شش ٹال اسپیت ترّ اِتگ، بلے بُندر ءَ چہ کسانی ءَ تھنا یک ٹالے اسپیت بوتگ دگہ دْراہ سیاہ چکیں مید بیتگ اَنت۔
یک برے دل ءَ جیڑ اِت کہ ھمے میداں سیاھیں رنگ بجن کہ سیاہ بہ بنت بلے پد ءَ ھیال کت کہ منی میداں زاناں کَے گِند اِیت ءُ کَے بہ زانت کہ سبا ءِ مید اسپیت ترّ اِتگ اَنت، چے ءَ کہ گُشان ءِ چیر ءَ ھچ زانگ نہ بیت کہ چے اسپیت ءُ چے سیاہ، یکے مارا ھمے گُشان اِنت بیست ءُ چار کلاک ءَ مئے سر ءَ ڈُول ءُ بَد اِنت ھر کجا ءُ ھر جاہ ءَ بہ باں یاکہ آگاہ باں یا واب اِے گُشان مارا سر ءَ کنگی اِنت۔ بلے پد ءَ دل ءَ جیڑ اِت گُشان ءَ مارا ھمنچو تاوان داتگ ھمنچو نپ، گُشان ءِ نپ ھمیش اِنت کہ اسپیتیں میدانی ٹالاں وَ چیر دنت ءُ مردم ءِ مزن اُمری ءَ چیر دنت، بلے چو نہ اِنت کہ من مزن اُمرے ءَ آں ءُ آ دگہ ھبرے مئے ھمساھگ من ءَ کلمانٹ گُش اَنت، منی ھیال ءَ من وَ کلمانٹے نہ آں بلے ھمساھگانی دپ ءَ آپے بہ دار اِیت۔
وھدے کہ من ءَ سیزدہ سال اَت پہ من دو مردم ءِ گْواجار آتک آ وھداں من آروس نہ لوٹ اِت وانگ لوٹ اِت، منی مستریں بْرات ءَ کمو ونتگ اَت دنیا ءِ رسم ءُ دوداں سرپد اَت منی مکن کنگ ءَ من ءَ آروس ئِے نہ دات من ءَ داں تبک دَہ ءَ وانگ ءَ اِشت ئِے بلے پد ءَ منی وانگ بند بوت، وھدے کہ من ءَ ھژدہ سال اَت پہ من ءَ یک مردمے ءِ گْواجار آتک کہ آ گْواجار دیوک کساس پنجاہ سالی یے اَت ءُ آئی ءَ دو جنین پیسر ءَ ھست اَت، کہ منی بْرات ءَ نہ زرتگ اَت، من دل ءَ وش اِتاں کہ منی بْرات ءَ شرّیں کارے کتگ اَت، ھو منی اُمر ءَ تھنا بیست ءُ پنچ سال اِنت کہ من کلمانٹ گُشگ بہ آں ءُ ھپت سال اِنت پہ من ءَ گْواجارے نئیت، چو نہ اِنت کہ رنگ ءُ دانگ ءَ من ھرابینے آں البت رنگ ءُ دانگ ءَ کمو جوڑ آں بلے بلوچ ءِ دَود اَنت کہ کسانیں جنککُاں سُوریگ کنت، ءُ نوک سُوریگاں کلمانٹ کن اَنت۔
من دریگ ءِ دپ ءَ نِشتگ اِت آں آ ھم ھما پیم ءَ وتی لوگ ءِ دریگ ءِ دپ ءَ نشتگ اَت ءُ من ءَ گڑ ءُ منجے ءِ تہ ءَ دَور ئِے داتگ کہ من نہ زانت آ من ءَ چارگ ءَ اِنت یا دگہ کارے ءَ اِنت۔ من آئی ءَ چارگ ءَ اِت آں کہ دشت ءِ لواریں گْوات ءَ کشّگ بنا کُت ءُ من ءَ وتی بُنکی مرزبومیں ھاک گْوادر ءِ نمبیں گْوات ءِ چاڑاں زُرت بلے پد ءَ من کُھتیگ بوت آں کہ مشکل پد ءَ گْوادر ءَ بہ گند آں-
لھتے سال بیت کہ گْوادر ءِ لوگانی بھا کنگ ءَ رند ما گوں وتی کھول ءَ اِد ءَ دشت ءَ آتک ایں۔ یک کپّانے ءِ تہ ءَ کشّ پہ کشیں دو گِس اِت اَنت کہ یک گِسے ما باڑا ءَ زرت ءُ دومی گِس ءِ تہ ءَ کپان واجہ نشتگ، من شُت لوگ ءِ گْواتو (پنکاہ) چالو کنگ لوٹ اِت کہ تبدیں لوار سارت بہ بیت بلے لائین بے گواہ اَت من پد ءَ آتک آں دریگ ءِ دپ ءَ کرسی ءِ سر ءَ نشت آں گُڑا آئی ءَ چار اِت ءُ من دیست آ انگت دریگ ءِ دپ ءَ نشتگ اَت بلے آئی ءِ دریگ بُن اَت ءُ آ کندان ءُ گْوشان اَت کلمانٹ کلمانٹ کلمانٹ دانکہ بے توار بوت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔