نبشتانک: مسلمان مُلکانی شتلی(مُناپکت)
نبشتہ کار: ابدلستار بُگٹی
دی بلوچستان پوسٹ
ھر چیزے چہ بُندر ءَ چارگ بیت انچوشکہ اگاں یک مات ءُ پِتے ءِ چُک وان اَنت ءُ ڈاکٹر یا توری انجینئر جوڑ بہ بنت گُڑا چاگِرد ءِ تہ ءَ ایشانی مات ءُ پِت ءِ نام وژنام بیت بہ گِند ئے ھرکسے ایشانی مات ءُ پت ءِ ستا کنان ءَ گْوش ایت کہ اِے سرپد ءُ زانتکاریں مردم اِت اَنت پمیشکا وتی زھگ اش وانینتگ اَنت۔
چوناھیگا پہ دروری ءَ مئے بلوچ راج ءِ تہ ءَ انچیں بازیں بزگیں دِھکان ءُ پوریاگِر ھم ھست ءُ انگت بے کساس گِندگ ءَ ھم کا اَنت کہ آیاں وتی نیزگاری ءُ بزگی سگ اِت ءُ وتی چُک وانینت ءُ ڈاکٹر ءُ ڈاکٹر جوڑ کُتگ اَنت۔ ھمے پیم ءَ اگاں کسے ءِ چُک رھزن، دُزّ ءُ ڈُنگ بنت یا دگہ ناشرکاری ءِ راہ ءَ بہ رو اَنت گُڑا ھرکس ایشانی مات، پِت ءُ ٹکر ءِ سروک ءِ میار دنت کہ ایشی ءِ پِت ھم دُزّے اَت پمیشکا زھگ ئِے ھم دُزّ اِنت مات ءُ پِت ءَ وتی زھگاں شَریں ھیل ءُ بلدی نہ داتگ پمیشکا مرچی وت ءَ ھم بدنام اش کُتگ گُڑا ھمے بدکاری ءِ مُزّ ناں کہ ایوک دُزّ ءُ ڈُنگ ءِ کھول ءَ اندوھے ءِ آماچ کنت بلکیں سرجمیں چاگِرد ءُ راج ءَ بدیں سانے دنت ھمے ڈول ءَ توری یک وانگجاھے بہ بیت یا توری شھدربرجاہ ءُ زانشجاھے بہ بیت اگاں ھمے ترامگیج جْوانین اَنت گُڑا دربُرتگین ھم جْوانین بنت اگاں ترامگیج ھراب بنت گُڑا لازُم آیانی دربُرتگیں مردم نابود ءُ بے سوتین بنت۔ ما تچک بِہ بَہ ایں کہ ھر چیزے ءِ جْوناھی ءُ شَری چہ بُندر ءِ جوڑ بیت ءُ ھر چیزے ءِ راست درشان کنگ ءَ منّانک ءُ شاھدھی دیگ لوٹ ایت البت چہ پوتاری ءَ تھنا لھتیں ناسرپد پہ وھدے ءَ رد دیگ بنت بلے راستی انگت چیر دیگ نہ بیت۔
نی چیز روچ بیتگ کہ پلستین ءِ گازہ شھر ءَ اسرائیل ءِ بالیگراب ٹوھیں جنگی اُرشاں کنگ ءَ انت چیریشی ءَ بازیں پلستینی زالبول، کماش، چُک ءُ زھگ ھم شیھد بوُگ ءَ اَنت گُڑا ماں چاگِردی رسانکدر ءَ ھرکسے ءِ دپ ءَ ھمیں یکے جوریں ٹَوک ءُ زھرشانی انت کہ اسرائیل دنیا ءِ ناشرکاریں مُلکے! بِہ گِند ئے اگاں ما چَہ کسے ءَ منّانک ءُ شاھدھی لوٹ ایں کہ باریں چون مارا سرہدی بہ دے اِت کہ کُجام ھساب ءِ تھنا اسرائیل ناشرکاریں مُلکے؟ زاناں اِے تُرکی، سھودی اَرب، امارات، کتر پاکستان ءُ ایراک چی ءَ ناشرکار نہ اَنت؟ گُڑا یک تُرکی ءِ پیسبُک یوزرے ءَ من ءَ دنیا ءِ نامداریں ھالار الجزیر نیوز ایجنسی ءِ لِنکے روان دات ایشی ءِ تہ ءَ ھمے درشان اَت کہ میان اُستمانی گل ایو این سیکورٹی کاونسل ءِ یک سرھال ءُ شُمارانی رِد ءَ ماں بیست سال ءَ اسرائیل ءَ سے ھزار پلستینی شھید کُتگ بزاں میانجی ئیں شُمار 0.4/ یک روچ پلستینی اسرائیل ءِ دست ءَ کُشتگ بُوگ اَنت۔
گُڑا من ءَ آئی ءِ مجگی نادْراھی ءِ سر ءَ بزگی بوت ءُ آئی ءَ ھمے یو این سیکورٹی کونسل ءِ شُمارے چہ الجزیر ءَ تندجاہ ءَ زُرتگ راہ دات، ماں آئی ءَ درشان اَت کہ ھمُک روچ ترکی وتی زیردستی کُردستان، شام، کوہ کندیل، آجوئیں شامی کُردانی بازیں دمگ ءُ شام ءِ تہ ءَ وتی کاسگ چٹّانی کارمرزی ءَ، سھودی ارب ءِ سرکماشی ءَ چِل ءُ سے مُلکانی گل بزاں اَرب تپاکی لشکر (اَرب کولیش پورس) ءُ امارات ءِ سُنی بھر ءِ ساوتھ ٹرانزیشنال کونسل ءِ سِلاھبندیں گل ءُ الکائدہ اَربئین پنسلہ ماں یمن ءَ، ایران ءِ کاسگ چٹّ ماں اوگانستان، ایراک ءُ شام ءَ، ازب اُلہ گل ماں لیبنان شام ءُ لیبیا ءَ، تُرکی ءِ کاسگ چٹّیں گل ھم لیبیا ءَ، پاکستان ءُ ایران ءِ کاسگ چٹّ ماں اوگانستان ءَ بزاں میانجی ئیں شُمار 197.6/ روچ، مسلمان ھر روچ چے ھمے مُلکانی ناشرکاری ءَ مِر ایت۔ گُارا تو یک پلستینی شھر گازہ ءِ یک کُنڈے ءِ بارہ ءَ ٹوک کن ئے!؟ زاناں ما بے ھال ایں کہ اِے یمن، شام، ایراک، لبییا، اوگانستان ءُ کُردستان ءِ ھمُک دیمروئی کُتگیں شھر ءُ میتگ سرجمی ءَ کَے ءَ تباہ کُتگ اَنت؟ وھدیکہ ھمے مسلمان مُلکانی جنگ ءِ آماچ بوتگیں لس مھلوک ءَ پہ وتی جانانی رکینگ ءَ لڈّ ءُ بوج کُت انت گُڑا ھمے ارب مسلماناں ایشاں پناہ نہ دات ھمے رستریں مُلکانی جنگ ءِ زدگیں دْراھیں مسلمان انگریز ءُ کاپَر مُلکاں سربیتگ اَنت گُڑا اِے زاناں اسلامی مُلک گْوشگ بنت ءُ ایشانی سرکاری رھبند ھم اسلامی اَنت؟ جھان ءِ دومی مستریں جنگ ءَ رند 1988 ءَ مسلمان مُلک ایراک ءَ کُرد دمگ البجاہ ءَ کُرد مسلمانانی سر ءَ جوریں بمب ھور ڈول ءَ گْوارینت ءُ کُردانانی چُکچینی کُت ءُ اوگانستان ءَ چِل سال اِنت مسلم ھمساھِگیں مُلکانی کاسگ چٹّ وتی مسلمانیں چُک ءُ زالبولانی سر ءَ جنگی اُرش ءُ وتکشی بمب تراکاں کن اَنت اِے زاناں چہ اسرائیل ءَ کم ناشرکار اَنت؟
مستریں ٹوک ایش انت کہ دْراھیں مسلمان وتی شتلیں ملکی رھشُوناں نہ چار اَنت انچوشکہ ترکی ءِ تیب اردگان مُدام پوتاری کنت ءُ وت ءَ مسلمانی رھشُون گْوش ایت ترکی ڈرمھانی کشگ ءَ کُمک کنت ءُ وتی راج ءِ مھلوک ئِے مُدام رد داتگ کہ من اسلام ءُ مسلمانانی پھریزوک آں بلے ھمے تیب اردگان وتی سرکاری لشکر ءَ ھچ جنگ ءَ دور نہ دنت بلکیں بلکیں ھمساھِگیں مسلمانیں مُلکانی ھلاپ ءَ اسلامی ناشریں گلاں پہ وتی راجی پائدگ ءَ کارمرز کنت انچوشکہ مسلم مُلک شام ءِ بیگری ءَ تُرکی ءُ کتر ءِ کاسگ چٹّیں گل ایپ ایس اے (پری سیریان آرمی) کہ آئی ءِ جنگی مول ءُ مراد بشارلھسد ءِ سرکار ءَ پْروش دیگی انت تھریر الشام ءُ دومی ھمے تُرکش اسلامک پارٹی(ٹی آئی پی) شام ءِ ناشرکاریں جھادی سِلاھبندیں گلے کہ ایشی ءِ تہ ءَ گیشتر باسک چینی آیوگر مسلمان اَنت۔ بِہ گِند ئے شام ءِ اُلسی جنگ ءَ اِے ناشرکاریں گل ءِ یک مزنیں کِردے ھم ھست کہ ایشی ءِ رھشُون اوگانستان ءُ پاکستان ءَ چیروکائی نِندوک اَنت ءُ ایشی بُندری جھاد ءِ ششت چین اِنت
ایس ٹی بی (سیریان ترکمین برگیڈ) کہ آئی ءَ یونائیٹد ترکمین آرمی ھم گْوش اَنت تُرکی ھمے گل ءَ بے کساس جنگی ءُ زَری کُمک کنت ھاسکن شام ءِ آزات ھیالیں کُردانی ھلاپ ءَ تُرکی دُور جنوکیں میزائیل ءُ دِگہ جنگی آسراتیاں بے کچ ءَ دنت ئِے۔
اگاں النُسر ءَ پرنٹ ءَ بِہ گِند ئے کہ گوں شامی الکائدہ گل ءَ ھمگرنچ اِنت، شامی اُلسی جنگ ءِ یک جھادی سِلاھبندیں گلے کہ ایشی ءَ ھم تُرکی کُمک کنگ ءَ اِنت۔
ھمے داب ءَ لیبیا ءِ تہ ءَ کرنل کداپی ءِ ھلاپ ءَ سِلاھبندیں گل لیبیا شیلڈ پورس وڑیں گل کُتگ انت ئِے کہ آیاں لیبیا الُسی جنگ ءِ بے کساس بیرانی ودی کُتگ ھاس بُنجاھی شھر ٹریپولی ءُ دگہ بازیں شھرے تباہ کُت اَنت بلے نی یھودیانی کسانیں مُلک اسرائیل کہ وتی مسلماناں شھید کنگ ءَ انت گُڑا اِد ءَ ھمے دْراھیں لگور چُپ اَنت بس وتی مسلمانی کُشگ ءَ ھرکس شیر اِنت۔ ارب یک راجے کہ اربی ایشانی زُبان اِنت سرجمیں ارب مھلوک ءِ دود، رواج، ربیدگ ءُ پوشاک یک اَنت بہ گند ئے پلستینی ھم ارب اَنت بلے اِے لگوریں چِل ءُ سے مُلکانی ارب کولیشن پورس یھودی ءِ ھلاپ ءَ جھاد نہ کنت بلکیں وتی مسلمانی کُشک شپ داں روچ تیار انت ءُ بازیں مُلکے ھم اِے گناہ ءَ شریدار انت ایران ءُ ازب اُلہ کہ اسرائیل ءَ وتی مستریں دژمن لیکھ انت مرچی بزگ ءُ چُپ اَنت۔ اوگان تالبان ءَ وت ءَ پھر ءُ ناز ءَ جھادی گلے گْوش ایت آئی ءَ یک سالے سرجم بوت کہ ایسائی کاپریں گل نیٹو ءُ امریکہ ءِ لشکر سر ءَ اُرش نہ کنگ ءِ منّگ نامھے ءِ سر ءَ رازِیگ بوت بلے پہ سرکار ءِ لالچ ءَ وتی اوگان بْرات ءُ گْوھارانی کُشگ ءَ گلائیش انت بلے انگت اسرائیل ءُ ھلاپ ءَ جھاد ءَ نہ رو اَنت لھتیں دِگہ لگوریں مُلکانی نام ھم نبشتہ کنگ شَر نہ انت۔
تچکیں ٹوک ایش انت کہ پلستین ءِ آجوئی ءَ ارب مسلمان اسرائیل ءِ ھلاپ ءَ جنگ ءَ تُرس اَنت اِے شتلانی رِد ءَ جھاد شام، لیبیا، یمن ءُ اوگانستان ءَ ھلال ءُ روا اِنت چی ءَ کہ پہ پلستین، چین ءِ ھلاپ آیوگر مسلمانی آجوئی ءُ کشمیر ءِ واست ءَ جنگ ءَ ایشانی دست ءُ پاد لرز انت۔
نی ما یک چیزے ھورت بہ چار ایں کہ ھندوستان، نیپال ءُ سری لنکا اِے دْراہ ھندو مُلک اَنت اِے وت ماں وت چی ءَ جنگ نہ کن اَنت؟ یورپ ءِ ایسائی مُلک چی ءَ وت ماں وت جنگ نہ کن اَنت؟ بے ھُدائیں ملک (کمیونسٹ اسٹیٹ) انچوشکہ چین، کوریا، جاپان، روس، سربیا، بیلھروس ءُ دگہ اِے وڑین چی ءَ وت ماں وت جنگ نہ کن اَنت۔ اپریکہ ءِ ایسائی بہ بنت یا توری زِرباری امریکہ ءِ ایسائی مُلک بہ بنت چی ءَ وت ماں وت جنگ نہ کن اَنت؟ ءُ مسلمان مُلک چی ءَ وت ماں وت شپ داں روچ جنگ ءَ انت وتی جِند ءِ مسلمان کشگ ءَ انت؟ چی ءَ وتی شھر ءُ میتگاں تباہ کنگ ءَ انت؟-
کسے توری منّ ایت یا مہ منّ ایت پمیشکا یورپ ءُ سرجمیں دنیا گْوش ایت کہ بلکیں اسلام رَد انت انچوشکہ من وتی نبشتانک ءِ بُندر ءَ گْوشت کہ چیز چہ بُندر ءَ چارگ بنت بلے من گْوش آں اسلام رَد نہ اِنت اسلام سد در سد راست انت ءُ اسلام یک امن ءُ سلامتی ءِ نیکراھے بلے اِے جنگ ءُ جیڑھانی آسر ھمے شتلیں مسلمان رھشُون اَنت اگاں مسلماناں وتی اسلام دوست انت گُڑا وتی شتلی ءَ بند بہ کن اَنت ءُ پیسر وتی شتلیں سرکارانی ھلاپ ءَ سِلاہ چِست بہ کن اَنت۔انچوشکہ کُران مجید ھم شتلانی بابت ءَ گْوش ایت “شتل (مُناپِک) جھندم آس ءِ بُنی انگراں بنت ءُ پہ آیاں ترا ھچ کُمکّارے نہ رس ایت۔”
(کُران4:145)-
بزاں امریکہ، چین، ھندوستان ءُ اسرائیل ءِ سر ءَ زھر کنگ ءَ پیسر مُسلمان وتی شتلی ءَ بچار اَنت ءُ وتی شتلیں مُلکی رھشُونانی ھلاپ در بیا اَنت ھو ما منّ ایں کہ اسرائیل زالمے بلے تیوگیں وتگڑیں مسلمانانی مُلک بے گیرت اَنت ءُ باید اِنت ھمے مسلمان وتی مُلک ءِ سرکار ءِ سر ءَ زھر ءُ زھرشانی بہ کن اَنت۔ اگاں اِنّا گُڑا ھمے وتگڑیں مسلمان دلجم بہ بنت کہ مسلمان ھر وھد ءَ اسرائیل، چین ءُ امریکہ ءِ دست ءَ لٹ ور انت ءُ دنیا ءِ تہ ءَ ایشانی ھچ شرپ ءُ نامے نہ بیت بُندری ءَ اسلام ءُ مسلمانی مستریں دژمن ھمے وتگڑ ارب بادشاہ ءُ مسلمان مُلکانی لگوریں رھشُون اَنت کہ ھمے دْراہ امریکہ ءُ اسرائیل ءِ کُمکّار اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔