روکپتی بلوچستان ءَ ایرانی لشکر ءِ تیرگواری ءَ یک زھگے بیران

سر بیتگیں ھالانی رد ءَ روکپتی بلوچستان ءِ دمگ پھرہ “ایرانشھر ” ءَ ایرانی لشکر ءَ تیرگواری کرتگ ءُ یک زھگے کُشتگ –

گیشیں ھالانی رد ءَ تیرگواری ءِ وئیل پھرہ ءِ ھند مھمد آباد ءَ بیتگ کہ اود ءَ کسان سالیں زھگے ایرانی پھزداراں تیرگواری کرتگ ءُ کُشتگ –

بیران بیتگیں زھگ ءِ پجار میثم ناروی ءِ نام ءَ زانگ بیتگ کہ تامر بندانی تہ ءَ گندگ بیت اِنت زھگ مات ءِ چنکان اِنت ءُ انساپ ءِ تواراں پِر جنگ ءَ اِنت-

وئیل ءَ پد مھلوک ءَ زھر درشان کرتگ ءُ دگانی سر ءَ زھرشانی کرتگ –

ھمے وڑ ءَ روکپتی بلوچستان ءَ تپاکی راجمانی گل ءَ اے وئیل ایر جتگ ءُ سیستان و بلوچستان ءَ بلوچ مھلوک ءِ برجاھیں زوراکیانی درچ کرار داتگ –

تپاکی گل ءِ سازمان ءِ گوشگ اِنت کہ میثم ناروی ءِ سر ءَ بیوکیں تیرگواری ءَ بلوچ راج سرجم ءَ سوگیگ ءُ پرسیگ اِنت ءُ چریشی ءَ پیسر ھم بازیں زھگ مرتضیٰ، حسنا، رویا، مھمد، غفور جدگال ءُ دگہ بازیں زھگ ایرانی لشکر ءِ تیرانی آماچ کنگ ءُ کُشگ بیتگ اَنت –

تپاکی گَل ءِ گوشگ اِنت کہ چوشیں وئیلانی پژدر ءَ تپاکی گل زھر ء درشان کنت ءُ اے وڑیں وئیلانی بگیری ءَ پشت ما پُشت ءَ توار چِست کنت –

چاگردی رسانکجاھاں روکپتی بلوچستان ءَ ایرانی لشکر ءِ تیرگواریاں زھگانی بیرانی یکشل ءَ آیگ ءَ اَنت پھرہ، دزاپ، چھبار ءَ پیسر ءَ ھم چوشیں وئیل دیم ءَ اتکگ اَنت اے جاھاں تنی وھدی لھتے سالانی تہ ءَ ھشت زھگ تیرانی آماچ کنگ ءُ کُشگ بیتگ اَنت –

روکپتی بلوچستان ءَ انسانی ھکانی گل ھم چوشیں وئیلانی پژدر ءَ گوشگ ءَ اَنت کہ بلوچستان ءَ ایرانی لشکر انسانی ھکانی لگتمالی ءَ کنگ ءَ اِنت باید آ اُستمان ءُ میان اُستمانی انسانی ھکاں سرگوز مہ کنت –