بلوچستان: تیرگواری وئیلاں زالبولے ءَ ھوار چار مردم بیران

تیرگواری وئیل شال ءُ مستونگ ءَ دیم ءَ اتکگ اَنت شال ءَ پولیس ءِ تیرگواری ءَ یک مردمے بیران، مستونگ ءَ لوگواجہ ءَ وتی زال ءِ ھمراھی ءَ یک مردمے کشتگ ءُ پنجگور ءَ یک جونے دزکپتگ –

سر بیتگیں ھالانی رد ءَ بلوچستان ءِ بنجاھی شھر شال سریاب دگ ءَ پولیس ءَ یک گاڑی ءِ سر ءَ تیرگواری کرتگ ءُ یک مردمے کُشتگ ءُ یکے زدگ کرتگ –

پولیس ءِ رد ءَ گاڑی ءِ دست دیگ ءَ گاڑی نہ اوشتاتگ ءُ چریشی ءَ ایگل اسکواڈ ءِ کارندھاں گاڑی ءِ سر ءَ تیرگواری کرتگ ءُ چریشی ءَ یک مردمے بیران بیتگ ءُ یکے زدگ بیتگ – بیران بیتگیں مردم ءِ پجار فیضان جتک ء میر داد مھمد جتک ءِ نام ءَ زانگ بیتگ –

وئیل ءَ پد مھلوک ءَ دگ بند کرتگ ءُ زھرشانی بندات کرتگ ءُ کوشکارانی دزگیری ءِ لوٹ کرتگ –

چاگردی رسانکجاھاں شنگ بیتگیں تامربندے ءَ وئیل بیران بیتگیں فیضان جتک ءِ برات ءَ گوشتگ کہ منی گاڑی اوشتوک بیتگ ءُ پولیس ءَ آئی ءِ سر ءَ تیرگواری کرتگ ءُ منی برات کُشتگ –

آئی ءِ رد ءَ مپت ءِ ھدا منی برات کُشگ بیتگ ءُ منی برات ءِ کوشکاریں کارندہ گرگ ءُ سزا دیگ بہ بیت –

ھمے درگت ءَ بلوچستان ءِ سرکار ءِ جارکش لیاقت شاھوانی ءَ سریاب دگ ءَ ناگتی پولیس ءِ تیرگواری ءَ ورنا فیضان جتک ءِ بیرانی ءُ آئی ءِ ھمراہ ءِ زدگ بیگ ءِ پدردی درشان کرتگ –

آئی ءَ گوشتگ کہ پولیس ءِ مزنیں واک اے وئیل ءِ بارہ ءَ پَٹ ءُ پول کنگ ءِ پرمان کرتگ –

ھمے وڑ ءَ مستونگ ءَ لوگواجہ ءَ تیرگواری کرتگ ءُ وتی زال ءِ ھمراھی ءَ دگہ مردم ءِ کُشتگ –

گیشیں ھالانی رد ءَ مستونگ کھڈکوچہ ءَ لوگواجہ ءَ تیرگواری کرتگ ءُ وتی زال ءِ ھمراھی ءَ دگہ یک مردمے کُشتگ، وئیل ءَ پد لیویز کارمنداں کوشکار ءِ دزگیری ءِ پرمان کرتگ –

ھمے وڑ ءَ پنجگور ءَ تیرسپتگیں جون ءِ دزکپتگ –

پنجگور ءَ رکشان کور ءَ یک تیرسپتگیں جون ءِ دزکپتگ کہ آئی ءِ پجار گل شیر ء عبدالباقی ءِ نام ءَ زانگ بیتگ –

دمگی مردمانی رد ءَ گل شیر لھتے روچ ءَ پیسر دمگ ءَ پرکاریں چیریں ادارھانی چیردستی ءَ جوڑ کرتگیں “ڈیتھ اسکواڈ ” ءِ مردماں رھوت کرتگ ءُ وتی گور ءَ لوٹائینتگ چریشی ءَ آ بیگواہ بیتگ ءُ گوستگیں روچ ءَ آئی ءِ تیرسپتگیں جون رکشان کور ءَ دزکپتگ –

زانگ بہ بیت گوستگیں بازیں دو روچانی تہ ءَ پنجگور ءَ تیرگواری وئیلاں اے سیمی مردم اِنت کہ بیران بیگ ءَ اِنت کہ چریشی ءَ پیسر سلاہ بندیں مردمانی تیرگواری ءَ بلوچی زبان ءِ شائر فضل شیر ءِ مستریں برات ءِ ھمراھی ءَ یک کسے جنگ بیتگ اِت اَنت –

سیاسی مردمانی گوشگ اِنت بلوچستان ءَ ریاست ءِ نیمگ ءَ ڈیتھ اسکواڈ برجم کنگ بیتگ ءُ چریشی ءَ لس مردمانی کُشت ءُ کوش ءُ آوارجنیاں اے ٹولی دزمانجن اَنت –