شال ءَ بیگواھیں مردمانی ھاتر ءَ زھرشانی برجاہ

بلوچستان ءِ تہ ءَ اے وھدی درساں گیش ورنا نشانگ کنگ بوگ ءَ انت بلوچستان ءَ پیسلہ سازی نوں پوج یا آئی ءِ جھلی ادارہ کنگ ءَ انت- ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد روچ سرجم بوتگ – چہ ڈیرہ غازی خان ءَ عبدالستار بزدار، نور محمد، عزیز اللہ بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں نودربر رھشون زاکر مجید بلوچ ءِ مات ءَ بنجل ءَ اتکگ ءُ زاکر مجید ءُ بیگواھیں زاھد کُرد بلوچ ءِ ھاتر ءَ زھرشانی نبشتہ کنائینتگ –

زاکر مجید بلوچ ءِ مات ءِ گوشگ ات کہ اسلام آباد ءِ زھرشانی ءَ دو ماہ پرگوستگ کہ اود ءَ پاکستان ءِ انسانی ھکانی وزیر ءَ مارا باور کنائینتگ کہ شمئے بیگواھیں مردم یل کنگ بنت بلے روچ مروچی ھچ وڑیں گامگیج زورگ نہ بوتگ –

آئی ءِ گوشگ ات کہ مئے زھگاں ھچ وڑیں گناہ نہ کتگ اگاں آھانی سر ءَ بھتام ھست گڑا پاکستان ءِ آمیدگس ھست انت آ ھمود ءَ آرگ بہ بنت –

آئی ءِ گوشگ ات کہ پت وتی راج ءِ ھدمتکارے بوتگ آئی ءَ وانگ جاہ ءُ دگہ ادارھانی جوڑ کنگ ءِ ھاتر ءَ جھد ءَ بوتگ بلے آ ھم گچین کاری ءِ روچ ءَ کُشگ بوتگ منی گوما اے ریاست بازیں ناھکی کنگ ءَ انت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ پاکستان ءِ جوڑ بوگ ءَ بہ گر تاں روچ ء مروچی پاکستانی پوج ءَ بلوچستان ءِ تہ ءَ پنچ رند ءَ پوجی لشکر کشی کتگ بلوچستان ءِ مردم ھچبر ھک دیگ نہ بوتگ انت – انسانی ھکانی گل مدامی رپورٹ دے اَنت کہ بلوچستان ءِ ھر کنڈ ءُ دمگ ءَ نودربر ءُ دگہ سُرپرانی چیردیگ پوجی بنجل جوڑ کرتگ انت کہ اود ءَ آ بندیگ کنگ بنت ءُ آھاں ٹارچر کنگ بیت –

ماما قدیر بلوچ ءِ گوشگ ات کہ دوھزار ءُ یک ءَ چہ بلوچستان ءَ مزنیں کساسے ءَ پوج ساڑی انت ءُ آئی ءِ نیم پوجی ٹولی ایف سی ءَ بلوچستان ءِ تہ ءَ ایمنی ءِ نام ءَ کنٹرول ءُ پولیس ءِ پاور وتی دست ءَ کتگ –

آئی ءِ گوشگ ات کہ بلوچستان ءِ تہ ءَ اے وھدی درساں گیش ورنا نشانگ کنگ بوگ ءَ انت بلوچستان ءَ پیسلہ سازی نوں پوج یا آئی ءِ جھلی ادارہ کنگ ءَ انت – انسانی ھک نہ بنت، سیاسی جیڑہ یا دیمروئی یا سیکورٹی ھرجاہ ءَ پوجی اسٹبلشمنٹ دزمانجنی کنگ ءَ انت –