آزمانک: برھنگیں ارواہ
آزمانکار:بلال بھار
دی بلوچستان پوسٹ
آ مُدام گوں وتی بندیگیں ارواہ ءَ تہاریں کوٹی یے ئِے تہ ءَ نشت ءُ سگریٹ ئِے کش اِت وتی بُن داتگیں سگریٹ ئِت چارت ءُ گوں وتا ھبر ئِے کُت بلئے دوشی آ سک بے چاڑ ءُ بے تاھیر اَت گوں وت ءُ گوں وتی ایوکی ءَ بے کساس ھبر کنگ ءَ اَت وتی اندر ءَ انچو بیگواہ ات کہ آئی ءَ نزانت کہ آ چے کنگ ءَ اِنت- بلئے آ بے سمائی ءَ گُشگ ءَ ات کہ، شپ کوراسیں دیدگانی تہ ءَ واب اِنت زند گوات ءِ چنکان اِنت گوات گوں ارواہ ءَ بندیگ اِنت، بلَے ارواہ! ارواہ برھنگ اِنت، برھنگی سِتر ءِ میان ءَ لونجان اِنت، آ دمانے ءَ ھاموش بوت، ارواہ ترا جُستے بکناں؟ تو پہ کے ءَ جون ءَ یلہ دے ءُ کجا رو ءَ ئِے مئے وڑیں جوناں تو پہ کئی ھاتر ءَ قبرانی میار کن ئے؟-
ھاھاھا—ھو تو وت برھنگی ءَ بال کن ئے ءُ رو ءَ ئِے مارا اسپیتیں پوشاکاں گور ءَ دے ھمے دانک ءَ گوں آ ھاموش بوت دمانے ءَ پد آئی ءَ پد ءَ وتی نیم توامیں گپ بِنا کُت اَنت, ھردیں کہ چماں نز کن آں تئی شکلّیں یات ءُ وت ساتکگیں زھیر من ءَ بے تاھیر کن اَنت ءُ من چہ سما ءَ بے سما باں، دل گُش ایت کہ زھیراں زہر مانریچ ءُ وت ءَ آجو کن پد ءَ زندگی ءِ سرگوْستگیں یاتاں چہ زبھر ءُ بے بھر بو، بلے پد ءَ من جیڑاں کہ ھُدا ءِ داتگیں بالاد ئِے چے میار اِنت؟آ وتی دوستگیں مردم ءُ دوستدار ءَ بے کساس ءَ یات کنگ ءَ ات آئی ءَ وتی چم پہ ادارکے ءَ بند کُت اَنت ءُ گشت ئِے منی زرد ءِ تلب! مرچی تئی یاتانی تہ ءَ اجب رنگیں وسواس اَنف مان اَنت تو سک گِیر پیداکے، پدردیں زھیرانی تہ ءَ من ءَ ہمے گُمان بوگ ءَ اِنت کہ نوں من چہ وت ءَ درامد بوھان آں، ھو درامد! تو سرپدے کہ درامدی چہ سیادی ءَ جِتا ءُ گِستا ءَ اِنت بلے درامدی ءِ تہ ءَ ھم مھر ھست، ھما مھر کہ مرگ ءَ گوں زند ءَ ھست، مرگ زند ءَ وتئی امبازا زوریت ءُ زند چہ جھان ءَ آجو بیت، بگندے زاھری لوٹ ءُ تلب زند ءَ بدل بکَن اَنت, بلئے باتنی مارشت ءُ واھگ انگت ھما اَنت کہ پیسرا بوتگ اَنت, تو سرپدے کہ اے دل پہ تو چنچو شید ءَ اِنت کدی کدی اے دل گُش ایت تئی یات ءُ ترانگاں بزور ءُ زند ءَ چو کیپ ءَ کمار کن ءُ وت ءَ ھنوش بکن پد ءَ چہ زند ءَ بے آشنا بو، بلئے پد ءَ من جیڑاں کہ بے آشنائی دمانے ءَ پد گار بیت, پد ءَ زند چون گوّز ایت ھو اے ھبر ہم راست اِنت کہ زندگی سفرے، بلَے اے ھم راست اِنت کہ اے سفر ءَ نہ منزلے ھست نہ کہ آسر، بس روان اِنت تا مرگ اناگت ءَ آئی ءِ چم دوئیں لنکوکانی شَم ءِ نیم زندیں سگریٹ ءِ سر ءَ کپت اَنت, سگریٹ ءِ گُڈی ساہ پشت کپتگ اَت سگریٹ مرگ ءِ کنڈا رس اتگ اَت, آئی ءِ دوئیں لنکُک سگریٹ ءَ سوتکگ اِت اَنت بلئے آ انچوں بے سماہ اَت کہ آئی ءَ وتی لنکوکانی سوچگ ءِ ھم سما ھم نہ بوتگ اَت آ بے سما ءَ نشتگ اَت چم ئِے گوں سگریٹ ءِ کپتگیں پُراں سک داتگ اِت اَنت, سھتے ءَ پد سگریٹ ءِ پُر آئی ءِ چمانی دیم ءَ گوات ءَ بال دات اَنت ءُ آئی ءِ لنکوکانی شَم ءِ سگریٹ ءَ ھم ساہ داتگ اَت, سگریٹ ءِ مرگ ءَ آ سک پدّرد بوت ءُ گُشگ ءَ لگ اِت, زند چو سگریٹ ئِے ءِ پُراں بے مانا ءَ اِنت, ھر دیم ءَ گوات کش ایت وتی بالاد ءَ گوات ءِ میار کنت ءُ گُش ئے کہ ملکموت ءِ کاسدے اَتکگ ءُ ارواہ پہ ٹہل ءُ نازے وت ءَ سینگارگ ءَ اِنت چہ منی بدیں جون ءَ درآیگ ءِ واستا سک بے تاھیر اِنت ہمے گالاں گوں آئی ءَ وتی چم نز کُت اَنت ءُ بچکندیت ئِے ءُ گُشت ” منی ارواہ تو انگت ءَ برھنگ نہ بوتگ ئے –
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔