ڈیرہ اللہ یار ءَ آس لگگ ءِ سوب ءَ بیست ءَ گیش گِس سُتکگ اَنت

سربوتگیں ھالانی رِد ءَ بلوچستان ءِ دمگ ڈیرہ اللہ یار ءَ میر دوران خان کھوسہ میتگ ءَ لین ءِ تارے سِدگ ءُ کپگ ءَ بیست دھکانکارانی گِس سُتکگ ءُ پُر بوتگ انت –

گیشیں ھالانی رِد ءَ مروچی چار شمبے ءَ میر دوران خان کھوسہ میتگ ءَ گوات ءِ تیز بوگے سوب ءَ لین ءِ تار سستگ انت ءُ دھکان کار ءِ گِس ءِ سر ءَ کپتگ اَنت چریشی ءَ دھکان ءِ گِس بُنگپتگ ءُ آس ءِ برانزاں دومی دھکانکارانی گِس ھم گپتگ ءُ چریشی ءَ کساس بیست ءَ چہ گیش گِس ستکگ ءُ پُر بوتگ اَنت –

بزگر ءُ دھکان کاراں وتی کمک ءِ وت زِلّوانی سر ءَ آپ کشیتگ ءُ آس توسینگے جُھد کُتگ- بلے انگت آھانی وس ءَ نبوتگ –

ھال ءِ سربوگ ءَ جعفرآباد ءِ ڈپٹی کمشنر رزاق خان خجک ءَ ڈیرہ اللہ یار ءِ میونسپل فائر برگیڈ چیف افیسر سلیم خان ڈومکی آس کُشگے ھاتر ءَ ھال کُتگ –

ڈیرہ اللہ یار میونسپل کمیٹی فائر برگیڈ ءَ وت ءَ وئیل جاہ ءَ سر کُتگ بازیں ادار ءَ پد آس توسینتگ –

اے درگت ءَ دمگے زمیندار میر دوران خان کھوسہ ءِ گوشگ انت کہ آس لگگ ءِ سوب ءَ مئے دھکان کارانی گِس ءُ آھانی وردنی ءُ دگہ سامان سُتکگ انت ، دھکان کار اے گرمی ءَ بے سر ءُسامانی نشتگ ءُ ھکومتی کمک ءِ ودار ءَ انت، دمگی انتزامیہ ءُ صوبائی حکومت ءَ لوٹ ایت کہ اشانی تاواناں پُر بہ کنت ءُ اشاں کمک بہ کنت –