تمپ ءَ فھد پنام ء نواب ءِ کوش ءِ زمہ واری بی آر اے ءَ منّ اِتگ

اے ریاستی چاریگ پاکستانی پوج ءُ ڈیتھ اسکواڈ ءِ چیر دستی ءَ بازیں چاگردی سلکاریاں ھوار بوتگ – بیبگر بلوچ

بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشانی ءَ گوشتگ کہ مئے سرمچاراں پنچ مارچ ءَ کیچ ءِ دمگ تمپ ءَ نھنگ کؤر ءَ ریاستی چاریگ فھد پنام نواب ء چاکر جھمنند ملانٹ تیرگواری کتگ ءُ کشتگ ءُ آئی ءِ سِلاہ اوں دستیگ کتگ انت۔

آئی ءَ گوشتگ کہ فھد پنام نواب باجو بوتگیں سرمچارے بوتگ کہ دوھزار ءُ ھژدہ ءَ زورگیریں پوج ءِ دیم ءَ سِلاہ دؤر دیگ ءَ پد بلوچ زرمبشت ءِ بگیری ءَ تَچک ءَ کار کنگ ءَ بوتگ- اے ریاستی چاریک پوج ءُ کشندہ ٹولی ءِ چیردستی ءَ پوجی لشکر کشیانی میان ءَ آجوئی لوٹوکیں سنگتانی گِسانی پیشدارگ ءَ ابید بازیں دگہ چاگردی سلکاریاں تچک ءَ ھوار بوتگ –

جارکش ءَ دیمتر ءَ وتی درشان ءِ تہ ءَ گوشتگ کہ ایشی ءَ پیسر ھم ما آئی ءِ کھول ءِ مردم آئی ءِ سلکاریانی درگت ءَ سھیگ ءُ سرپد کتگ اَنت ءُ آئی ءَ چہ بلوچ دژمنی ءَ مکن کنگ ءِ لوٹ ھم کتگ، بلئے آ چہ وتی کتکاریاں پدکنز نہ بوتگ-

گڈسر ءَ بی آر اے ءِ جارکش ءَ چہ لَس مھلوک ءَ لوٹ کتگ ءُ گوشتگ کہ آ چہ چاگردی بدواہ ءُ ریاستی چاریگاں وت ءَ دور بہ دار اَنت پرچا کہ آ ھر کجا مئے نشانگءِ تہ ءَ اَنت-