سرکار وتی کرتگیں زبان ءَ زوت سرجم بہ کنت – بی ایس سی اسلام آباد

بلوچ اسٹوڈنٹس کونسل اسلام آباد ءَ وتی شنگ کرتگیں درشانی ءَ گُشتگ کہ پنجاپ ءِ سرکار ءِ کرتگیں مسام ءِ سرجم نہ کنگ ءَ ترندی ءَ ایر جن آں ءُ سرکار زوت ءَ چہ زوت پنجاپ ءِ جتائیں شھرانی شھدربرجاھاں ٹرایبل ایریاز، ڈیرہ گازی ھان ءُ راجن پور ءِ نودربرانی اسکالرشپس ءُ سیٹاں بہ دنت ءُ وتی کھولاں سرجم بہ کنت –

آئی ءَ وتی بیان ءِ تہ ءَ گوشت: گوستگیں سال ءِ اگست ءِ ماہ ءَ بلوچ اسٹوڈنٹس کونسل ملتان ءَ بلوچستان ءَ اتکگیں نودربرانی اسکالرشپس ءِ بھالی ءُ ٹرائیبل ایریاز، ڈیرہ گازی ھان ءُ راجن پور ءِ نودربرانی واستا اسکالرسپس ءُ سیٹانی لوٹ کنان ءَ چِل روچ ءُ شپاں بھاولدین زکریا یونیورسٹی ملتان ءِ دیم ءَ زھرشانی بنجل جتگ ءُ جشتگ –

آئی ءَ گوشت: کہ چِل روچاں ھچ کس جست ءُ پرس کنوک نیتکگ اَنت گڑا نودربراں ملتان داں لاھور ءُ پد ءَ اسلام آباد ءَ پندی روانک ءِ جار جتگ، وھدیکہ لاھور ءَ روانک سر بیتگ گڑا نودربراں گورنر کارگس ءِ دیم ءَ نندانک جتگ ءُ نشتگ اَنت اود ءَ سرکار ءِ نمائندگاں بلوچستان ءِ نودربرانی واستا سیٹ ءُ اسکالرشپس ءِ بھالی ءَ سَے روچ ءِ زبان داتگ ءُ داں انگت ءَ سرجم نہ بیتگ –

بلوچ کونسل ءِ جارکش اسلام آباد ءَ گوشت کہ بلوچ نودربر کجا ھم بہ بنت آ ھروھد ءَ وانگ ءُ زانگ ءَ دور ءُ گِستہ کنگ ءِ کوشش بیگ ءَ اِنت – ھرکجا ما بلوچ وتی بنکی ھکانی واستا زھرشانی کنگ ءَ گندگ بہ ایں ھمود ءَ آ مارا وانگ ءَ دور کنگ ءِ جھد ءَ کن اَنت –

جارکش ءَ بیان ءِ گڈسر ءَ گوشت کک بی ایس سی اسلام آباد بلوچ اسٹوڈنٹس کونسل ملتان ءِ تونسہ شریپ زھرشانی ءُ چاگردی رسانکجاھاں کارمرد کرتگیں کمپین ءِ پلامرزی ءَ کنت –