بلوچستان جتا جتائیں وئیلاں جنکوے ءَ ھوار چار مردم بیران، نُھ ٹپی

سربوتگیں ھالانی رِد ءَ بلوچستان ءِ دمگ سبی ، کوھلو، پشین، نوکنڈی ءَ دگ ءِ وئیلاں چار مردم بیران بوتگ اَنت ءُ ھشت ٹپی بوتگ اَنت، وھدیکہ دکی ءَ اشکرانی کاریز ءِ وئیل ءَ یک کاریز کارے ٹپی بوتگ-

گیشیں ھالانی رِد ءَ بلوچستان ءِ دمگ سبی ءَ دگ ءِ وئیلے ءَ کسانیں چُکے ءَ ھوار دو مردم بیران شش ٹپی بوتگ اَنت –

ھالکارانی رِد ءَ بلوچستان ءِ دمگ سبی ءَ بختیار آباد ءِ نزیک ءَ دو کسانیں گاڑی ءَ ڈیک وارتگ، ڈیک ورگ ءِ سوب ءَ کسانیں جنکوے ءَ ھوار دو مردم ھما دمان ءَ بیران بوتگ اَنت، وھدیکہ زالبولاں ھوار شش مردم ٹپی بوتگ اَنت –

ٹپی ءُ بیران بوتگیں مردم ھما دمان ءَ دمگی نادراھجاہ بی ایچ یو ءَ برگ بوتگ انت – ٹپی بوتگیں مردمانی جاور نگیگ گوشگ بوگ ءَ انت – بختیار آباد لیویز پورس ءِ گیشیں پٹ ءُ پول برجاہ انت –

بلوچستان ءِ دمگ کوھلو ءَ ھم دگ ءِ وئیلے ءَ دو مردم ٹپی بوتگ اَنت –

پولیس ءِ رِد ءَ کوھلو ءَ میر چنگیزآباد ءِ نزیک ءَ شال شھدگ ءِ سر ءَ تیز رؤگ ءِ سوب ءَ گاڑی ءَ موٹر سیکلے ڈیکر کُتگ، چریشی ءَ چُک ءُ پت ٹپی بوتگ اَنت –
ٹپی بوتگیں مردمانی پجار محمد رفیق ءُ محمد خیر ءِ ناماں چہ بوتگ انت – پولیس ءَ ٹپی بوتگیں مردم دست گپتگ ءُ کوھلو ءِ نادراھجاہ ءَ سرکتگ انت – ڈرائیور ھمراہ ءِ گاڑی ءَ تتکگ ءُ شُتگ –

ھمے وڑ شال پشین ءَ کوچ ءُ مازدہ گاڑی ءَ ڈیک وارتگ چریشی ءَ یک مردمے بیران بوتگ –

پولیس ءِ رِد ءَ وئیل شال ءِ دمگ بوستان ءَ دیم ءَ اتکگ کہ کوچ ءَ گوں مازدہ گاڑی ءَ ڈیک وارتگ، چریشی ءِ آسر ءَ عبدالشکور نامی ئیں مردمے بیران بوتگ –
پولیس ءَ بیران بوتگیں مردمے جون دست گپتگ دمگی نادراھجاہ ءَ سر کتگ اژدری چار ءُ ٹپاس ءَ پد جون کھول ءِ ھوالگ ءَ داتگ –

دگہ وئیلے ءَ بلوچستان ءِ دمگ نوکنڈی کلی گریب آباد ءَ دیم ءَ اتکگ کہ زمباد گاڑی ءَ موٹر سینکل سوار ءِ ڈیکر کتگ چریشی ءَ موٹر سینکل سوار بیران بوتگ –

بیران بوتگیں مردمے پجار نسیم ء عبدالعزیز جھمنند نوکنڈی بازار ءِ نام ءَ بوتگ کہ زمباد گاڑی ءِ ڈیکر کنگ ءَ سک باز ٹپی بوتگ، کہ آر ایچ سی نادراھجاہ ءَ برگ بوتگ ٹپ درمان کنگ بوتگ انت پہ گیشیں الاج ءِ ھاتر ءَ دالبندین ءَ برگ بوتگ انت کہ نیم راہ ءَ ٹپانی درد نہ سگتگ ءُ بیران بوتگ-

دومی نیمگ ءَ بلوچستان ءِ دمگ دکی ءَ اشکرانی کاریز ءَ ھاک کپگے سوب ءَ یک کاریز کارے ٹپی بوتگ –

کاریز کار ءِ پجار عزت اللہ ء سعد اللہ جھمنند افغانستان ءِ نام ءَ بوتگ، ٹپی بوتگیں مردم ھما دمان ءَ کاریز ءَ چہ کشگ بوتگ ءُ دمگی نادراھجاہ ءَ برگ بوتگ – ٹپانی درمان کنگ ءَ پد پہ گیشیں الاج ءِ ھاتر ءَ بلوچستان ءِ بنجاھی شھر شال ءَ دیم دیگ بوتگ –