جائو ءَ پاکستانی پوج ءِ لشکر کشی، بازیں کچے ءَ مردم بیگواہ

سر بیتگیں ھالانی رد ءَ جائو ءِ کوھی دمگ سورگر ءَ گوستگیں چار روچاں پاکستانی پوج ءِ لشکر کشی برجاہ اَنت ءُ چریشی ءَ بازیں کچے ءَ مردمانی بیگواھی ءِ ھال اِنت ءُ آوار جنگ بیتگیں مردمانی تہ ءَ سیزدہ کَسانی نام دیم ءَ اتکگ اَنت –

گیشیں ھالانی رد ءَ جائو ءِ کوھی دمگ سورگر ءَ پاکستانی پوج ءِ زمینی لشکر ءِ ھمراھی ءَ برزی ءَ بالگراب ھم گون اَنت ءُ کوھی دمگاں گن شپ ھیلی کاپٹرانی سر ءَ کمانڈوز ایر گیجان بیتگ –

ھالانی تہ ءَ گوشگ بیتگ کہ بازیں جاھاں بمبگواریانی سوب ءَ بازیں کَچے ءَ پس ءُ دگہ دلوتانی زوال بیگ ءِ ھال اِنت ءُ دمگ ءَ الکاپیں دامگانی بند بوگ ءِ سوب ءَ سرجمیں راستیں ھالانی گرگ جنجالانی دیمپانی اِنت –

لشکر کشی ءِ میان ءَ پوج ءِ دست ءَ آوار جنگ بیتگیں سیزدہ کَسانی نام پجار بیتگ اَنت جمل ء قادر بکش، فیض مھمد ء قادر بکش، علی بکش ء قادر بکش، غوث بکش ء مراد، رمزان ء مراد، ارشد ء مراد، ثنا ء اللہ ء مھمد ھسین، منظور اھمد ء مھمد ھسین، یار مھمد ء نورا، مھمد عارف ء اللہ بکش، عبدالواحد ء رسول بکش، چھٹہ ء اللہ یار ءُ رسول بکش ء نورا ءِ ناماں زانگ بیتگ اَنت –

گڈی ھالانی تہ ءَ جائو ءُ مشکہ ءَ پوج ءِ لشکر کشی برجاہ اَنت –

ھمے وڑ بلوچ نیشنل مومنٹ ءَ گوشتگ کہ پاکستانی ریاست بیگواھیں مردمانی جیڑہ ءَ گار کنگ ءِ پد ءَ نوکیں پندل سازگ ءَ اِنت-

ھمے وڑ ءَ بلوچ سیاسی گل بلوچ نیشنل مومنٹ ءِ بنجاھی جارکش ءَ گوشتگ کہ پاکستانی ریاست ءُ پوج ءَ بلوچانی ھلاپ ءَ نوکیں پندل بندات کرتگ اَنت –

آئی ءَ گوشتگ کہ یورپ ءُ امریکہ ءَ میار بندی ءَ شتگیں پاٹی ءِ باسکاں بیگواھی ءِ لڑ ءَ ھوار کنگ اِنت کہ چریشی ءَ آ بیگواھیں مردمانی جیڑہ ءَ دنیا ءِ دیم ءَ گار کنگ لوٹ ایت –

آئی ءَ گوشت کہ پسنی وارڈ نمبر شش ءَ پاکستانی پوج ءَ پاٹی ءِ باسکانی لوگانی سر ءَ بیڑ برتگ ءُ اود ءَ آیانی کھول لَٹ ءُ کُٹ کرتگ اَنت کہ شما پرچا وتی مردمانی واستا زھرشانی کنگ ءَ ئے –

جارکش ءَ گوشت کہ پسھی ءَ کھولاں گوشتگ کہ مئے چُکاں ڈیھ یلہ کرتگ ءُ درانڈیھی زند گوازینگ ءَ اَنت ءُ چریشی ءَ ابید پوج ءَ زالبول جتگ ءُ مباھل ءُ لوگانی پَٹ ءُ پول کرتگ اَنت –

زانگ بہ بیت اے وھد ءَ بلوچستان ءَ بیگواھیں مردمانی آجوئی ءِ واستا گوانک برز بیتگ ءُ بلوچ بیگواھیں مردمانی کھولانی لوٹ اِنت کہ مئے مردماں آمیدگساں پاکستان پیش بہ کنت ءُ یا اگاں نیست اَنت ھم مارا بہ گوش ایت –

زانگ بہ بیت گوستگیں ماہ ءَ پاکستان ءِ بنجاھی شھر اسلام آباد نیشنل پریس کلب ءِ دیم ءَ بیگواھیں مردمانی کھولاں زھرشانی نندانک جتگ ءُ نشتگ اَنت –

چریشی ءَ پد کھول پاد اتکگ ءُ اسلام آباد ءِ دزبندیں دگاں ھواریں دگ ڈی چوک ءَ نندانک جتگ ءُ نشتگ اَنت ءُ اود ءَ آیاں پاکستان ءِ سروزیر عمران خان ءِ آیگ ءِ لوٹ کرتگ اَت –

بازیں روچاں نندانک ءَ پد کھول لاچار بیتگ ءُ پاد اتکگ اَنت ءُ سروزیر عمران خان ءَ زوت ءَ زوت دوچار کپگ ءِ زبان داتگ اَنت ءُ پابزدہ مارچ ءَ بیگواھیں مردمانی بارہ ءَ سرجمیں ھال دیگ بنت –

بیگواھیں مردمانی کھولانی تہ ءَ ڈاکٹر دین مھمد ءِ جنک سمی دین، بیگواھیں شبیر بلوچ ءِ گوھار سیما بلوچ، ھزب اللہ ءُ حسان کمبرانی ءِ گوھار ھسیبہ بلوچ، راشد ھسین ءِ مات ءُ براتزتک، زاکر مجید ءِ مات، نسیم بلوچ ءِ دیشتار ھانی بلوچ، سعید اھمد ءِ مات، مھر گل مری ءِ کھول، وائش فار بلوچ مسنگ پرسنز ءِ سرکماش نصر اللہ بلوچ ءَ ھوار بازیں مردم ھوار بیتگ اَنت –

ءُ ھمے وڑ ءَ گوستگیں روچ ءَ بلوچ دود ءُ ربیدگی روچ ءِ درگت ءَ کراچی ءَ بلوچ یکجھتی کمیٹی ءَ ھم اے روچ بیگواھیں مردمانی کھولانی ھمدردی ءُ بیگواھیں مردمانی یات ءَ داشتگ –

ھمے وڑ ءَ بلوچستان ءَ ھم ازمکاراں اے روچ بیگواھیں مردمانی مات ءُ گوھارانی دگانی سر ءَ نندانکانی پژدر ءَ مراگشاں بھر نہ زورگ ءِ جار جتگ ءُ مراگش نہ بروبری ءَ بیتگ اَنت –

ھمے وڑ ءَ گوستگیں روچ ءَ ھاران ءَ بلوچ دود ءُ ربیدگی روچ بلوچستان نیشنل پاٹی ءِ دمگی سروک شفیق الرحمان ءِ سروکی ءَ بیگواھیں مردمانی یات ءَ دارگ بیتگ –