پنجگور ءَ ناشناسانی تیرگواری ءَ یک مردمے بیران

سر بیتگیں ھالانی رد ءَ پنجگور ءِ دمگ نوکیں بازار چتکان ءَ ناشناسیں مردمانی تیرگواری ءَ یک مردمے بیران بیتگ –

پولیس بنشون ءِ رد ءَ نوکیں بازار چتکان ءَ ناشناسیں دُزاں دُزی ءِ وھد ءَ تیرگواری کرتگ ءُ صغیر اھمد ء غلام جان زدگ کرتگ –

صغیر زدگیں جاوراں چست کنگ بیتگ ءُ نادراہ جاہ ءَ برگ بیتگ کہ اود ءَ آئی ءَ وتی درد نہ سگگ اِتگ ءُ بیران بیتگ –

پنجگور ءَ لس مھلوک ءَ روچ ء رھمان دُزی ءُ ڈنگیانی سر ءَ زھردرشان کرتگ ءُ گوشتگ کہ روچ ء رھمانی دُزی بیگ ءُ مردم کُشگ بیگ ءَ اَنت بلے انتظامیہ واب اَنت –

ھمے وڑ ءَ گوستگیں روچاں تسپ ءِ چار راہ ءَ دُزاں ھم یک پرپٹے ءِ دُزگ ءِ جھد کرتگ ءُ ھمے وھد ءَ دُزاں تیرگواری کرتگ ءُ یک مردمے زدگ کرتگ –

پنجگور ءِ مھلوک ءِ گوشگ اِنت پنجگور ءِ جتا جتائیں ھنداں دُزانی راج اِنت ءُ ٹولی ٹولی اَنت ءُ دُزی ءُ ڈنگی کنگ ءَ اَنت –

لس مھلوک ءِ گوشگ اِنت دُزانی پُشت گیری ءَ سرکار کنگ ءَ اِنت ءُ آیانی سیادی دمگی ڈیتھ اسکواڈ ءَ اِنت –

زانگ بہ بیت گوستگیں سال ءَ تربت ڈنک ءَ دُزاں ھم لوگے ءَ بیڑ برتگ اَت اود ءَ ملکناز نامیں زالبولے کُشتگ اَت ءُ آئی ءِ کسان سالیں جنک برمش زدگ کرتگ اَت –

ملکناز ءِ کوش ءَ پژدر ءَ مھلوک ءَ زھرشانی کرتگ اَت ءُ ملکناز ءِ کوش پاکستانی چیریں ادارھانی چیردستی ءَ جوڑ بیتگیں ڈیتھ اسکواڈ ءِ دمگی سروک سمیر سبزل ءُ آئی ءِ ھمراہ زمہ وار کرتگ اِت اَنت –

ھمے وڑ ملکناز ءِ کوش ءَ پد تمپ دازن ءَ کلثوم نامیں زالبولے چُکانی دیم ءَ آئی ءِ گُٹ برگ بیت ءُ کشگ بیتگ اَت کہ آئی ءِ کوش ءِ زمہ وار ھم دمگی ڈیتھ اسکواڈ ءِ سر ءَ لڈگ بیتگ اَت –

بلوچستان ءَ برجاھیں ڈیتھ اسکواڈ ءِ کارندھانی دزی ءُ کوش برجاہ اَنت ءُ لس مھلوک اے ٹولی ءِ سر ءَ زھر درشانگ اِنت ءُ سرکار ءَ اشانی ھلاس کنگ ءِ لوٹ ءَ کنگ ءَ اَنت بلے تنی وھدی سرکار چوشیں گامگیجے ءِ زورگ ءَ گندگ ءَ نئیت اِنت –