اسلام آباد: سرکار ءِ سدکی، بیگواھیں بلوچانی کھولاں نندانک ھلاس کرتگ

پاکستان ءِ بنجاھی شھر اسلام آباد ڈی چوک ءَ پنچ روچاں برجاھیں بیگواھیں بلوچانی کھولانی نندانک ءَ سرکاری وزیر انسانی ھکانی شرین مزاری ءِ سَدکی ءَ پد نندانک ھلاس کنگ بیتگ –

دی بلوچستان پوسٹ

شمبے ءِ نیمروچ ءَ پاکستان تھریک انساپ ءِ سرکاری وزیر انسانی ھکانی شیرین مزاری ڈی چوک ءَ برجاھیں نندانک ءَ سر بیتگ ءُ اود ءَ آئی ءَ گوشتگ کہ من سروزیر عمران خان ءِ کلوہ پرشما آؤرتگ اَنت آ زوتاں زوت شمارا گوں گند ءُ نند کنت –

آئی ءَ گوشتگ کہ پانزدہ مارچ ءَ گند ءُ نند ءَ سدکی بیت اِنت ءُ اے گند ءُ نند ءَ سیزدہ کھولانی بیگواھیں مردمانی بارہ ءَ سرپدی دنت –

چریشی ءَ پد وائس فار بلوچ مسنگ پرسنز ءِ چیئرمین نصر اللہ بلوچ ءُ نندانک ءَ نشتگیں مردماں ھواریں پریس کانفرنس ءَ نندانک ءِ ھلاسی ءِ جار جتگ ءُ گوشتگ کہ ما ھمے اُمیت ءِ گون ءَ پاد آیگ ءَ اِنت سرکار وتی کول ءَ سرجم کنت –

آئی ءَ گوشت بیگواھیانی بارہ ءَ کانود ءِ رھبند ءُ بلوچستان ءَ بیگواہ بیتگیں مردماں ھوار ھما مردم کہ زندانی تہ ءَ بیران بیتگ اَنت آیانی بارہ ءَ مھکمیں منانک پیش کنگ بیت اِنت –

آئی ءَ گوشت کہ ما اے گپ ءَ رد کن ایں کہ سرکار بہ گوش ایت اے مردم اوگستان ءَ تتکگ ءُ شتگ اَنت –

آئی ءَ گوشت کہ ما ھرچ نامے سرکار ءَ داتگ آیانی بارہ ءَ سرکار مھکمیں منانکاں گوں سرپدی بہ دنت –

نندانک ءَ کھولاں اسلام آباد ءَ سول سوسائٹی ءُ دراھیں انسان دوستیں گلانی منّت گپتگ ےُ گوشتگ کہ مئے گون ءَ ھمایاں کمک کرتگ ما اُمیت کن ایں دیم ءَ ھم ھمے وڑ ءَ کمک کن اَنت –

زانگ بہ بیت بلوچستان ءَ بیگواہ کنگ بیتگیں مردمانی کھول گوستگیں دَہ روچاں اسلام آباد ءَ زھرشانی ءَ بیتگ اَنت، پنچ روچاں اسلام آباد ءِ نیشنل پریس کلب ءِ دیم ءَ نندانک ءَ پد کھول روانک ءِ دروشم ءَ ڈی چوک ءَ سر بیتگ ءُ نندانک ءَ نشتگ اَنت –

ھمے وھداں انتظامیہ ءُ سرکار ءَ آیاں باز براں نندانک ءِ ھلاس ءِدزبندی کرتگ بلے کھولاں سروزیر عمران ءِ آیگ ءِ لوٹ کرتگ وھدیکہ مروچی وفاقی وزیر انسانی ھکانی شیرین مزاری ءِ سدکی ءَ پد نندانک ھلاس کنگ بیتگ –