کراچی ءَ بیگواھیں بلوچانی ھاتر ءَ زھرشانی برجاہ

اگاں یک راجے وتی پرایمنیں جھدے ھاتر ءَ پٹ ءَ کیت گڑا آئی ءَ ھم مزنیں تاکت وتی پوجی تاکت ءِ گون ءَ ھلاس کن اَنت ھمے درست بلوچستان ءَ بیگ ءَ اَنت – ماما قدیر بلوچ

سندھ ءِ مزن شھر کراچی پریس کلب ءِ دیم ءَ وائس فار بلوچ مسنگ پرسنز ءِ زھر شانی برجاہ، زھرشانی ءَ مروچی چار ھزار ءُ دوسد ءُ بیست نُھ روچ سرجم بوتگ، نیشنل پاٹی ءِ کمک سرکماش طاہر خان بزنجو، بلوچ یکجھتی کمیٹی کنوینر مستی خان بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گون ءَ باوست کنان ءَ گوشتگ کہ بلوچ راج ءِ تہ ءَ سرپدی اتکگ، بلوچ وتی راجی سیت، پجار ءُ وتی دوستیگیں مردمانی یل کنائینگ درگت ءَ باز سماھی بوتگ اَنت، بلوچستان ءِ راجداری ءِ تہ ءَ بازیں بدلی اتکگ –

آئی ءَ گوشتگ کہ نی بلوچستان ءَ ھوار پاکستان ءِ مزنیں شھرانی تہ ءَ بیگواھیں مردمانی ھاتر ءَ روانک ءُ زھرشانی بوگ ءَ انت – ادیب، شائر، کلمکار ءُ زانتکاریں مردم، راجداریں باسک پُرایمنیں جھدے رھشونی ءَ کنگ ءَ انت –

ماما قدیر بلوچ ءَ دیمتر ءَ گوشتگ کہ ھما جاہ ءَ کہ زروگپتانی سیادی انت گڑا ھر وڑیں زوراکانی رویش ھمے بوتگ کہ وتی نوک آباکاریں راجی دود، پجار ءُ زبان ءَ وتی ریاستی پالیسیانی رِد ءَ ھلاس بہ کن انت – اگاں یک راجے وتی پرایمنیں جھدے ھاتر ءَ پٹ ءَ کیت گڑ آئی ءَ ھم مزنیں تاکت لوٹ اَنت وتی پوجی تاکت ءِ گون ءَ ھلاس بہ کن اَنت، ھمے درس مروچی بلوچستان ءِ تہ ءَ بلوچ راج ءِ گون ءَ بوگ ءَ انت –

آئی ءَ گوشتگ کہ بلوچ راج ءِ ھاتر ءَ ناکہ اے چیز نوک انت ءُ ناکہ زوراکانی گون ءَ ھیر ءِ امیت ءَ دار انت – مروچی بیگواھیں مردمانی کھول ءُ راجداریں باسک گلانی گون ءَ ھوار بنت پہ زانت پُرایمنیں جھد ءَ دیم ءَ برگ ءَ انت ءُ زوراک ھما پیش ءِ وڑ ءَ جھد ءَ پہ توپک ءِ زور ءَ درگان درگان کنگ لوٹ ایت –