نبشتانک: نمدی یے زاکر مجید ءِ مات ءِ نام ءَ
نبشتہ کار: زهیر بلوچ
دی بلوچستان پوسٹ
لُمہ جان دُراه ءُ سلامت بات ئے –
نزاناں چہ کجا گپاں بندات بکناں چوناھیگا دیر انت کہ پہ تو نمدی ئے نبشتہ کنگ لوٹ اتگ بلئے هردیں کہ نَد ءُ تاک پہ نبشتہ کنگ ءِ هاتر ءَ چِست کتگ انت گُڑا تئی اکس منی چمانی دیم ءَ نکش بوتگ کہ ترا زاکر جان ءِ اکس ما امبازاں گون انت ءُ دگ ءُ کشکانی سر ءَ نشتگ ئے تئی چم ارسیگ انت-
لُمہ جان هردیں کہ من تئی چمانی ارس دیستگ انت گُشے منی سر ءَ آزمان کپتگ ءُ منی ارساں هار کتگ ءُ هما تاک کہ من پہ تو نمدی ءِ نبشتہ کنگ ءِ هاتر ءَ چست کتگ آ تاک منی ارساں میچلینتگ ءُ منا لبزاں دُروهیتگ گوں ارسیگیں چماں بس نَد ءُ تاکے ندارگ چاراِتگ-
لُمہ جان من کجام لبزاں گوں تئی درد ءَ درشان کُت کناں همک مات وتی چُکاں پہ هزار واهگ رودین انت مزن کن انت آهانی مُراداں گندگ لوٹ اَنت تو هم پہ زاکر جان ءَ هزار مُراد ءُ واهگ وتئی دل ءَ داشتگ بلے اے بدواه ءَ تئی دُرسیں مُراد اچ تو پُل اتگ انت 12 سال انت کہ تو وتئی تاسپیں بچ زاکر جان ءِ ودار ءَ نشتگ ئے چنچو درد ءُ تورشت گون اے ودار ءَ بگندے همک کس ماریت مہ کنت بلے کسے اگاں تئی جاگہ ءَ بہ بیت ءُ تئی درد ءَ بماریت گُڑا الم زانت کہ اے آس ءِ سوچگ چنچو گران انت اے ساهگریں ودارے ساهگ ءَ نیندگ چنچو گران انت-
لُمہ جان من هردیں کہ ترا گنداں داں ماراں کہ آسیں لوارے کشئگ ءَ انت تپتگیں ریگزارے ءَ گوں شپادیں پادانی تراولاں دور پیرزالے ودارے درچکے ئے بُن ءَ نشتگ ءُ گوں چمانی ارساں همیں ودارے درچک ءَ آپ دھیگ ءَ انت اے ودارے درچک ءَ گیمرگ ءَ نئیلگ ءَ انت آئی ءِ ارس اے درچک ءَ پہ اوست میزرینگ ءَ انت-
لُمہ جان من زاناں کہ تو سُھب ءُ بیگاه وتی پیژگاه ءَ نیندے ءُ وتی چماں کِشکاں سک کن ئے کہ کد زاکر جان واتر کیت ءُ تو امباز کن ئے ءُ اے 12 سالے جمبوریں ودارے آس ءَ توس اِت لُمہ جان اے اهد زوراکانی دست ءَ انت. انچو کہ 12 سال انت تئی زاکر جان اے زوراکاں اچ تو پُل اتگ ءُ بیگواه کتگ همک روچ تاسپیں بچاں چہ وتی ماتاں پُل اَنت همُک روچ کسانیں چُکانی سر ءَ پِتانی سارتیں ساهگ ءَ پُل اَنت همک روچ گهارانی توکل ءُ تنگوئیں براتاں پُل اَنت همک روچ پیریں پتانی کوپگاں پُل اَنت لُمہ جان جِنگُلے ءَ چینگ دپ ءَ ات اتک شریش ءِ شاه ئِے سر ءَ وتئی کُدو ءِ کِر ءَ نِشت ءُ وتئی دپے چینک ءِ وتئی چُنکیاں دپ ءَ دات انت من همیں ندارگ ءَ چارگ ءَ اوں ءُ تو گیشتر یات پیداک ئے-
لُمہ جان من زاناں تو هم زاکر جان وتئی دستاں گوں وَرگ وارینتگ تو هم پہ مهر ءُ واهگ زاکر جان وتی بانُزلانی ساهگ ءَ رودینتگ ءُ انگہ همیں اُمیت ءِ ودار ءَ نشتگ ءِ کہ پد ءَ وتی دستاں گوں زاکر جان ءَ ورگ واریناں لُمہ جان من زاناں تو هردیں کہ ورگاں دیما کن ئے گُڑا الم جیڑے باریں زاکر جان ءَ ورگ وارتگ بدواه ئے زندان ءَ اگاں نا اے جیڑگ ترا گیشتر ارسیگ کنت ترا گیشتر پدرد کنت-
لُمہ جان تئی مهرانی چراگ 12 سال انت کہ تھاریں زندانانی تہ ءَ وتی راجے رُژناهیں باندات ئِے واب گندگ ءَ انت من سَدکاں زاکر جان ءِ توکل اے تھاریں زندانے سانکلاں الم پروش دنت ءُ وشیانی روچ واتر بنت-
لُمہ جان گپ وا باز انت گُڈی ءَ یک گپے الم گوں تو کنئگ لوٹاں تو ایوک ءَ زاکر جان ءِ مات نہ ئے تو بلوچ راج ءِ مات ءِ تو همک بیگواهیں بلوچ ءِ مات ءِ تو بلوچستان ءِ مات ئِے تئی اے گرانیں ودار الم آسر بیت تئی مهرانی چراگ الم واتر بیت تئی تہاریں کُل پد ءَ رُژنا بیت زاکر جان الم واتر کنت لُمہ جان سلامت باتے مُهکم بات ئے زاکر جان زوت چہ زوراکانی زندان ءَ آجو بات ئے پہ سلامتی واتر بات ئے-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔