نبشتانک: بانک کریمہ ءُ درانڈیھ
نبشتہ کار: ھدایت بلوچ
دی بلوچستان پوسٹ
من مدام ھمے گُشاں ھما مردم کہ ڈنّی ملکاں نشتگ انت آھانی زند سک وش انت آھاں ھچ گم ءُ پریشانی نیست بلے درانڈیھی مرگ ءِ نزیک ءَ انت وتی ھنکین ءَ چہ دور بوگ سک گران انت بلاھیں اوپارے درکار انت ھمک مردم ھمے اوپار ءَ سگ اِت نہ کنت ۔ درانڈیھ ءِ زند ءَ ھما کس ھما دلبند ءَ سگگ ءَ انت کہ آھاں یک بانداتے یک روژنائی یے دیم ءَ گِندگ ءَ کیت درانڈیھ ءَ مردم گم ءُ سکّیاں چون گْوازین اِیت۔
ھنکین ءَ نشتگیں مردم اے چیزاں ھچبر نہ مار ایت
پرچا کہ درانڈیھ ءَ مات گون نہ انت برات ءُ سنگت گون نہ انت پت، ناکو ، ترو ، برات زھگ ءُ ، آ دگہ سیاد وارس ھچ کس مردم پہ چم نہ گند ایت گم ءُ سکّی بلاھیں کوہ انت شاتکامی وشیاں مردم ھچ نہ زانت گوں کے ءَ بھر بہ کنت۔ ائیدانی روچ گیشتر ابیتک بنت ھرچ نیمگ ءَ کہ چم کار کنت بس تجنائی انت ءُ بس۔
ھمل ھیدر ءُ بانُک کریمہ ھمے راہ ءِ مساپراں ھوار بنت ایشاں وتی زند ءِ متا ءُ وشی پہ گلزمیں ءِ باندات ءِ رُژنائی ءَ ندر کُرت انت وھدے ھنکین ءِ نندگ ایشانی واستا بلاھیں دیم پہ دیمی یے جوڑ وت گڑا ایشاں درملکی ءُ درانڈیھی ءِ سگگ ءِ پیسلہ زُرت بلی دژمن ءِ زوراکیانی منّوک نہ بوت انت وھدے ھمل ءُ بانُک درانڈیھ بوت انت گڑا دورءُ دریں راجانی دیم ءَ وتی راج ءِ سر ءَ بوتگیں ھمک زوراکیانی توار جوڑ بوت انت۔
ھمک روچ بلوچ ءِ ژانگولیں جونانی ، بلوچ ءِ مانداشتگیں گِدانانی ، بلوچ راج ءِ سر ءَ بوتگیں ھمک زوراکیانی اکس دست ءَ بوتگ ءُ دگّانی سر ءَ اوشتاتگ ءُ دُگنیا ءَ را پیشداشتگ کہ مئے سر ءَ چینچو کیامت گوزگ ءَ انت ھمے درانڈیھی ءُ ابیتکیں زند ءَ ایشاں پہ وت کہ دگہ ھچ کس نہ دیست گڑا ایشاں وتی زند ءِ کسانیں وشی بزاں آروس ءِ پیسلہ زُرت کہ ما دوئیں درانڈیھ ءَ یک بہ بہ ایں۔
وھدے ایشانی ابیتکیں آروس بوت گڑا ناں کہ ھمل ءَ سنگتے ھارے گور ءَ دیگ ءَ ات ءُ۔۔ ناں کہ دیوان ءُ مراگشے ھست ات
ناں کہ بانُک ءِ دستاں دست گھار ھنی کنگ ءَ ات انت ناں کہ ماہ گنج ءُ مات بانور ءِ کش ءَ نِشتگ ات انت۔ بس یک ابیتکی یے ایشانی میان ءَ ساڑی ات درانڈیھ ءُ ابیتکی ءَ اے کمیں وشی برے برے ایشانی لنٹانی بچکند جوڑ بوت بلے گیشر گوں راجی جیڑھاں دست گٹ ات انت۔
20 دسمبر ءَ من وھدے چہ واب ءَ بُست کُرت ءُ گْوانکو زُرت وھدے وٹس ایپ پچ کُرت داں وٹس اہپ گُش ئے مرچی دگہ رنگے ءَ انت ھمک سنگتے ءِ پروپائل سیاہ انت اشتاپ اشتاپ ءَ چارگ ءَ لگ اتاں کہ باریں چے بوتگ وھدے بانُک ءِ شھادت ءِ ھال دیست گُش ئے منی چم تھار بوت انت دل سک پدرد بوت دل درک درک ءَ جنگ ءَ لگ اِت گْوانکو چہ دست ءَ لگُشت ءُ چمانی ارس دارگ بوگ ءَ نہ ات انت۔۔ سر درد ءَ لگ ات ھنچو سما بوت گش ئے من ءَ بلاھیں بیماری یے گران ات۔
بانک ءِ شھادت ءَ بلوج راج تاوان بار کُت ھمک زندگیں دل ئِے پروشت انت ءُ پدرد کُرت انت تیوگیں بلوچستاں پُرسیگ بوت مھلوک ءَ شال ءَ بہ گر داں گوادر ءَ ھاران ءُ آواران ھمک شھر ءُ بازاراں زوراکانی ھلاپ ءَ زھرشانی بُنگیج بوت مات ءُ گھار دگانی سر ءَ اھت انت گوں وتی کوکار ءُ پریاتاں ھمل درانڈیھ ءَ تھنا بوت لنٹانی سر ءِ کسانُکیں بچکند پہ لنٹانی ھشکی ءُ بیچارگی ءَ بدل بوت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔