شال: کریمہ بلوچ ءِ یات ءَ ڈیوا روک کنگ بیتگ اَنت، بارکھان ءَ ناساڑی ئیں نماز جنازہ وانگ بیتگ

بی ایس او شال ھنکین ءِ نیمگ ءَ پریس کلب ءِ دیم ءَ بازیں کچے ءَ باسک مُچ بیتگ ءُ ڈیوا اش روک کرتگ ءُ کریمہ بلوچ ءِ ستاشانی کنگ بیتگ-

ھمے وھد ءَ بی ایس او ءِ رھشون نمرہ بلوچ ءَ گوشتگ کہ کریمہ ءِ نہ کُٹوکیں جد ءُ جھد ءَ بلوچ راجی زرمبشت ءَ زالبولانی ھوار گیجگ ءَ مزنیں بودیشتے گون بیتگ –

دگہ رھشوناں گوشت کہ بلوچ راجی زرمبشت ءِ واستا کریمہ بلوچ ءَ شپ ءُ روچی جھد ءَ بلوچ زالبول بے تاھیر کرتگ ءُ زرمبشت ءَ پُرکار کرتگ اَنت –

ھمے رنگ ءَ بارکھان کریمہ بلوچ ءِ ناساڑی ئیں نماز جنازہ وانگ بیتگ – ناساڑی ئیں نماز جنازہ ءَ جتا جتائیں پھناتاں سیادی داروکیں مردماں بازیں کچے ءَ بھر زرتگ ءُ کریمہ بلوچ ءِ ابدمانیں جاہ ءِ واستا دوا کرتگ –

ھمے وھد ءَ جتا جتائیں سیاسی باسکاں کریمہ بلوچ ءِ دیمونی ءِ ستاشانی پیش کنان ءَ گوشتگ کریمہ نا ایوک ءَ بلوچ زالبولانی واستا اے دمگ ءَ دراھیں زیردستیں راجانی زالبولانی واستا یک کردمانے بیتگ –

زانگ بہ بیت بلوچ اسٹوڈنس آرگنائزیشن آزاد ءِ گوستگیں سروک کریمہ بلوچ کینیڈا ءِ درانڈیھی زند ءِ گوازینگ ءَ بیتگ ءُ گوستگیں سال ءِ بیست دسمبر ءَ لوگ ءَ درکپتگ ءُ ناگتی بیگواہ بیتگ ءُ دومی روچ ءَ ٹورنٹو پولیس ءَ یک کورے ءِ تہ ءَ کریمہ ءِ جون دزکپتگ –

بلوچ راجدوستیں تکانی نیمگ ءَ کریمہ بلوچ ءِ “ناگتی کوش ” ءَ پاکستانی چیریں ادارہ اش زمہ وار کرتگ اَنت ءُ گوستگیں یک ماھے ءَ بلوچستان ءَ راجدوستیں پاٹی یکشل ءَ زھرشانی کنگ ءَ اَنت ءَ گوستگیں سَے روچاں پیسر وھدے کریمہ بلوچ ءِ جون کراچی ءَ آرگ بیتگ ءُ پد ءَ آئی ءِ بنکی ھنکین تمپ ءَ کَل ءَ کسارت کنگ بیتگ بلوچستان ءَ مکران ءَ جاور ناگیگ بیتگ اَنت ءُ لشکری کارمنداں دراھیں راہ ءُ در بند کرتگ اَنت ءُ سرجمیں مکران ءِ مباھل نیٹورک ھم بند بیگ ءِ ھواری ءَ مھلوک ءِ سُر ءُ پرانی سر ءَ نگاہ ایر کنگ ءُ آیانی تر ءُ تاب ءَ مشکل ودی بیتگ اَنت ءُ بلے سرکاری تکاں اے بھتام رد کنگ بیتگ اَنت، بلے چاگردی رسانکجاھاں اے وڑیں بازیں تامر گندگ بنت کہ مردم کریمہ بلوچ ءِ بنکی ھنکین ءِ نیمگ ءَ روگ ءَ گندگ بیگ ءَ اَنت –

زانگ بہ بیت گوستگیں روچ ءَ بلوچستان ءِ اسمبلی ءَ کریمہ بلوچ ءِ کَل ءُ کسارت ءُ آئی ءِ جون ءِ کمشرپی ءِ سر ءَ اپوزیشن ءُ سرکاری واکدارانی میان ءَ دپ جاک بیتگ اَنت –