بلوچستان ءِ جتا جتائیں جاھاں شش بیگواھیں مردم یل بیتگ اَنت

وائس فار بلوچ مسنگ پرسنز ءِ رد ءَ بلوچستان ءِ جتا جتائیں جاھاں بندوکیں شش بیگواھیں مردم یلہ بیتگ ءُ وتی لوگاں سر بیتگ اَنت –

دی بلوچستان پوسٹ

یلہ بیتگیں مردمانی تہ ءَ ھژدہ نومبر دوھزار ءُ نوزدہ ءَ چہ دشت جت ءَ بلوچی زبان ءِ شائر عبید عارف، بیست ءُ پنچ نومبر دوھزار ءُ ھژدہ ءَ پسنی ءَ بیگواہ بیتگیں امین شکاری ءُ دو سال ءُ نیم ءَ دشت مزن بند ءَ بیگواہ بیتگیں امام اسھاک ھوار اِنت –

وائس فار بلوچ مسنگ پرسنز ءِ رد ءَ عرفان امام بکش جھمنند بلنگور، واھد داد شاہ جھمنند سامی کلگ ءُ منظور ھسین جھمنند میناز بلیدہ ءِ یلہ بیگ ءِ ھال اِنت بلے دمگی واکدارانی نیمگ ءَ اشانی یلہ بیگ ءِ سرپدی ءِ ھالرسانی نہ بیتگ اَنت –

ھالانی رد ءَ دشت بلنگور ءِ جھمنندیں عرفان ء امام بکش گوستگیں روچ ءَ یلہ بیتگ ءُ وتی لوگ ءَ سر بیتگ –

عرفان ءِ کھول ءَ ٹی بی پی ءَ گوں گپ کنان ءَ گوشتگ کہ عرفان یک سالے ءَ پیسر پاکستانی چیریں ادارھاں آوار جتگ ءُ گوستگیں روچ ءَ یلہ کرتگ ءُ لوگ ءَ سر بیتگ –

وائس فار بلوچ بلوچ مسنگ پرسنز ءَ بیگواھیں مردمانی یلہ بیگ ءِ ھال وشی ءِ گُشتگ ءُ امیت درشان کُتگ کہ سالانی سال بیگواھیں مردماں سرکار ءُ ڈیھی گل المی یل کن اَنت –

زانگ بہ بیت بلوچستان ءَ بیگواہ بیتگیں گیشتریں مردم یلہ بیگ ءَ پد مازگی ءُ جان ءَ ناجوڑی ءِ سوب ءَ دیم ءَ نیا اَنت – دومی نیمگ ءَ سیاسی پاٹی ءُ انسانی ھکانی واستا توار چِست کنوکیں مردمانی گوشگ اِنت کہ یک نیمگے ءَ مردم یلہ بنت ءُ دومی نیمگ ءَ بازیں مردم بیگواہ کنگ بنت ءُ چریشی ءِ سوب ءَ بیگواھیں مردمانی بیگواھیانی کچ کمی ءَ ابید ءَ گیش بنت –