شھید بانک کریمہ ءِ جسد ءِ آیگ ءَ کراچی ءَ راجی پھر ءُ شانے ءَ وش اتکے ءَ دیم ءَ روگ بیت – بلوچ یکجھتی کمیٹی تمپ

دی بلوچستان پوسٹ

بلوچ یکجھتی کمیٹی ءِ نیمگ ءَ شنگ بیتگیں جارے ءَ گوشگ بیتگ کہ شھید ءِ وتن بانک کریمہ بلوچ ءِ کرد ءَ ستاشانی پیش کنگ ءِ واستا کراچی ءَ راجی پھر ءُ شانے ءَ وش اتکی ءَ دیم ءَ روگ بیت اِنت ءُ آئی ءِ کَل ءُ کسارت ءَ روانکے ءِ دروشم ءَ شھید ءِ بنکی ھنکین ءَ داں برگ بیت اِنت –

آئی ءَ گْوشت: شھید کریمہ بلوچ ءِ جسد بیست ءُ چار جنوری ءَ یکشمبے ءِ سھب ءِ چار ءَ کراچی ءِ بالی پَٹ ءَ سر بیت اِنت اود ءَ مُچی ءِ دورشم ءَ آئی ءِ دیم ءَ وش اتکی کنگ بیت اِنت –

آئی ءَ دیمتر ءَ گوشتگ کہ کراچی ءَ بالی پٹ ءَ دیم پہ لیاری ءَ سھب ءِ ساھت دَہ ءَ مولی گسمان پارک (بیا ء باغ) ءَ نماز جنازہ وانگ بیت چریشی ءَ پد کَل ءُ کسارات ءَ روانک ءِ دروشم ءَ آئی ءِ بنکی ھنکین تمپ ءَ برگ بیت اِنت-

جارکش ءَ گوشتگ کہ بانک کریمہ بلوچ راجی رھشونے بیتگ آئی ءَ راجی نپانی ھاتر ءَ سیاسی جد ءُ جھد ءِ راہ پہ وت ءَ گچین کرتگ – بلوچستان ءَ سیاست ءِ پرکاریاں آئی ءِ سرڈگار آئی ءِ واستا تنک اتکگ ءُ چریشی ءَ پد آئی ءَ بلوچ راج ءِ واستا کینیڈا ءَ درانڈیھی زند ءِ گوازینگ ءَ لاچار کرتگ –

آئی ءَ گوشت کہ گوستگیں سال ءِ بیست دسمبر ءَ کینیڈا ءِ شھر ٹورنٹو ءَ زانتے ءِ رنگ ءَ کُشگ بیتگ -بانک کریمہ بلوچ ءِ کرد پہ بلوچ راج ءَ ستاشانی اَنت –

بلوچ یکجھتی کمیٹی ءَ بلوچ راج ءَ گوں دزبندی کرتگ ءُ گوشتگ کہ کریمہ بلوچ ءِ جسد ءِ دیم ءَ وش اتکی ءَ زوت ءَ زوت کراچی ءَ سر بہ بنت ءُ شھید ء وتن ءِ دیم ءَ پھر ءُ شانی ءَ وت ءَ جاڑیگ بہ کن اَنت –

زانگ بہ بیت کریمہ بلوچ ءِ “کوش ” ءِ ھلاپ ءَ بلوچستان ءَ ھوار دراں ڈیھاں نشتگیں بلوچ ءُ دگہ راجاں پدردی درشان کرتگ ءُکینیڈا ءِ سرکار ءَ آئی ءِ کوش ءِ درگت ءَ تچکیں رنگے ءَ پَٹ ءُ پول ءِ دزبندی ھم کرتگ –

بلے تنی وھدی آئی ءِ کوش ءِ بارہ ءَ کینیڈا ءِ سرکار ءَ جوانیں گپے بلوچانی دست ءَ نہ داتگ ءُ گوستگیں روچ ءَ چاگردی رسانکجاہ ٹویٹر ءَ ھم آئی ءِ “کوش ” ھلاپ ءَ کیمپئن کارمرد کنگ بیتگ اَت –