کراچی ءَ بیگواھیں مردمانی ھاتر ءَ زھرشانی برجاہ

بلوچستان ءِ تہ ءَ نیکراھی ءِ نام ءَ ناشرکاری ءِ تالان کنگ ءِ بُنکی روتگ پوج ءُ پاکستان ءِ چیریں ادارہ انت- ماما قدیر بلوچ

دی بلوچستان پوسٹ

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ زھرشانی ءَ مروچی چار ھزار ءُ یک سد ءُ نود ءُ شش روچ سرجم بیتگ –

چہ کراچی ءَ پروفیسر ڈاکٹر ریاض احمد، سوشل ایکٹوسٹ نغمہ، وائس فار مسنگ پرسنز آف سندھ ءِ رھشون سسی لوھار ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ پدردی درشان اِتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ما پاکستان ءِ دست ءَ چکچینی ءِ آماچ انت – میان اُستمان ءِ انسانی ھکانی کونسل ءَ یک اوشتے ءِ میان ءَ ایمنسٹی انٹرنیشنل امریکہ ءِ میان استمانی ایڈووکسی ڈائریکٹر ءَ بلوچ راج ءِ بگیری ءَ زورانسری آوار جنی، لٹ ءُ کٹ، کُشت ءُ کوش ءِ پالیسی پاکستانی سرکار ءِ چیردستی گوشتگ اَنت –

آئی ءَ گوشتگ کہ بلوچستان ءِ تہ ءَ نیکراھی نام ءَ ناشرکاری ءِ تالان کنگ ءِ بنکی روتگ پوج ءُ پاکستان ءِ چیریں ادارہ انت – یک نیمگے اے مئے راجی ھک ءُ مئے پرایمنیں جد ءُ جھد ءَ دلگوشی ءَ یکگور کنگ ءَ پرکار انت ءُ دومی نیمگ ءَ مئے جد ءُ جھد ءَ ھلاس کنگ ءِ ھاتر ءَ نیکراھی ناشرکاراں کارمرز کنگ انت – مئے دمک ءُ دراں آھانی ساڑی بوگ سک باز ترسناک انت –

ماما قدیر بلوچ ءَ گوشتگ کہ ما لوٹیں کہ دودمانیں دنیا سرپد بہ بیت ما پاکستان ءِ دست ءَ چکچینی ءِ آماچ انت، ما لوٹیں کہ میان استمانی گل اے گپ بہ پھم انت ءُ اشی ءِ سر ءَ گامگیج بہ زور انت –