چہ عرب امارات ءَ برات ءِ بیگواھی ءُ پاکستان ءِ دست ءَ دیگ ءِ منّانگ ھست اَنت – فریدہ بلوچ

دی بلوچستان پوسٹ

آمید گس ریاستانی ادارھاں جست کنگ ءُ بیگواھیں مردمانی دیم ءَ آرگ ءِ کرد ءَ پیلو کنگ ءَ ابید بیگواھیں مردمانی کھولاں پدرد کنگ ءَ وتگڑیں پیسلہ اشکنائینت،راشد حسین سَے رند ءَ باگی گوشگ آمیدگسی انساپ ءِ رھبندانی مانیارگ اِنت -اے گپانی درشانی بیگواھیں راشد حسین ءِ کھول ءَ کراچی ءِ پریس کلب ءِ دیم ءَ وی بی ایم پی ءِ بنجل ءَ کرتگ اَنت –

بیگواھیں انسانی ھکانی باسک راشد حسین ءِ کھول ءَ گْوشتگ کہ راشد حسین ءَ باگی گوشگ آمیدگسی ءِ آجوئی ءِ سر ءَ بھمانکیں گپے – مئے گور ءَ دراھیں ھما منّانک ھست اَنت کہ چریشی ءَ تچک ءَ پدر بیت کہ راشد حسین چہ امارات ءَ زورانسری گرگ ءَ پد “بیک ڈپلومیسی ” ءِ زور ءَ گیرکانودی ءِ رنگ ءَ پاکستان ءَ آرگ بیتگ –

راشد حسین ءِ گوھار فریدہ بلوچ ءَ چاگردی رسانکجاہ ءَ منّانکانی اکس شنگ کرتگ اَنت ءُ گوشتگ کہ منی برات ءَ تچگ ءِ بھتام جنگ ءُ آئی ءِ زند ءِ واستا گیش ترس اِنت، راشد حسین ءِ دزگیری ءُ پاکستان ءَ آرگ ءِ منّگ وت سی ٹی ڈی کراچی ءُ پاکستانی رسانکدراں کرتگ ءُ اگاں راشد حسین ءَ چیزے بہ بیت گڑا آئی ءِ زمہ وار عرب امارات ءُ پاکستان اَنت –

راشد حسین بلوچ ءِ سر ءَ سی ٹی ڈی کراچی ءِ نیمگ ءَ کراچی ءَ چینی کونسل ھانہ ءِ سر ءَ ارزی نبشتگ کنگ بلے کراچی ءِ ناشری ءِ گر ءُ داریں آمیدگسے ءَ راشد حسین ءَ ھوار پانزدہ مردمانی کیس باگی ءِ نام ءَ داتگ اَنت –

راشد حسین ءِ کھول ءِ رد ءَ راشد حسین بلوچ بیست ءُ شش دسمبر دوھزار ءُ ھژدہ ءَ اماراتی چیریں ادارھانی کارندھاں پاکستان ءِ پرمان ءِ آوار جنگ ءَ پد شش ماہ ءَ پاکستان ءَ آؤرتگ – کھول ءِ رد ءَ راشد پاکستان ءِ چیریں ادارھانی دست ءَ اِنت –

راشد حسین بلوچ ءِ بیگواھی ءِ ھلاپ ءَ راشد حسین ءِ مات ءُ آئی ءِ براتزتک وائس فار بلوچ مسنگ ہرسنز ءِ بنجل ءَ نندانکی زھرشانی ءَ نشتگ اَنت – وی بی ایم پی وائس چیئرمین ماما قدیر بلوچ ءِ رد ءَ راشد حسین ءَ باگی گوشگ ءِ مول ءُ مراد آئی ءِ آمیدگسی انساپ ءَ زبھر کنگ اِنت –

ماما قدیر بلوچ ءَ گوشتگ اَت راشد حسین بلوچ انسانی ھکانی باسکے اگاں عرب امارات راشد حسین ءِ بیگواھی ءُ دیم ءَ آرگ ءَ ھچ رنگیں گامگیج نہ زُرت گڑا ما راشد حسین ءِ کیس ءَ میان اُستمانی آمیدگس ءَ بریں –