امازون پرائم ءِ نوکتریں ھندی سیریز “ٹانڈوو” پانزدہ جنوری ءَ پہ چاروکاں شنگ بیت، اے سیریز ءِ تہ نامی ئیں ازمکار سیف علی خان، ڈمپل کپاڈیہ ءُ سنیل گروّر ھوار اَنت۔
دی بلوچستان پوسٹ
ٹی بی پی اھوالکار ءِ رد ءَ امازون پرائم ءِ نوکتریں سیریز “ٹانڈوو” ھندوستان ءِ سیاسی جیڑھانی سر ءَ جوڑ کنگ بیتگ، کہ اِشی ءِ سوجکار علی عباس ظفر اِنت، ءُ بنجاھی کارستانی تہ ءَ سیف علی خان (سمر پرتاب سنگ)، ڈمپل کپاڈیہ (انورادہ کشور)، سنیل گرور (گُرپال چوھان) ءُ مھمد زیشان ایوب ( شیوا شیکر) ءِ کارست ءَ ھوار اَنت۔
زانگ بہ بیت سیف علی خان چہ اِشی ءَ پیسر ھم نیٹفلیکس ءِ یکیں چہ نامیں سیریز “سیکریڈ گیمز” ءَ ھم ھوار بیتگ ءُ آئی کردار ءِ باز ستاہ کنگ بیتگ۔
اھوالانی رد ءَ ھندی تامر ءُ سیریزانی آنلائن آیگ ءِ سوب ءَ بازیں انچیں تامر ءُ سیریز دیم ءَ اتکگ کہ ایشانی سینیما ءُ ٹی وی ءَ چارگ ھندوستان ءَ چُش ارزان نہ بیتگ اَت۔
ایشانی تہ ءَ “سیکریڈ گیمز” “پاتال لوک” “مرزاپور” ءُ ھمے پیمیں بازیں سیریز ھوار اَنت کہ اود ءَ سینسر شپ ءِ ترُس ءَ ابید گیشتر آزاتی ءَ گوں ازمکاراں وتی ازم ءِ درشانی ءِ موہ رس ایت۔