جلال بلوچ کراچی ءَ روگ ءَ بوتگ ءُ ھب چوکی ءَ چہ بیگواہ کنگ بیتگ۔
دی بلوچستان پوسٹ
سربوتگیں ھالانی ءِ رِد ءَ پاکستانی پوج ءَ بلوچ یکجھتی پتر ءِ باسک چہ ھب چوکی ءَ آوار جنگ ءُ بیگواہ کنگ بوتگ۔
آوار جنگ بوتگیں بلوچ یکجھتی پتر ءِ باسک ءِ پجار جلال بلوچ ء خیر محمد ءِ جاھمنند تمپ سرنکن ءِ نام ءَ بوتگ۔
اھوالکار ءِ رِد ءَ جلال بلوچ کراچی ءَ روگ ءَ بوتگ کہ ھب چوکی ءِ چیک پوسٹ ءِ سر ءَ پاکستانی پوج ءَ العثمان کوچ ءَ چہ ایر گپتگ ءُ بیگواہ کُتگ۔
جلال بلوچ ءِ بیگواھی ءِ ھلاپ ءَ چاگردی رسانکدر ءَ بلوچ جھدکاراں اے بیگواھی ایر جتگ۔
بلوچ چاگردی جھدکار جمال بلوچ ءَ وتی ٹویٹ تہ ءَ گُشتگ کہ کریمہ بلوچ ءِ بُنکی ھنکین ءَ سیادی داروکیں ورناہ کریمہ بلوچ ءِ کوش ءِ ھلاپ ءَ زھرشانی کنگ ءَ پد بیگواہ کنگ بیتگ۔ جلال بلوچ ء خیر مھمد جھمنند سرکن تمپ پاکستانی پوج ءَ چہ ھب بلوچستان ءَ ھما وھد ءَ بیگواہ کُتگ وھدے آ کراچی ءَ روگ ءَ بیتگ۔
جمال بلوچ ءَ گیشتر گُشت کہ یات بہ بیت اے زھرشانی کنوک زھرشانیانی وھد ءَ ھم بیھار دیگ بیتگ اِت اَنت۔
ھمے وڑ ءَ فیض بلوچ ءَ وتی ٹوئٹ ءِ تہ ءَ نبشتگ کہ بلوچ یکجھتی کمیٹی (بی وائی سی) ءِ باسک جلال بلوچ ء خیر مھمد پاکستانی سیکورٹی فورسزاں ھما وھد ءَ چِست کُتگ کہ آ چہ تمپ ءَ کراچی ءَ روگ ءَ بیتگ ءُ العثمان کوچ ءَ سوار بیتگ۔
فیض بلوچ ءَ دیمتر ء گُشت کہ آئی ءَ تمپ ءَ کینیڈا ءَ کُشگ بیتگیں بلوچ رھشون کریمہ بلوچ ءِ کوش ءِ ھلاپ ءَ برجم داشتگیں روانکاں بھر زرتگ اَت۔
بیگواھیں بلوچانی ھاتر ءَ توار چِست کنوکیں گل وی بی ایم پی ءَ ٹوئٹ کُتگ ءُ گُشتگ کہ گل ءَ ھال رس اِتگ بلوچ یکجھتی کمیٹی ءِ باسک جلال بلوچ ء خیر مھمد جھمنند تمپ العثمان کوچ ءَ سوار بیتگ ءُ دیم پہ کراچی ءَ روگ ءَ بیتگ آ پاکستانی گلاں چہ ھب چوکی ءِ چیک پوسٹ ءَ دزگیر کُتگ ءُ بیگواہ کُتگ اے ھال باز پدردی اِنت۔
وی بی ایم پی ءَ سروزیر بلوچستان جام کمال ٹیگ کُتگ ءُ گُشتگ کہ جلال بلوچ آجو بہ کن اِت-