نبشتانک: آ گُٹگیر بیت
نبشتہ کار: رازق سعید
دی بلوچستان پوسٹ
اسل گپ ایش اِنت کہ گِلگ باز بیتگ اَت نرونڈگ باز بیتگ اَت، ھر وھد ءَ چو ھپوگیں جنین آدم ءَ کُکار باز بیتگ اَت دل سیائی گیش بوگ اَت، آ بیزار بوگ ءَ اَت اَنچُش گُمان بوگ ءَ اَت نی ھمے لوٹ کُتگ اَت کہ چو ھپوکیں جنین آدم ءَ نہ رونڈاں دل ءِ ھما تر ءُ مانتراں زَنگاں نبشتہ بہ کناں اَسل ءَ ما وَ ھِچ نہ اِیں نا کہ شریں بُود ءِ اَست ءُ نا کہ دِگہ پَن ءِ اَست اَسل ءَ ما وَ مردُمی جِند نہ اِنت، مردُم بوگی ھما کوالٹی مئے تہ ءَ نیست-
چوناھیگا نی ھمے ارادہ کُتگ اَت کہ دل ءِ زَنگانی ساپ کَنگ ءَ پہ چیز ءِ نِبشتہ بہ کناں گُڑا ھمے تر ءُ مانتر ءَ اَناگہ ءَ یک روچے من نِبشتہ کَنگ بِندات کُت نِبشتانک اَتک نیم راہ ءَ اوشتات من ھرچ وڑ کُت کہ دیما بہ براں ایشی ءَ وتی مِنگ جَتگ اِت اَنت ھچ وڑ رؤگ ءَ نہ اَت من کمیں لاچار بیتاں کَلم چہ دست ءَ ھیر کُت!
سگریٹ چوناھیگا یلا کُتگ اَت اِے ساھت ءَ سگریٹ ءِ سَک تَلب پیداک اَت نزاناں چونکا آدت کُتگ اَت کہ ھردیں کہ لاچار بیتگ اَنت یا کہ چیزے نِبشتہ کنگ ءَ بیتگ آں گُڑا سگریٹ اَلم کَش اتگ اَسل ءَ اِے ساھت ءَ سگریٹ کَشگ گیشتر مَزہ دَنت وھدے کہ من سگریت ءُ لیٹر دَست ءَ کُت آں سگریٹ لاگینت ءُ سُٹ ءِ جَت ءُ کَلم دوبر دَست ءَ کُت نِبشہ کنان اِت اَنت ءُ یک بَرے نِبشتانک پد ءَ اوشت ءِ آماچ بیت، ھنچوش سَما بوگ ءَ اَت کہ نِبشتانک ءَ را زُبان ءِ پِر اَت آ گوں من گپ کَنگ لوٹگ ءَ اَت، ءُ لھمیں آوازے ءَ گوں من ءَ توار ءِ پِرجت ءُ گُشگ ءَ لَگ ایت دانکہ تو من ءَ سرپد نہ بئے ءُ من ءَ نہ پول ءِ گُڑا ھمے رنگ ءَ من اوشت ءِ آماچ باں تو کہ آ وڑ لوٹگ ءَ اِت اَنت تئی تَب ءَ من اَتک نہ کناں-
اَسل ءَ نِبشتانک ءِ واست ءَ من یک کارِست ءِ گچین کُتگ اَت، کارِست ءِ بابت ءَ ھرچی کہ سرپدی اَست اَت نِبشتہ کُتگ اِت اَنت پہ گیشیں نِبشتہ کَنگ ءَ پہ کارِست ءَ گیش سرپدی گِرگ ءِ جُھد ءَ اِت اَنت، گُڑا جُھد کَنان کَنان ءَ کارِست ءِ یک کَسانیں بھر ءِ اَست اَت کہ آ نِبشتانک ءِ تہ کارِست ءِ یک کَسانیں بھرے اَت گُڑا من گوں آئی ءَ پرسنل ھال کُت من میسج کُت! ھال کن؟، من وشاں تو ھال کن؟ اللہ وش بِکنت من پد ءَ گُشت شُکر اِنت اللہ ءِ پد ءَ من آئی ءَ را کارِست ءِ بابت ءَ جُست کُت آئی ءَ یک برے گُشت اِناں اَسل ءَ من ءَ وَ کارِست ءِ بابت ءَ پہ جُست اَلم کَنگی اَت بلے آئی ءَ وتی دَپ داشتگ اَت گُڑا منی کِر ءَ دِگہ ھچ نیست اَت من لاچار بیتاں، آئی ءَ را باور کَنگ ءِ تَگ ءُ تاچ ءَ گُڑا من کارِست ءِ چیز ءِ دانک آئی ءِ کِر ءَ بیان کُت آ یک برے پد ءَ جَل ءُ مَجل ءِ تہ ءَ اَت بے تواری ءَ زُبان ءِ دَر اَتک ءُ گُشت ءِ ھو بیتگ-
منی چَم گوانکو ءِ اِسکرین ءَ سَک اِت اَنت کہ باریں دومی میسج کیت چے گُش ایت کہ چون ءُ چے وڑ بیتگ؟
بلے اِے رندی آ پَد ءَ گُنگ بیت گویاکی ءِ بند بیت اَنچُش سَما بوگ ءَ اَت کہ آئی ءِ لَنکُک میسج ءِ لیکَگ ءَ پہ ھمراداری کَنگ ءَ نہ اِت اَنت زاناں-
من لاچار بیتاں دل ءَ ھزار وھم ءُ گُمان پیداک اَت ھمے سَما بوگ ءَ اَت کہ نزاناں آئی ءَ را منی سر ءَ باوست بیگ ءَ نہ اِنت؟ ھمے گُمان ءِ تہ ءَ دل ءَ گُشت نہ لوٹ اِت نِبشتانک ءِ لیکگے، ڈائیری ءِ دَپ بند کُت ءُ کلم زَھر ءَ زَھر دور دات ءُ نِشت آں، ھمے جُھد کنگ ءَ اِت اَنت کہ وت ءَ بے ھیال بہ کناں اَگاں بے ھیال مَہ باں گُڑا دل ءَ ھزار وھم گُمان پیداک بیت-
ھپتگے ءَ پد ءَ ھمے گُمان کَنگ ءَ اِت اَنت کہ اِے رَندی من باں یا کہ منی کارِست، اِے رَندی پنچ دانگ سگریٹ کِر ءَ ھیر کُتگ اَت ءُ ڈائیری ءُ کَلم دیم ءَ ایر کُت آں ھمے جیڑ اِتگ اَت کہ ھال ءُ اھوال ءَ پد نِبشتانک ءَ ڈولدار کناں ءُ نبشتگ کن آں-سلام ھال کن چون ئے، تو کے؟ رازق، کجام رازق؟ وشاں تو چون ئے اللہ وش بکنت، من وشاں ھمے پھمِ اتگ اَت کہ اِے رَندی اَلم پسہ دَنت من نَزانتگ اَت کہ اِے وت ءَ گُٹگیر کَنگ لوٹگ ءَ اِنت جُست ءَ پد بے توار بیت ھمے سَما بوگ ءَ اَت کہ پہ زانت وت ءَ گُنگ کَنگ لوٹگ ءَ اَت ھمے سَما بوگ ءَ اَت کہ اِے لوٹگ ءَ اِنت کہ من گُٹگیر بہ وت ءَ بے سمائی ءَ گوں کُشگ لوٹَگ ءَ اَت، یک بَرے جیڑ ایت گُش آں منی نِبشتانک ءَ سرجم کَن بہ دے پد ءَ تئی مَرزی اِنت کَدی کہ مِرگ لوٹ ئے؟-
اِے رَندی کارِست ءِ بھر باوست نہ کَنگ ءِ سبب ءَ پہ زانت وت ءَ کُشگ ءَ اَت گُٹگیر کَنگ ءَ اَت، گُمان کَنگ ءَ اِت اَنت کہ آ ھمے پھمگ ءَ اِنت کہ من بے سریں گپ کَنگ لوٹگ ءَ آں بے سریں باوست کَنگ لوٹگ ءَ آں بلے آئی ءَ نزانتگ اَت کہ اِے رَندی من نہ لوٹاں کہ من باوست بہ کناں اَسل ءَ من ءَ آ زِندگ کَنگ لوٹگ ءَ اَت ءُ آئی ءَ چہ دَربرگ لوٹِگ ءَ اِت اَنت، اِے رَندی آئی ءَ وتی ھوری ءَ منی نِبشتہ کُتگیں دانک ھم گُٹگیر کُت اَنت-
اَگہ تو زانتگ اَت کہ تو گُنگ بوگ لوٹگ ءَ اِت گُٹگیر بوگ لوٹگ ءَ اِت گُڑا وتی ھواری ءَ منی نِبشتانک ءُ ڈائیری ءُ کَلم گُٹگیر مہ کُتین اَنت-
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت