شال: مریم نواز مچھ ءِ وئیل ءَ اسرمند بیتگیں مردمانی پدردی ءَ سر بیتگ

دی بلوچستان پوسٹ

مسلم لیگ ن ءِ کسان کمک سرکماش مریم نواز مچھ ءِ وئیل ءَ اسرمند بیتگیں مردمانی گون ءَ پدردی درشان کنگ ءَ بلوچستان ءِ بنجاھی شھر ءَ سر بیتگ، مسلم لیگ ن ءِ رھشون احسن اقبال ءُ پرویز رشید ھم آئی ءِ ھمراہ اَنت –

مریم نواز ءُ دگہ رھشونانی ھمراھی مچھ وئیل ءَ اسرمند بیتگیں رودراتکی شھدگ ءَ نشتگیں مردمانی گور ءَ روت اِنت –

گوستگیں روچ ءَ مسلم لیگ ن ءِ کسان کمک سرکماش مریم نواز ءَ مچھ وئیل ءِ سر ءَ پدردی درشان کنان ءَ گوشتگ کہ ھزارہ برادری ءِ جونانی کل کنگ ءِ دزبندی کرتگ –

چارشمبے ءِ روچ ءَ آئی ءَ وتی ٹویٹے ءِ تہ ءَ گوشتگ کہ آ وتی پِت مھمد نواز شریف ءِ گوشگ ءَ پشمبے ءَ اے دزبندی زیر اِت ءُ وتی گوھار ءُ براتانی گور ءَ روگ ءَ اِنت دانکہ آ وتی دوستیگیں مردمانی جوناں اللہ امان ءَ بہ کن اَنت -.

زانگ بہ بیت چریشی ءَ پیسر پاکستان ءِ تھ ئِے کارانی وزیر شیخ رشید ءُ دگہ وزیرانی تر ءُ تاب ءَ بے سوبی ءِ گپ ءُ تران ءَ پد سروزیر بلوچستان جام کمال ءِ گپ ءُ تران ھم بے سوب بیتگ –

چارشمبے ءِ روچ ءَ ٹوئٹر کلوہ ءَ سروزیر عمران ھان ءَ گوشتگ کہ من وتی مھلوک ءِ اُمیتاں تاوان نہ کن آں،؛ آئی ءَ گوشت کہ مچھ ءَ ناشرکارانی آماچ بیتگیں مردمانی کھولاں گوں دزبندی اِنت آ وتی دوستگیں مردمانی جوناں کل بہ کن انت دانکہ آیانی ارواہ ءَ آسودگی بہ رس اِیت –

آئی ءَ گوشت؛ ھمساھیگیں ڈیھاں بھتام جنان ءَ گوشت ’ ما آیوکیں باندات ءَ چوشیں اُرشانی دارگ ءِ جھد ءَ کنگ ءَ اِنت بلے اے گپ راستی ءِ مئے ھمساھگ اے وڑیں ٹکی ناشریاں گوات دیگ ءَ اَنت –

زانگ بہ بیت بلوچستان ءِ دمگ مچھ ءَ سَے جنوری ءَ یک اُرشے ءَ دَہ کاریزکار کُشگ بیتگ اِت اَنت – اے وئیل ءِ ھلاپ ءَ شال ءَ ھزارہ برادری ءِ نیمگ ءَ گوستگیں پنچ روچاں جونانی ھمراھی ءَ زھرشانی برجاہ اِنت ھمے رنگ ءَ مروچی شال ءَ دربندیں ھرتال کنگ بیتگ –

زھرشانی کنوکانی لوٹ اِنت کہ سروزیر عمران خان شال ءَ بئیت اِنت، اگاں ناں کُشتگیں مردمانی کل ءُ کسارت نہ بیت اِنت –

ھمے رنگ ءَ ھزارہ برادری ءِ کوشانی ھلاپ ءَ اھل تشیع کمیونٹی ءِ نیمگ ءَ کراچی ءَ ھم زھرشانی نندانک برجاہ اَنت –

کراچی ءِ ٹریفک پولیس ءِ رد ءَ ایم اے جناح دگ ءَ چورنگی، نارتھ ناظم آباد ءَ فائیواسٹار چورنگی ءِ واستا شیر شاہ سوری ءِ دگ روگ ءُ آیگی ءَ بند اَنت –

پولیس ءِ رد ءَ کراچی ءِ شھر ءَ نوزدہ جاھاں اھل تشیع کمیونٹی ءِ نیمگ ءَ دگ بند کنگ ءَ نندانک جنگ بیتگ اَنت ءُ پولیس ءَ رؤ ءُ آیوکیں مردماں گوشتگ کہ آ پچیں راھانی نیمگاں دیم ءَ ترینان بہ کن آں ءُ بہ رو اَنت –