کریمہ بلوچ ءِ “کوش”: جرمنی ءُ فرانس ءَ زھرشانی

دی بلوچستان پوسٹ

نامی ئیں بلوچ زالبولانی رھشون ءُ بلوچ نودربر گل آزاد ءِ گوستگیں چیئرپرسن کریمہ بلوچ ءِ ناگتی کوش ءِ ھلاپ ءَ جرمنی ءِ بنجاھی شھر برلن ءُ فرانس ءِ بنجاھی شھر پیرس ءَ کینیڈین سفارتھانانی دیم ءَ زھرشانی کنگ بیتگ –

جرمنی ءِ شھر بنجاھی شھر برلن ءِ مچی یے جاہ کینیڈین سفارت ءِ دیم ءَ بلوچ نیشنل مومنٹ ءِ دزبندی ءَ زھرشانی کنگ بیتگ –

زھرشانی کنوکانی دستاں پلے کارڈز ءُ بینرز چِست بیتگ اَنت کہ آیانی سر ءَ کریمہ بلوچ ءِ ناگتی “کوش ” ءِ ھلاپ ءَ اوگام نبشتگ بیتگ اَنت –

بی این ایم ءِ جرمنی ھنکین رھشوناں کینیڈین ءِ واکداراں دزبندی کرتگ کہ کریمہ بلوچ ءِ کوش ءِ پژدر ءَ تچکیں رنگے ءَ پَٹ ءُ پول بہ کنت – آیاں گْوشت کہ مروچی سرجمیں دنیا ءَ بلوچستان ءَ ھوار دنیا ءِ دراھیں بلوچ انساپ ءِ دزبندی ءَ کنگ ءَ اَنت –

آیاں گوشت کہ پاکستان بلوچ نسل کشی ءِ ھونانی ھار گیش کنان اِنت ءُ نِی درملکاں ھم بلوچ رھشون پھریز بیگ ءَ نہ اِنت –

ھمے رنگ ءَ مروچی فرانس ءِ بنجاھی شھر پیرس ءَ سیاسی باسکاں بازیں کچے ءَ کینیڈین سفارت ھانہ ءِ دیم ءَ کریمہ بلوچ ءِ ناگتی “کوش ” کوش ءِ ھلاپ ءَ زھرشانی کنگ بیتگ –

فرانس ءَ جھمنندیں بلوچ، پشتوناں ھوار دگہ مھلوک ءَ سیاسی باسکاں زھرشانی ءَ بھر زرتگ ءُ کریمہ بلوچ ءِ کوش ءِ پدرد ءُ زھر درشان کرتگ ءُ گْوشتگ کہ کوش بارہ ءَ تچکیں رنگے ءَ پَٹ ءُ پول ءَ بہ کنت ءُ بلوچستان ءَ انساپ بہ دنت – آیاں گْوشت کہ بلوچستان ءَ سیاسی باسکاں تیرجنگ ءُ نشانگ کنگ ءِ دارگ ءَ ابید دنیا ءَ اد ءَ مئے کپتگیں کُنٹاں وئیل گوشگ ءَ اِنت –

زھرشانی کنوکاں دنیا ءَ بلوچ باسکانی پھریزگ ءِ دزبندی کرتگ ءُ گوشتگ کریمہ بلوچ ءِ کوشکارانی گرگ ءَ سزا ءِ سر ءَ آرگ ءِ دزبندی کرتگ –

زانگ بہ بیت کریمہ بلوچ گوستگیں سال ءِ بیست دسمبر ءَ کینیڈا ءِ شھر ٹورنٹو ءَ ناگتی گار بیتگ ءُ دومی روچ ءَ آئی ءِ جون یک کورے ءِ تہ ءَ دزکپتگ –

بلوچستان ءَ ھوار سرجمیں دنیا ءَ زھرشانی برجاہ اَنت باند ءَ جرمنی ءِ شھر گوٹگن ءَ بلوچ سیاسی باسکانی نیمگ ءَ یک روانک ءُ زھرشانی برجم دارگ بیگ ءَ اِنت –