بولان ءُ پنجگور ءَ لشکر کشی برجاہ، جنگل ماندارگ بیتگ ءُ یک مردمے آوار

پنجگور ءَ نمیرانیں مردمانی لوگ ءِ سرا پوج ءَ بیڑ برتگ یک کماش ءِ آوار جتگ، بولان ءَ پاکستانی پوج ءِ لشکر کشی برجاہ، مروچی چارمی روچ ءَ مچھ ءُ بزگر لشکر کشی بوھگ انت ءُ جنگل ماندارگ بیتگ اَنت –

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ دمگ بولان ءَ مروچی چارمی روچ ءَ پاکستانی پوج ءِ لشکر کشی برجاہ، لشکر کشی مروچی بزگر ءُ مچھ ءِ ایندگے دمگاں کنگ بوھگ انت ۔

اھوالکار ءِ رِد ءَ گوستگیں شپ لشکر مزنیں کچ ءِ مچھ ءِ شھر ءَ سربوتگ وھدیکے مروچی کوھی دمگاں ھم لشکر کشی برجاہ انت، لشکر کشی ءَ جنگی بالی گرابانی ھم کمک گون انت –

اھوالکار ءِ رِد ءَ بزگر، گڑانگ، یخو ءُ اُچ کمان ءَ ھوار چپ ءُ چاگردی دمگاں لشکر کشی تھا گیشی آرگ بوتگ – لشکر کشی میان ءَ مارٹر گولہ ھم آس دئیگ بوھگ ءَ انت ءُ جنگی بالی گراباں اے دمگاں شیلنگ ھم کرتگ ءُ اھوالکار ءِ رِد ءَ پاکستانی پوج ءَ لشکر کشی ءِ میان ءَ بولان غربوک ءِ سجاول جنگل مان داشتگ اَنت، دنیگت ءَ ھچ وڑیں جانی تاوان ءِ ھال نیست –

زانگ بہ بیت گوستگیں روچ ءَ شاھرگ ءَ پاکستانی پوج ءَ مزنیں کساس ءَ مھلوک آوار جتگ ءُ بیگواہ کُتگ کہ آھانی تھا سینزدہ مردمے پجار بوتگ –

دومی نیمگ ءَ مروچی پنجگور ءِ دمگ پروم ءَ پاکستانی پوج ءَ نمیرانیں مردمانی گِس ءَ بیڑ برتگ ءُ یک کماش ءِ آوار جتگ –

اھوالکار ءِ رِد گوستگیں شپ ءَ پاکستانی پوج ءَ پنجگور ءِ دمگ پروم کلیری ءَ نمیرانیں ناصر سنجر ءُ نمیرانیں حنیف لال ءِ لوگاں بیڑ برتگ زوراکی کنان ءَ چُک زالبول لَٹ کُٹ کُتگ ءُ زہنی ٹارچر ھم کرتگ انت ءُ لوگ ءِ مستر ءُ کماش آوار جتگ گوں وت برتگ –

آوار جنگ بوتگیں کماش ءِ پجار ناکو واحد بخش ء گھرام نام ءَ چہ بوتگ –