کریمہ بلوچ ءِ “کوش”: بگیری ءَ بلوچستان ءَ ھوار درانڈیھاں زھرشانیانی درچ برجاہ اَنت

گوستگیں روچ ءَ بلوچستان ءِ شھر بسیمہ ءُ یورپی ڈیھ جرمنی ءَ بلوچ یکجھتی کمیٹی ءِ نیمگ ءَ زھرشانی بیتگ اَنت –

دی بلوچستان پوسٹ

زھرشانی کنوکاں کینیڈا سرکار ءِ بنداتی پَٹ ءُ پول رد کرتگ ءُ گوشتگ کہ کریمہ بلوچ ءِ مرگ ھم بلوچستان ءَ سیاسی باسکانی آوار جنگ، زور نشانگ کنگ ءُ زورانسری آوار جنیانی بھر اَنت –

ھمے وڑ گوستگیں روچ ءَ جرمنی ءِ شھر ششٹ گارٹ ءَ بلوچ سیاسی باسکانی نیمگ ءَ کینیڈا ایمبسی ءِ دیم ءَ کریمہ بلوچ “کوش” ءِ بگیری ءَ زھرشانی بیتگ –

زھرشانی ءَ جرمنی ءِ چاگردی زالبولیں باسک انا ءَ ھوار بلوچ سیاسی پاٹیانی باسکاں کینیڈا ایمبسی ءِ دیم ءَ زھرشانی کرتگ ءُ کریمہ بلوچ ءِ کوش ءِ بارہ ءَ تچکیں رنگے ءَ پَٹ ءُ پول ءِ لوٹ کرتگ –

زھرشانی کنوکاں گْوشت کہ راشد ھسین چہ متھدہ عرب امارات ءَ زورانسری بیگواہ، چہ سویڈن ءَ ساجد ھسین ءِ جون دزکپگ ءُ کینیڈا کریمہ بلوچ ءِ کوش ریاستی زُلم ءُ زوراکیانی بھر اَنت –

اے گپ ھم دلگوشی ءِ کہ نامی ئیں بلوچ زالبول رھشون ءُ بلوچ نودربر گل آزاد ءِ گوستگیں چیئرپرسن بانک کریمہ بیست دسمبر ءَ ٹورنٹو ءَ اناگتی بیگواہ بیتگ ءُ دومی روچ ءَ آئی ءِ جون یک کورے ءِ تہ ءَ دزکپتگ –

بنداتی ھالانی تہ ءَ پولیس ءَ کریمہ بلوچ ءِ مرگ ابید کسے ءِ دزمانجنی ءِ ٹاہ داتگ وھدےکہ کریمہ بلوچ ءِ کھول ءَ ھوار بلوچستان ءِ سیاسی ءُ راجدوستیں پاٹیاں پولیس ءِ بنداتی پَٹ ءُ پول رد کرتگ –

زانگ بہ بیت چہ بلوچستان ءَ درانڈیھاں بلوچ رھشون کریمہ بلوچ ءِ “کوش ” ءِ ھلاپ ءَ بلوچستان ءَ ھوار ڈنی ڈیھاں زھرشانی درچ برجاہ اَنت ءُ ھمے وڑ بلوچ یکجھتی کمیٹی ءِ نیمگ ءَ نوکیں سال ءِ بنداتی ءَ دو جنوری ءَ دوبر زھرشانیانی جار پِرینتگ اَنت –

بلوچ یکجھتی کمیٹی ءِ رھشونانی گوشگ اِنت کہ بلوچستان ءِ بازیں جاھاں زھرشانیانی دارگ ءِ ھاتر ءَ بیھاری دست چِست بیگ ءَ اَنت ءُ چریشی ءِ پژدر ءَ رھرشانی زرمبشت ءِ بندات بیگ اِنت-

دومی نیمگ ءَ بلوچ ورنا موومنٹ ءَ شنگ کرتگیں بیانے ءِ تہ ءَ گْوشتگ کہ بلوچ یکجھتی کمیٹی ءِ نیمگ ءَ جنوری دوھزار ءُ بیست ءُ یک ءَ کریمہ بلوچ ءِ کوش ءِ کیس ءَ کینیڈا سرکار ءِ نیمگ ءَ بے تھمبلی ءُ بلوچستان ءِ بازیں جاھاں زھرشانیاں ھواریں زالبول ءُ چکانی سر ءَ ریاستی ادارھانی نیمگ ءَ بیھار دیگ ءِ بگیری ءَ زھرشانی زرمبشت ءُ شال ءَ ٹوھیں کچے ءَ زھرشانی جارانی پُلامرزی ءَ کن ایں ءُ دراھیں راج پرست ءُ انسان دوستاں دزبندی کن آں کہ آ دو جنوری دوھزار ءُ بیست ءُ یک ءَ شال ءَ بلوچ یکجھتی کمیٹی ءِ نیمگ ءَ پِرینتگیں جار ءَ ٹوھیں کچے ءَ زھرشانی ءُ روانک ءَ بھر بہ زور اَنت ءُ وتی بلوچ بیگ ءِ راستی ءَ پدر بہ کن اَنت –

درشان ءِ تہ ءَ گوشگ بیتگ کہ کریمہ بلوچ ءِ کیس ءَ کینیڈا ءِ سرکار بے زمہ واریں رنگے ءَ پَٹ ءُ پول کنگ بلوچ راج اشی ءَ منّ اِت نہ کنت – بلوچ ورنا موومنٹ میان اُستمان ءِ چیردستی ءَ پَٹ ءُ پول ءِ لوٹ کرتگ –