بلوچستان ءِ بازیں ھند ءُ دمگاں پوج ءِ لشکرکشی برجاہ

بلوچستان: بولان، مند، دشت ءَ پاکستانی پوج ءِ لشکر کشی برجاہ، بولان ءَ مروچی دومی روچ ءَ پوجی بالگرداں تیرگواری کرتگ –

دی بلوچستان پوسٹ

سربوتگیں ھالانی رِد ءَ بلوچستان ءِ دمگ بولان ءَ پاکستانی پوج ءِ نیمگ ءَ مروچی دومی روچ ءَ ھم لشکر کشی برجاہ انت، لشکر کشی ءَ بمب گواریں بالگرداں بازیں ھنداں برزی ءَ تیرگواری ھم کُرتگ –

گیشیں ھالانی رِد ءَ گوستگیں روچ ءَ چہ بندات بوتگیں لشکر کشی ءَ برجاہ انت، پوج ءِ مزنیں کساسے جمبرو، تلانگ، کمان، جھالاوان، لونی، میژداری پیش گامی کنگ ءَ انت ءُ ھمے میان ءَ دمگ ھالیگ کنگ بوگ ءَ انت –

اھوالکار ءِ رِد ءَ پوج ءَ بالی گرابانی کمک ھم گون انت، مروچی دومی روچ ءَ کوھی دمگاں بالگرداں تیرگواری ھم کرتگ –

اے لشکر کشی دو روچ پیسر جھالاوان تنک ءِ دمگ ءَ بندات کنگ بوتگ، کہ دو روچ پیسر سلاہ بندیں مردماں یک پوجی پانگسے ءِ سر ءَ اُرش کتگ، پانگس دستیگ کُتگ ءُ پوجی ساز ءُ سامان ھم گوں وت برتگ انت – پد ءَ رند ءَ پوج ءِ مزنیں کساسے ءَ لشکر دمگ ءَ آرگ بوتگ اَنت اھانی سر ءَ دوبر تراک ناکیں شورواں گوں اُرش کنگ بوتگ –

دومی نیمگ ءَ کیچ ءِ دمگ مند ءِ کوھی دمگاں ھم گوستگیں دو روچاں چہ پاکستانی پوج ءِ لشکر کشی برجاہ انت –
اھوالکار ءِ رِد ءَ مند سُھریں کوہ ءِ کوھی دمگاں پاکستانی پوج پُترتگ ءُ زوراکی کنگ ءَ اِنت-

دمگی مردمانی رد ءَ گوستگیں شپ ءَ پاکستانی پوج ءِ بیست گاڑی ءُ دَہ سینکلانی کاروانے کوھی دمگانی تہ ءَ رؤگ ءَ گندگ بوتگ اَنت ءُ ھمے وڑ ءَ مروچی سُھب ءَ ھم پاکستانی پوج ءِ دگہ پانزدہ گاڑی گوں دو ایمبولینسانی ھواری ءَ ھمے دمگ ءَ رؤگ ءَ گندگ بوتگ انت-

ھالکار رِد ءَ پاکستانی پوج سُھریں کوہ ءُ کُنٹانی ءِ کوھی دمگاں زوراکی کنگ ءَ اِنت – دنیگت ءَ ھچ وڑیں جانی ءُ مالی تاوانانی ھال نیست –

ھمے وڑ دشت مزن بند ءِ کوہ ءَ ھم پاکستانی پوج زوراکی کنگ انت –

اھوالکار ءِ رِد ءَ چہ دشت ءُ مند ءَ پاکستانی پوج ءِ کاروان دیم پہ کوہ ءَ شتگ اَنت-
مروچی بانگواہ ءَ دشت ءِ دمگ بل نگور ءِ بنجل ءَ زورگیریں پاکستانی پوج ءِ کاروانے دیم پہ گورگی ءُ بانسر ءِ نیمگ ءَ شتگ-

ھمے وڑ ءَ چہ مند ءَ پاکستانی لشکر ءِ بازیں گاڑی ءُ پرپٹ ئِے کترینز ءَ چہ دیم پہ کوہ ءِ نیمگ ءَ شُتگ انت –

ھالانی رِد ءَ زال کلّگ، بانسر، چرپان، بے پات، ننگارو ءُ کترینز ءِ کنڈگ پاکستانی پوج ءَ بستگ اَنت ءُ لھتے لشکری کارمند کوہ ءِ توک ءَ پُترتگ ءُ دیم ءَ جُنزان اَنت-

دمگی مردمانی گوشگ اِنت کہ مزن بند ءُ سُھریں کوہ دوئیں جاگھاں پاکستانی لشکر پُترتگ ءُ لشکر کشی کنگ ءَ اِنت، پوجی کارمندانی مُچ بوگ ءَ دمگ ءَ شریں رنگے ءَ ھالانی سر نہ بیگ ءَ دنیگت ءَ ھچ وڑیں تاوانانی ھال نیست –