آواران ءُ تمپ ءَ پاکستانی پوج ءُ ایف سی ءِ نیمگ ءَ کریمہ بلوچ ءِ “کوش” ءِ ھلاپ ءَ زھرشانی کنوکیں لس بلوچ مھلوک ءُ بلوچ یکجھتی کمیٹی ءِ باسکاں بیھار دیگ بیتگ ءُ چہ زھرشانی کنگ ءُ روانک کشگ ءَ دارگ بیتگ اَنت۔
دی بلوچستان پوسٹ
سربیتگیں ھالانی رد ءَ بلوچ نودربر گل آزاد ءِ گوستگیں چئیرپرسن ءُ بی این ایم ءِ رھشون بانک کریمہ بلوچ ءِ بُنکی ھنکین تمپ ءَ زھرشانی کنوکیں مھلوک پوج ءَ داشتگ اَنت۔
گیشتریں ھالانی رد ءَ مھلوک بیھار دیگ بیتگ اَنت ءُ دزگیری ءِ ھم بے سوب ءِ کوشست کنگ بیتگ کہ زھرشانی کنوکیں زالبولاں پوج بے سوب کُتگ۔
کریمہ بلوچ ءِ “کوش” ءِ ھلاپ ءَ یکشلیں زھرشانی برجاہ اَنت ءُ ھمے رد ءَ مروچی سھب ءَ بانک کریمہ بلوچ ءِ بُنکی ھنکین تمپ ءَ آئی ءِ کوش ءِ ھلاپ ءَ زھرشانی روانک ءِ درآیگی بیتگ کہ پوج ءَ پہ زور داشتگ ءُ زھرشانی کنوکاں بیھار اش ھم داتگ۔
اے درگت ءَ بلوچ اسٹوڈنٹس ایکشن کمیٹی ءِ چئیرمین ڈاکٹر نواب بلوچ ءَ وتی ٹوئیٹر ءَ درشان ءِ تہ ءَ گُشتگ کہ “ چہ تمپ ءَ نا وشیں ھال پیداک اَنت۔”
ڈاکٹر نواب ءَ دیمترا گُشت کہ “ لشکر پر ایمنیں روانک ءِ کشگ ءَ نیلگ ءَ اِنت ءُ زالبول ھم کم شرپ کنگ بیتگ اَنت۔ روانک چہ بی وائی سی ءِ نیمگ یک ستاشانی ھاتر ءَ بیتگ۔”
دومی نیمگ ءَ بلوچ یکجھتی کمیٹی ءِ درشان ءِ رد ءَ آواران ءَ پاکستانی کارمنداں بلوچ یکجھتی کمیٹی آواران ءِ باسک بیھار داتگ اَنت ءُ سرجمیں میتگ تیرتج، سیاہ گزی، ھارونی ڈن، لانچ ڈنسر ءُ پیراندر انگیراں کُتگ۔ ءُ آواران ءِ نزیکیں ھنکین پوج ءِ سپاھیگ اوشتارنگ بیتگ اَنت۔
بلوچ یکجھتی کمیٹی ءِ رھشونانی گُشگ اِنت کہ مئے باسکاں گُشگ بیتگ کہ پاکستانی کارمنداں پون کُتگ ءُ بیھار داتگ کہ اگاں آیاں زھرشانی روانک کش اِت گُڑا آ چِست کنگ ءُ بیگواہ کنگ بنت۔ مروچی سھب ءَ پوج ءَ پریس کلب ھم بند کُتگ ءُ سپاھیگ اوشتارینتگ اَنت۔ ءُ بازار ءَ چیریں گل ءُ ھندی ڈیتھ اسکواڈز ءِ گردوکیں ٹولی یل کنگ بیتگ اَنت ءُ درستیں مردمانی چاریگ گیری کنگ ءَ اَنت۔
آیانی درشان ءِ رد ءَ دیریں دمگانی لوکل گاڑی دارگ بیتگ اَنت ءُ ڈرائیور بیھار دیگ بیتگ اَنت اگاں روانک ءَ رؤکیں مردم بازار ءَ سر کنگ بیت اَنت گُڑا آ وتی زمہ وار وت بنت۔ بلوچ یکجھتی کمیٹی ءِ رد ءَ بانک کریمہ ءِ گمانی اناگتی کوش ءِ ھلاپ ءَ مئے باسک مروچی زھرشانی کنگ ءَ دارگ بیتگ اَنت ءُ ھمے سوب ءَ مروچی بی وائی سی آواران ءَ وتی زھرشانی درشان کُت نہ کُتگ۔
زانگ بہ بیت بی ایس او آزاد ءِ گوستگیں چیئرپرسن کریمہ بلوچ گوستگیں ھپتگ ءَ بیست دسمبر ءَ یک شمبے ءَ بیگواہ بیتگ ءُ دو شمبے بزاں بیست ءُ یک دسمبر ءَ ٹورنٹو ءَ آئی ءِ جون آپ ءِ کِر ءَ دزکپتگ ۔
بانک کریمہ ءِ اناگتی مرگ ءِ ھلاپ ءَ بلوچستان ءَ زھرشانی یکشل ءَ برجاہ اَنت۔ شال، کراچی، گوادر ءَ ھوار بارکھان ءُ دگہ بازیں دمگانی تہءَ مزنیں کچے ءَ زھرشانی کنگ بیتگ اَنت ءُ دگہ بازیں دمگانی تہ ءَ زھرشانیانی جار ھم جنگ بیتگ اَنت۔