کریمہ بلوچ ءِ ناھکیں کوش: ھاران،بارکھان، ھزدار ءُ پنجگور ءَ زھرشانی

دی بلوچستان پوسٹ

نامی ئیں بلوچ زالبولیں رھشون ءُ بلوچ اسٹوڈنٹس آگنائزیشن ءِ گوستگیں چیئرپرسن کریمہ بلوچ ءِ کوش ءِ ھلاپ ءَ مروچی بلوچستان ءِ دمگ ھاران ءُ بارکھان ءَ بلوچ یکجھتی کمیٹی ءِ دزبندی ءَ مھلوک ءَ بازیں کچے ءَ زھرشانی کرتگ –

ھالانی رد ءَ ھاران ءِ شھر ءَ زالبول، چُک ءُ ورنایانی بازیں کچے ءَ دستاں اکس ءُ نبشتگیں بینرز چست کرتگ ءُ روانک کش اِتگ ءُ کریمہ بلوچ ءِ ناھکیں کوش ءَ ھواریں دستانی پدر کنگ ءِ لوٹ کرتگ –

ھمے وھد ءَ زھرشانی ءَ تران کنان ءَ گوشت اِت کہ کریمہ بلوچ ءِ کوش بلوچستان ءِ توار ءِ بے توار کنگ اِنت – کریمہ بلوچ بلوچستان ءِ یک مھکم ءُ سرجمیں توارے ءِ بنیاد ءَ کُشگ بیتگ –

تران کنوکاں گْوشت کہ سرجمیں بلوچستان زانت کہ کشندہ کَے اَنت، ءُ بلوچستان ءِ دگاں سر ءَ زھرشانیاں اے ھزارانی مردم دودمانیں دنیا ءِ دیم ءَ کُشندہ اش پدر کرتگ – آیاں گْوشت کہ کریمہ نِی جنگ ءِ چیدگ جوڑ بیتگ –

زھرشانی کنوکاں چہ کینیڈا ءِ سرکار ءَ لوٹ کرتگ ءُ گوشتگ کہ تچکیں رنگے ءَ پَٹ ءُ پول بہ کنت ءُ بلوچستان ءَ انساپ بہ دنت –

بلوچستان ءِ دمگ بارکھان ءَ سر بیتگیں ھالانی رد ءَ بلوچ یکجھتی کمیٹی ءِ دزبندی ءَ بارکھان ءَ سدانی کچ ءَ مھلوکاں زھرشانی کنان ءَ گْوشتگ کہ مروچی سرجمیں بلوچستان پدرد ءُ پرسیگ اِنت –

آیاں گْوشت کہ بلوچ زھگ ءِ جون ءَ سرجمیں بلوچستان یکجاہ کرتگ، مروچی بارکھان ءَ داں گوادر ءَ بلوچستان زھرشانیانی تہ ءَ گوزگ اِنت – ھمے وڑ ءَ گوستگیں روچ ءَ بلوچستان ءِ دمگ نسیر آباد، اوستہ مھمد ءَ سیاسی پاٹیانیاں ھوار نودربرانی گلاں زھرشانی کرتگ ءُ ڈیوا بلینتگ –

کشندھانی دزگیری ءِ لوٹ کرتگ ءُ گوشتگ کہ کریمہ بلوچ یک نہ ترس ءُ شیرزالیں زالبولے بیتگ آئی ءَ بلوچستان ءِ سیاست ءَ را یک ارواھے بکش اِتگ –

ھمے وڑ ءَ ھزدار ءَ ھم بلوچ یکجھتی کمیٹی ءِ دزبندی ءَ کریمہ بلوچ ءِ کوش ءِ ھلاپ ءَ زھرشانی روانک کشگ بیتگ –

روانک شھر ءِ دگانی سر ءَ تران بیتگ ءُ شھر ءَ مُچے ءَ بدل بیتگ ءُ روانک ءَ بازیں کچے ءَ چُک ءُ جنیناں بھر زرتگ ءُ کریمہ بلوچ ءِ ناھکیں کوش ایر جتگ ءُ گوشتگ کہ بلوچ دپتر ءَ زالبولانی مزنیں شرپے ھست –

آیاں گوشت کہ بلوچ زالبول بلوچستان ءَ ھم ریاست ءِ زُلم ءُ زوراکیانی آماچی ءِ ھواری ءَ نِی دراںڈیھاں ھم بلوچ زالبول ءُ بلوچ رھشون نشانگ کنگ بیگ ءَ اَنت –

ھمے وڑ ءَ بلوچستان ءِ دمگ پنجگور ءَ بلوچ یکجھتی کمیٹی ءِ نیمگ ءَ کریمہ بلوچ ءِ ناھکیں کوش ءِ ھلاپ ءَ زھرشانی روانک کشگ بیتگ –

روانک ءَ بازیں کچے ءَ سیاسی ءُ چاگردی مردمانی ھواری ءَ زالبول ءُ چُکاں ھم بھر زرتگ –

پنجگور ءَ زھرشانی ءَ بھر زیروکیں مردماں تران کنان ءَ گْوشت کہ کریمہ بلوچ ھما زالبول بیتگ آئی ءَ بلوچستان ءَ ھوار ھما زیردستیں راجانی واستا وتی توار برز کرتگ ءُ آئی ءَ میان اُستمانی دنیا ءَ ھم وتی ھکانی پد جنگ ءِ توار برز کرتگ –

آیاں گوشت کہ بلوچستان ءِ ناگیگیں جاوراں کریمہ بلوچ ھما کچ ءَ لاچار کرتگ کہ آ درانڈیھ ءَ بہ روت اود ءَ وتی راج ءِ ھکانی پد جنگ ءَ توار چِست بہ کنت بلے بلوچانی دشمن ءَ کریمہ بلوچ ءِ وڑیں شیرزال جھان ءِ پُر ایمنیں ڈیھاں ھم نہ بکش اِت ءُ وتی ھرجان جتگ –

آیاں گوشت کہ مئے دشمن ءِ دست بلوچستان ءَ ھمک مردمانی ھوناں ھونین اَنت نِی آئی ءَ درانڈیھاں ھم وت ءَ پدر کرتگ ءُ ایشی ءِ منانک ءَ دیگ ءَ اِنت بلوچانی کشندہ ما اِنت –

آیاں گوشت کہ بلوچستان ءَ نوزدہ سد ءُ چِل ءُ ھپت ءَ بہ گر داں روچ ءِ مروچی ءَ بلوچ مھلوک ءِ سر ءَ زُلم بیگ ءَ اَنت –

زانگ بہ بیت کینیڈا درانڈیھی ءَ جھمنندیں نامی ئیں بلوچ زالبولانی رھشون ءُ بلوچ اسٹوڈنٹس آرگنائزیشن آزاد ءِ گوستگیں چیئرپرسن کریمہ بانک کریمہ بلوچ ءِ ناھکیں کوش ءِ ھلاپ ءَ گوستگیں یک ھپتگے ءَ بلوچستان ءِ بازیں جاہ ءُ شھر، کُچَگی دمگاں زھرشانی درچ برجاہ اِنت، زھرشانی کنوکانی گوشگ اِنت کہ کریمہ بلوچ راجی جھد ءِ آجوئی ءِ پژدر ءَ کُشگ بیتگ –