کراچی: کریمہ بلوچ ءِ کوش ءِ ھلاپ ءَ زھرشانی

کریمہ بلوچ ءِ کوش ءِ ھلاپ ءَ بلوچستان ءَ ھوار کراچی ءَ زھرشانیانی درچ یکشل ءَ برجاہ –

دی بلوچستان پوسٹ

بلوچ یکجہتی کمیٹی ءِ نیمگ ءَ کراچی ءَ بلوچ نودربر گل ءِ گوستگیں سروک بانک کریمہ بلوچ ءِ کوش ءِ ھلاپ ءَ روانک ءِ کشگ بیتگ ءُ زھرشانی کنگ بیتگ –

زھرشانی روانک آرٹس کونسل ءَ بندات بیتگ ءُ شھر ءِ دگانی سر ءَ تران بیتگ ءُ روانک ءَ بازیں کچے ءَ راجدار، چاگردی، چُک ءُ جنیناں ھوار جتا جتائیں تکاں بندوکیں مردماں بھر زرتگ-

روانک ءَ بھر زیروکیں مردمانی دستاں کریمہ بلوچ ءِ اکس ءُ نبشتگیں تاک بیتگ اَنت ءُ اوگام جنان ءَ کراچی ءِ پریس کلب ءَ مُچے ءِ دروشم ءَ سر بیتگ –

مُچے ءَ بھر زیروکیں مردماں کریمہ بلوچ ءِ کینیڈا ءَ بیگواہ بیگ ءَ پد آئی ءِ ٹورنٹو ءَ آئی ءِ جون ءِ دزکپگ ءَ ٹورنٹو ءِ واکدار المیں پَٹ ءُ پول بہ کن اَنت ءُ کشندھانی پدراھی پدر کنگ بہ بنت –

آیاں گوشت کہ بلوچستان ءَ نودربراں ھوار لس مردمانی ساھگیری کنگ ءَ بیگ ءَ اِنت بلے دنیا ءِ آ دگہ واکدار ءُ ادارہ واب اَنت ءُ نودربراں وتی ساہ ءُ وتی وانگ ءِ ھاتر ءَ وتی ڈیھ ءَ دور شتگ اَنت درانڈیھاں ھم بلوچانی ساہ بکشگ بیگ ءَ نہ اِنت –

آیاں گوشت کہ کریمہ بلوچ بلوچ سیاست ءِ چیدگ بیتگ ءُ آئی ءِ کوش ھمے سما بیگ ءَ اِنت بلوچانی گچین کرتگیں مردمانی کوش انگت ءَ برجاہ اَنت ءُ ریاستی مردم ھمے سرپد بنت کہ بلوچ لیڈرانی کوش ءَ بلوچ ھلاس بنت بلے آیانی پگر ءُ لیکہ ھلاس نہ بنت ءُ مروچی ھم کراچی ءَ ھوار بلوچستان ءَ کریمہ بلوچ ءِ پگر ءُ لیکہ جاڑیگ اَنت ءُ آئی ءِ پنت مروچی ھم بلوچ مھلوک ءِ رھشونی ءَ کنگ ءَ اَنت –

بلوچستان ءَ بیگواھیں ڈاکٹر دین مھمد ءِ جنک مھلب دین ءَ ھم زھرشانی روانک ءَ بھر زرتگ ءُ آئی ءَ گْوشتگ کہ کریمہ بلوچ بیت کنت ھمے واستا جنگ بیتگ کہ آ چیئرمین زاھد بلوچ ءِ بیگواھی ءِ چمدیتگیں مردم بیتگ-

آئی ءَ گْوشت کہ ریاست اشی ءَ بے ھیال اِنت اے وڑ ءَ چمدیتگیں مردم گار ءُ گمسار کنگ نہ بنت ءُ آئی ءِ کتکاری چیر نہ تر اَنت –

زانگ بہ بیت کریمہ بلوچ بیست دسمبر ءَ ٹورنٹو ءَ بیگواہ بیتگ ءُ بیست ءُ یک دسمبر ءَ آئی ءِ جون ٹورنٹو ءِ شھر ءَ یک کورے ءِ تہ ءَ پولیس ءَ دزکپتگ –

کریمہ بلوچ ءِ ناھکیں کوش ءِ پژدر ءَ آئی ءِ برات سمیر مھراب ءَ ھم چاگردی رسانکجاہ ءَ گوشتگ کہ کریمہ ءِ کوش ءِ المی پَٹ ءُ پول کنگ بہ بیت ءُ آئی ءِ کشندہ دیم ءَ آرگ بہ بنت –

ھمے وڑ کریمہ ءِ لوگ واجہ ھمل ھیدر ءَ ھم وتی ٹویٹ ءِ تہ ءَ گوشتگ کہ کریمہ یک سسا پگر ءُ زانتکاریں جنینے بیتگ ءُ آئی ءَ بلوچستان ءِ نودربرانی رھشونی ءِ ھواری ءَ بلوچستان ءَ انسانی ھکانی لگتمالیانی سر ءَ جھان ءَ گپ جتگ ءُ بازیں دیواناں بھر زرتگ ءُ آ ھمے کارانی پژدر ءَ کُشگ بیتگ ءُ آئی ءِ کوشکار دیم ءَ آرگ بہ بنت ءُ مارا انساپ دیگ بہ بیت ءُ ٹورنٹو پولیس وتی ھژدری پَٹ ءُ پولاں بہ کنت –

زانگ بہ بیت بلوچستان ءَ یکشل ءَ کریمہ بلوچ ءِ کوش ءِ ھلاپ ءَ برانز چِست اِنت ءُ بلوچ یکجہتی کمیٹی ءَ جتا جتائیں شھراں زھرشانیانی جار جتگ اَنت –