کوھلو پاکستانی پوج ءِ سر ءَ اُرش، اُرش ءِ زمہ واری سلاہ بندیں گل یو بی اے ءَ منّ اِتگ

دی بلوچستان پوسٹ

سوریں کھور ءَ فرنٹیر کور ءِ تر ءُ تاب کنوکیں کارمندانی سر ءَ اُرش کُتگ، دو کُشتگ ءُ بازینے زدگ کتگ – مزار بلوچ

ٹی بی پی پتر سربیتگیں ھالانی رِد ءَ مروچی سھب ءَ ناشناسیں سلاہ بندیں مردماں بلوچستان ءِ دمگ کوھلو ءُ کاھان ءِ میانی میتگ سورین کھور ءَ ایف سی ءِ ترءُ گرد کنوکیں ٹولی ءِ سرا اُرش کُتگ ، اُرش ءَ فرنٹیرکور ءِ کارمنداں جانی ءُ مالی تاوان رس اِتگ –

دومی نیمگ ءَ بلوچ آجوئی لوٹوکیں گل یونائیٹڈ بلوچ آرمی ءِ جارکش مزار بلوچ ءَ اے اُرش ءِ زمّہ واری منّ اِتگ ءُ گوشتگ کہ مروچی سھب ءَ ادار ھشت ءُ نیم ءَ مئے سرمچاراں کوھلو ءُ کاھان ءِ میانی دمگ سورین کھور ءَ فرنٹیر کور ءِ تر ءُ گرد کنوکیں ٹولی ءِ سر ءَ کسان ءُ مزنیں سلاھاں گوں اُرش کُتگ، اُرش ءَ دژمنیں پوج ءِ دو کارمند ھما دمان ءَ مُرتگ وھدےکہ بازینے زدگ بوتگ –

جارکش ءَ گوشتگ کہ زورگپتیں دژمنیں ریاست ءِ ھر لُٹ ءُ پُلی منسوبھاں بلوچ راج ءِ مدت ءُ کمک ءَ بے سوب کنیں، مئے اُرش بلوچستان ءِ آجوئی تاں برجاہ مان انت –