راسک ءَ دگ وئیلے ءَ زالبولے بیران

وئیل ءَ بلوچ زالبولے ایرانی چیریں ادارھانی کارندھانی گاڑی ءَ لگت داتگ –

دی بلوچستان پوسٹ

سر بیتگیں ھالانی رد ءَ مروچی روکپتی بلوچستان ءَ ایرانی چیریں ادارھانی کارمندانی گاڑی ءَ یک زالبولے ءَ ٹکر جتگ ءُ کُشتگ –

اھوالکار ءِ رد ءَ مروچی راسک ءَ ایرانی چیریں ادارھانی کارمنداں یک زالبولے دام کرتگ ءُ چریشی ءَ زالبول زدگ بیتگ ءُ نادراہ جاہ ءِ سر بیگ ءَ آئی ءَ وتی ساہ داتگ اَنت –

اھوالکار ءِ رد ءَ وئیل ءَ پد چیریں ادارھانی کارمند تتکگ اَنت ءُ شتگ اَنت ءُ پد ءَ دمگی پھازداراں بارکشیں گاڑی گپتگ ءُ بیگار کرتگ اَنت کہ اے زالبول شما دام کرتگ ءُ کُشتگ –

بیران بیتگیں زالبول ءِ پجار خدیجہ ءِ جھمنند نظر آباد پارود ءِ نام ءَ زانگ بیتگ –

دمگی مردمانی گوشگ اِنت ایرانی چیریں ادارہ ءُ سیمسری لشکر ھمک شپ راسک ءِ کش ءُ گوری دمگانی راہ ءُ دراں بندگ ءُ لس بارکشیں گاڑیانی سر ءَ تیرگواری کن اَنت ءُ چریشی ءَ چہ تنی وھدی بازیں مردمے ھمے تیرانی آماچ ءُ زوال بیتگ اَنت –