دی بلوچستان پوسٹ
بلوچستان ءِ دگانی پرشت ءُ پروش، آسراتی نہ بوگ ءَ دگانی وئیلانی درچ کمتر نہ بوتگ اَنت ـ ھمے سال ءِ نومبر ماہ ءَ یک ھزار ءُ سَے سد ءُ یازدہ دگ ءِ وئیل دیم ءَ اتکگ اَنت چریشی ءَ یک سد ءُ چار مردم بیران بوتگ وھدیکہ اے وئیلاں یک ھزار ءُ ھپت سد ءُ پنجاہ مردم زدگ بوتگ اَنت –
بلوچستان یوتھ اینڈ سول سوسائٹی ءِ نیمگ ءَ چہ ماہ ءِ نومبر ءَ دوھزار ءُ بیست ءِ شنگ بوتگیں رپورٹ ءِ رِد ءَ بلوچستان ءِ جتا جتائیں دمگ کلات، مستونگ، شال، پشین،کچلاک، بوستان، چمن، قلعہ سیف اللہ، قلعہ عبداللہ، مسلم باگ ءَ چارسد ءُ ھشتاد یک شھدگانی سر ءَ بوتگیں وئیلاں بیست ءُ ھشت مردم بیران بوتگ اَنت وھدیکہ شش سد ءُ چل ءُ سَے مردم زدگ بوتگ اَنت ـ
ھمے وڑ ھزدار، سوراب، لسبیلہ، ھب، ویندر ءُ اوتھل ءَ پنچ سد ءُ ھپتاد ھشت وئیل دیم ءَ اتکگ ـ چریشاں بیست ءُ چار مردم بیران بوتگ ءُ وھدیکہ ھپت سد ءُ چل شش مردم ٹپی بوتگ اَنت ـ
اے رپورٹ ءِ رِد ءَ بلوچستان ءِ دگہ ھند ءُ دمگ ژوب، زیارت، ھرنائی، لورلائی ، دکی، ھانوزئی ءُ شیرانی، سبی، مچھ بولان، ڈیرہ مراد جمالی، اوستہ محمد، ڈیرہ بگٹی، بارکھان، رکنی، نصیرآباد، ڈیرہ اللہ یار ءُ جعفرآباد ءَ ھم دگ ءِ وئیل دیم ءَ اتکگ، چریشی ءَ سِی ءُ شش مردم بیران بوتگ اَنت ءُ وھدیکہ دوسد ءُ ھپتاد سَے مردم ٹپی بوتگ اَنت ـ
ءُ دالبندین، نوشکی، چاگی، خاران، تفتان، واشک،نوکنڈی، بسیمہ ءُ ماشکیل ءَ سِی ءُ شش وئیلاں چاردہ مردم بیران بوتگ ءُ شست دو مردم ٹپی بوتگ اَنت ـ
رپورٹ ءِ تہ ءَ دیمتر ءَ گوشگ بوتگ کہ پنجگور، تربت،اورماڑہ گوادر ءُ پسنی ءَ پانزدہ دگ ءِ وئیل بوتگ، دگ ءِ وئیلاں ھپت مردم بیران بوتگ وھدیکہ بیست ءُ شش مردم ٹپی بوتگ اَنت ـ
زانگ بہ بیت گوستگیں ماہ ءَ بلوچستان ءِ تہ ءَ یک ھزار سَے سد ءُ یازدہ دگ وئیل دیم ءَ اتکگ کہ آ وئیلاں یک سد ءُ چار مردم چہ وتی زند ءَ زبھر بوتگ انت وھدیکہ یک ھزار ءُ ھپت سد مردم ءَ گیش اے وئیلاں ٹپی بوتگ اَنت ـ