دی بلوچستان پوسٹ
بلوچستان ءِ بنجاھی شھر شال ءَ وائس فار بلوچ مسنگ پرسنز ءِ بنجل ءَ مروچی چار ھزار ءُ یک سد ءُ پنجاہ ءُ ھپت روچ سرجم بوتگ –
بلوچ نودربر گل پجار ءِ سرکماش ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولاں گوں پدردی درشان اِتگ ۔
وائس فار بلوچ مسنگ پرسنز ءِ کمک سرکماش ماما قدیر بلوچ ءَ اتکگیں مردمانی میان ءَ گپ جنان ءَ گوشتگ کہ انسانی ھکانی میان اُستمانی روچ ءِ درگت ءَ انسان وتی بستار ءِ پجار زورگ ءَ وت ءَ وت جست کنگ انت کہ پرچا نیکراھی ءِ نام ءَ کُشت ءُ کوش بوگ انت، نیمگے چاگردی ٹولیانی بھر ءُ بانگی ءُ نیمگے وتی کمتری ءُ یک نیمگے وتی ھکّ لوٹوکاں زنداناں بندیگ کنگ آھانی زانگولیں جونانی دور دیگ، مروچی بست ءُ یکمی کرن وڑیں دیمروی کنوکیں دور ءَ نوکتریں رسانکاں چہ دور دارگ بیت مروچیگیں دور ءَ دیمروی کنگے دور گوشگ بیت بلے انسان وتی شُدیکی ءِ دور کرت نہ کنت ـ
ماما قدیر بلوچ ءَ گوشتگ کہ زندگیں انسان ءِ ھستی چی انت مروچی دیمروی کنوکیں دورے تہ ءَ آئی ءِ جاہ ءِ ھست- اے جُست بوت کنت یک وابیں مردمے ءِ سرینگ انت بلے مروچیگیں وانندہ زانتکاریں مردمانی ھاتر ءَ اے گپ بس وھد دِکہ دیگی ءُ اھوالکارانی ھاتر ءَ سرھال بلے راستی ایش انت انسانی ھکانی لگتمالی مروچی کسے ءِ واستا المی ھال ءَ چہ ابید دگہ ھچ بستار نہ داریت ـ
آئی ءَ گوشتگ کہ انسانی ھکانی لگتمالی مروچی یک سنگینیں جیڑہ ئِے ءُ انسانی ھکانی میان اُستمانی روچ جست کنگے ھم روچ انت کہ ھر انسان مروچیگیں روچ ءَ وتی چپ چاگردے نا انساپیانی دھان ءَ بہ دنت ءُ وت وت ءَ جست بہ کنت مئے جد ءُ جھد پُرایمن انت ءُ بلوچ ءَ ھوار اے دمگ ءَ نندوکیں لس مھلوکے ھاتر ءَ وی بی ایم پی یک توارے ـ