جھانی وبا کرونا وائرس ءِ زُوت ھلاس کنگ ءِ اُمیتان اِنت – ڈبلیو ایچ او ءِ سروک

دی بلوچستان پوسٹ

میان اُستمانی جانسلامتی ءِ ادارہ(ڈبلیو ایچ او) سروک ٹیڈروس ادھانو ءَ تران کنان ءَ گْوشتگ کہ کرونا وائرس ءِ ویکسین ءِ درایگ ءِ سوبمندی ءَ پد نِی ما اُمیتانی تہ ءَ اِنت ھمے سال ءِ گڈی ءَ جھانی وبا ءَ پروش دات کُت کن ایں –

ٹیڈروس ادھانو ءَ گوشت کہ کرونا وائرس ءِ تھاریں شپ نِی ھلاس بیتگ ءُ پہ نادراھیں مردماں رُژنائیں روچے ٹِک دیگی اِنت کہ کرونا وائرس ءِ ویکسین چکاسگ سوبمندی ءِ بارہ ءَ گپ دیم ءَ آیگ ءَ اَنت ءُ ما جھانی نادراھی ءَ پروش ءُ ھلاس کُت کن ایں –

ٹیڈروس ادھانو ءَ گْوشت کہ سوبمندیں درمان ءِ پدراھی ءَ اُمیتانی گپ دیم ءَ آیان اَنت ءُ اے تبزانتی ءِ درمان ارزشتی بے دلگوش کنگ نہ بیت ءُ اے راجدپتری گپے کہ کجام ھم ویکسین اے کساس ءَ زوت جوڑ نہ بیتگ –

آئی ءَ گوشت کہ تبزانتاں ویکسین ءِ جوڑ کنگ ءَ بازیں ببایے داتگ ءُ میان اُستمانی برادری ءَ نوکیں ویکسین ءِ چارگ ءُ سرکنگ المی بیت اِنت –

میان اُستمانی جانسلامتی ءِ سروک ٹیڈروس ادھانو ءَ گوشتگ کہ ھنچُش ویکسین سرجم بیت ھنچش شریں رنگے ءَ دراھیں ڈیھاں بھر ءُ بانگ کنگ بیت اِنت –

آئی ءَ گوشت کہ سرکار وتی مردمانی رکینگ ءَ ھرچ رنگ ءَ جُھد کنت بلے نیزورکینانی ویکسین ءِ تہ ءَ کمی ھست اِنت ءُ سرانی روگ ءِ ترس ھم بیت کنت –